LECCIONI 10
¿Chonigá ju ʼwe aʼlá apirigá simawa alé napuíkachi alué testigo Jeobá?
¿Siné rawé repáriame ju mué alué napuíkachi alué testigo Jeobá? Tajsiné simisá mué alé chijunárime nímala. Mué boʼné rukériame nímala: «¿Cho nokame ju alué Testigo aʼboi napuíkachi? ¿Chonigá ʼwe aʼlá niraga eteme aʼboi? ¿Ne abiena asimela ju?». Ye leccioni benírimala ye napuíkame guʼírimala apirigá mué nímala amígola Onorúgame ʼlige nejkúrimala apirigá mué nímala ʼwe aʼlá ralámuli.
1. ¿Chonigá ju ʼwe aʼlá apirigá simawa alué napuíkachi?
Bilé oságame alué Biblia anile chonigá ju ʼwe aʼlá simawa alé napuíkachi: «Alé weʼká napuíkachi ʼwe niraga etémala Jeobá» (Salmo 26:12). Jipe rawé, alué testigo Jeobá abiena napuíkame ju, ʼlige ʼwe ganíliga mochime ju. Bochígame gawichí, nabí tarali napuíme ju apirigá ʼwe aʼlá niraga etémala Onorúgame, ʼlige wikarame ju ʼlige oración neteme ju suwábaga napuíka. Nabí bamí kachi neteme ju bilé napuíkame weʼkaná kachi bejtégame biʼlepi napuíme ju pe alieri neteme ju.
2. ¿Tachiri benírimala ramué napuíkachi?
Alé napuíkachi beníriame ju Onorúgame Raʼíchali, alé beníriame ju tabilé nóchame ju, aʼboi beníriame ju tachiri aní (leériwa Nehemías 8:8). Mué simisáká alé napuíkachi, benimela uché rajpé napu ju Jeobá aminami ʼwe aʼlá napu nígame ju boʼné. Mué abé benírisa Onorúgame ʼwe galé mué, uché rajpé najkimela mué apirigá amígola nímala. Abiena benimela mué Onorúgame nejkúrimala apirigá mué bejtémala ʼwe aʼlá (Isaías 48:17, 18).
3. ¿Churigá guʼírimala napu machiá ralámuli alé napuíkachi?
Jeobá tánale ramué «ʼla ʼwe aʼlá naʼtálime júkuru churigá ʼla oiláriwa alué uché jaré ralámuli napurigá ʼla sébali olámala ʼlige napurigá ʼla niraga etémala uché jaré ralámuli ʼlige ʼla guʼíriga ʼla naʼtemaka. ʼLa oʼmaka napuíka raʼichawa napurigá beniboa» (Hebreos 10:24, 25). Alé napuíkachi, machimela uché jaré ralámuli aʼbopi galeme, aminami benime uché rajpé Onorúgame. Alé akémala raʼíchali alé Biblia (leériwa Romanos 1:11, 12, TNM). Abiena machimela ralámuli ʼyúgame ʼlige ralámuli tabilé ʼyúgame ʼwe nejkúrimala mué. Nerú uché rajpé tábiri Jeobá tabilé najkí apirigá ramué rokáriwa alé napuíkachi.
ABÉ BENIBOA
Beniboa chieti ju alé napuíkame alué testigo Jeobá ʼlige chonigá ʼwe najtékame ju simawa suwábaga napu napuíkachi.
4. Alué napuíkame alué testigo Jeobá
ʼWe ʼya weʼká bamí kachi alué siglo bajchá, alué cristiano napuíme nile apirigá ʼwe niraga eté Jeobá (Romanos 16:3-5). Leériwa Colosenses 3:16, TNM ʼlige raʼichawa ye:
¿Churigá nirame nile Jeobá alué bajchá cristiano?
