LECCIONI 24

¿Tachiri aní alué Biblia alué ánjeli?

Edición impresa

Jeobá najkí apirigá ramué machiboa Jeobá rejimala napu mochígame ju ʼpa rewagachi. ʼLige abiena alé mochí ánjeli, abiena machirúgame «Onorúgame ʼkúchila» (Job 38:7). ¿Tachiri aní alué Biblia alué ánjeli? ¿Chu ʼsimí ju ralámuli si? ¿Suwábaga alué ánjeli ju rejimala Onorúgame?

1. ¿Chieri ju alué ánjeli?

Taʼchó netele alué Gawí, Jeobá newale alué ánjeli. Napurigá boʼné, espíritu ju tabilé etériame, ʼlige bejté ʼpa rewagachi (Hebreos 1:14). Nerú milloni ánjeli aʼpili ju seʼwinátiri (Apocalipsis 5:11). Aʼboi «ʼwe aʼlá sébali olame júkuru [Jeobá] ʼyuga napurigá najkí boʼné» (Salmo 103:20). ʼWe ʼya, Jeobá júlame nile alué ánjeli apirigá oʼtomela alué raʼíchali arigá nejkúrime nile alué puéblola. Jipe ko, alué ánjeli oʼtome ju alué kristiano apirigá rewimela alué ralámuli chieri najkí machiá abé alué Onorúgame.

2. ¿Chieri ju Satanasi ʼlige alué uʼkuchípala remónisi?

Jaré ánjeli aʼrele eʼwá napu ju Jeobá. Bajchá napu tabilé eʼwame nile ju alué «Riablo anilime ju ʼlige Satanasi anilime ju, napu pe ʼyégime jena wijchimoba ejperégame» (Apocalipsis 12:9). Satanasi najkile nulá ujché jaré, ʼliko arigá ʼyégale bajchá ralámuli napurigá tabilé eʼwámala. Pe aʼkinana abiena ʼyégale alué ánjeli apirigá netémala alarigá. Alué ánjeli tabilé eʼwame rewégame ju alué uʼkuchípala remónisi. Jeobá ʼma pátuturu ʼpa rewagáchika reʼkíname ju jena wijchimoba, ʼlige gajunárime nímala (leériwa Apocalipsis 12:9, 12).

3. ¿Churigá ʼyegia napu ju Satanasi ʼlige alué uʼkuchípala remónisi?

Satanasi ʼlige alué uʼkuchípala remónisi ʼyegia weʼká ralámuli alué espiritismo ʼlige okultismo unega ye aniame ju raʼíchame ju napu ju alué espíritu. Jaré ralámuli leeria alué oróskopo ʼlige simiá alué astrólogo, machinárime ju chu ikimela pe aʼminana, napu ʼyome ju ʼlige sujkurúgame. Jaré najkime ju ʼyóniga napu simiá alué sujkurúgame si. ʼLige jaré mayé napu umeba raʼicha alué suwígame. Nobi Jeobá ramué aní: «Tabilé simí alué raʼíchame alué espíritu si nibilé rukewa alué machinárime ju chu ikimela pe aʼminana» (Levítico 19:31). Jeobá ramué repúnale napu ju alué Satanasi ʼlige alué uʼkuchípala remónisi, napugiti alué saíla ju ʼlige resí olani ramué.

ABÉ BENIBOA

Raʼichawa napu neteme ju ʼwe aʼlá alué ánjeli ʼlige chonigá ʼwe chátiri ju alué okultismo. Eʼnewa abiena churigá ramué repuwa alué Satanasi ʼlige alué uʼkuchípala remónisi.

Bilé ánjeli oʼtoa oká testigo Jeobá napu predikáriga ju galírachi.