Jipe rawé, abiena napuíme ju alué Testigo aʼboi salonchi. Apirigá machiboa chieti ju aʼboi napuíkame, eʼnewa alué VIDEO. Eʼnewa alué retrato napu mochí alé napuíkachi ʼlige raʼichawa ye:
¿Tachiri ju alieri napu neteme ju alé galí napu napuíme ju alué testigo ʼlige napu aní alué Colosenses 3:16?
Napuʼlige etele alué video o alué retrato, ¿nerú bilé tábiri napu mué galé ramué napuíkachi?
Leériwa 2 Corintios 9:7 ʼlige raʼichawa ye:
¿Chonigá tabilé tánime ju enomí alé napuíkachi alué testigo Jeobá?
Mué ʼlige alué beníriame eʼnewa napu beniwa ye tarali alé napuíkachi.
¿Tachiri bilena ʼwe galé mué alé napuíkachi?
¿Mué ʼma machime nile?
Alé jw.org machiboa koche ʼlige chiéniko ju alué napuíliame weʼkaná kachi bochígame gawichí.
Ramué napuíkachi nerume ju nawésali, oká ralámuli raʼíchame ju alé ʼpa ʼlige video. Suwábaga chojkime ju wikaria ʼlige oracioni neteme ju aminami suwime ju alarigá.
Alé napuíkachi ʼweti elásawa sekala alarigá raʼíchame ju.
Suwábaga ralámuli repáriame ju ʼwe aʼlá: rió ʼlige mukí, ralámuli oʼchérame ʼlige towí...
Alé napuíkachi testigo Jeobá tabilé goblálime ju. Tabilé tánime ju enomí aminami tabilé najtékame moʼiwa.
5. ʼWe aʼwalí najkiame ju apirigá mochiwa alé napuíkachi
Naʼtawa alué Esusi rejimala. Bejteme nile alé Nasareta ʼlige, apirigá simámala nile alé templo Rusaleni nabí bamí kachi, simime nile baikiá rawé rabomi kachi. Leériwa Lucas 2:39-42 ʼlige raʼichawa ye:
¿Mué mayé apirigá simawa alé Rusaleni tabilé najkiame nile aʼwalí?
Mué, ¿chu ʼsímala apirigá mochiwa alé napuíkachi?
¿Mué mayé ʼwe nirágame ju apirigá netewa? ¿Chonigá?
Alué Biblia beniri ʼwe najtékame ju apirigá napuímala nirawa etewa Jeobá. Leériwa Hebreos 10:24, 25 ʼlige raʼichawa ye:
¿Chonigá tabilé aʼrewa apirigá simawa alé napuíkachi?
JARÉ RALÁMULI ANÍ: «Tabilé najkiame ju apirigá napuíwa uché jaré ralámuli apirigá niraga etewa Onorúgame. Alué relijioni ju, apiépiri ralámuli animela chu ʼsímala nímala».
¿Chieri texto ʼlige ejemplo napu chujkú alé Bíbliachi anime ju tachiri najkí Onorúgame apirigá ramué netewa?
ABÉ NAJTÉKAME
Mué simisáká alé napuíkachi benimela mué uché rajpé napu ju Jeobá, niwa mué amígola aminami niraga etewa uché jaré ralámuli si.
Api mué ʼma benile
¿Chonigá nepari Jeobá alé napuíkachi?
¿Tachiri beniwa alé napuíkachi testigo Jeobá?
¿Tachiri uché rajpé nejkúrimala alé napuíkachi?
UCHÉ RAJPÉ ʼYÁAWA
¿Mué chijúname simí alué napuíka? Bilé rió ʼwe chijúname nile aʼkinana ʼwe galele alué napuíka. Eʼnewa chonigá.
Machimela bilé reʼmalí ʼwe galeme nile alué napuíka ʼlige eʼnewa tachiri ʼsile boʼné apirigá abijí simí ye napuíkachi.
Leériwa tachiri ʼnata jaré alué napuíka.
Eʼnewa churigá bilé rió oparúgame nakulíwale napuʼlige simile alué napuíkachi alué testigo Jeobá.
«Tajsiné aʼreme nile ne ranela» (La Atalaya, 1 de julio de 2014)