4. Alué ánjeli guʼírame ju alué ralámuli apirigá machimela Jeobá

Alué ánjeli nígame Onorúgame tabilé predikáriame ju alué ralámuli. Napu ju ʼla bijchiá oʼtome ju napu ju Onorúgame najátame apirigá rewimela alué ralámuli alué machinárime Onorúgame. Leériwa Apocalipsis 14:6, 7 ʼlige raʼichawa ye:

¿Chonigá ramué najkiárame ju apirigá nejkúrimala alué ánjeli apirigá predikáriwa?
¿ʼWe raʼsálagá ajtí mué machiá alué ánjeli oʼtome ju mué alué ralámuli si alué akenale napu ju alué Biblia? ¿Chonigá?

Ujché jaré tábiri napu ju alué okultismo ʼlige alué espiritismo: tabla ouija, bola de cristal, líburu raʼíchame bampiro, carta alué tarot, mono alué budú, incienso, amuleto, fetiche ʼlige ujché jaré.

5. Tabilé nirawa espiritismo ʼlige ujché jaré okultismo

Satanasi ʼlige alué uʼkuchípala remónisi ju alué saíla alué Jeobá, ʼlige ramué abiena. Leériwa Lucas 9:38-42 ʼlige raʼichawa ye:

¿Cho olame ju ralámuli alué uʼkuchípala remónisi?

Tabilé najkiárame ju ipúriame yochi alué uʼkuchípala remónisi tabiléchigó ramué ʼyega. Leériwa Deuteronomio 18:10-12 ʼlige raʼichawa ye:

¿Churigá alué uʼkuchípala remónisi nulénale ramué abiena raʼichánale ramué si? ¿Tachiri tábiri alué okultismo netea koche bejté mué?
¿Mué mayé ju ʼwe aʼlá Onorúgame ramué nulá tabilé netewa alué tábiri alué okultismo? ¿Chonigá?

Eʼnewa alué VIDEO ʼlige raʼichawa ye:

VIDEO: «Tabilé akewa alué Riablo» (5:02)

¿Mué mayé alué amuleto napu oʼtome alué ranala Palesa ʼwe chátiri nile? ¿Chonigá?
¿Tachiri netele Palesa apirigá repúmala alué uʼkuchípala remónisi?

Alué kristiano ʼla bijchiá tabilé nirame ju alué uʼkuchípala remónisi. Leériwa Hechos 19:19 ʼlige 1 Corintios 10:21, TNM ʼlige raʼichawa ye:

¿Chonigá ʼwe najtékame ju ramué eʼkósiga apiépiri tábiri nígame ju napu ju alué okultismo?

Bilé mukí paka tábiri alué espiritismo eʼkósiga naʼichi.

6. Niyúriwa alué najkóliame alué Satanasi ʼlige alué uʼkuchípala remonisi ʼyuga

Satanasi nulá alué uʼkuchípala remónisi. ʼLige alué arkánjel Migeli nulá alué ánjeli aʼlá eʼwame ju; Migeli ju ujchéchi bilé rewalá Esusi. ¿Chiena nígame ju alué aʼwalí Migeli? Leériwa Apocalipsis 12:7-9 ʼlige raʼichawa ye:

¿Chieri ju abé aʼwágame: Migeli ʼlige boʼné ánjeli, o Satanasi ʼlige boʼné uʼkuchípala remónisi?
¿Mayé mué alué najátame Kristo majámili alué Satanasi ʼlige alué uʼkuchípala remonisi?

Mué niyúrimala alué najkóliame alué Satanási ʼlige alué uʼkuchípala remonisi. Leériwa Santiago 4:7 ʼlige raʼichawa ye:

¿Churigá repúmala mué napu ju alué Satanasi ʼlige alué uʼkuchípala remónisi?

JARÉ RALÁMULI ANÍ: «Tabilé ʼwe chátiri ju reʼeka ʼlige eté alué pelíkula raʼíchame ju alué majia o alué espíritu. Pe ju bilé reʼí».

¿Chonigá ju ʼwe chátiri naʼtáriame alarigá?

ABÉ NAJTÉKAME

Alué ánjeli ʼwe aʼlá eʼwame nejkúrime ju ramué. Satanasi ʼlige alué uʼkuchípala remonisi ju saíla Jeobá, ʼlige uneme ju alué okultismo apirigá ʼyegia alué ralámuli.