¡Alué Onorúgame Gobiérnola ʼma nulá!

Napu ju alué Onorúgame Gobiérnola chojkile nulá napu ju alué bamí 1914 ʼpa rewagachi. Aʼlige bamí chojkile napu ju alué nujubapi rawé napu ju alué ralámuli gobiérnola. ¿Churigá machiaru? Jipe benimela napu anime ju alué Biblia abiena tachiri simírale ʼlige chieti ju alué ralámuli napuʼlige 1914.

1. ¿Tachiri anile alué Biblia chu ikimela?

Alué líburu bíbliko napu osale Ranieli ʼya ʼma anile nile napu Onorúgame Gobiérnola chojkímala nulámala bajchibé napu ju «gichao tiempo» (Daniel 4:16, 17). Ciento bamí bajchibé, Esusi raʼíchale napu ju aʼlige tiempo, anilime nile «alué tabilé ralámuli israelita ʼma neyúriga», ʼlige anile napu ye tiempo taʼchó suwibámala (Lucas 21:24). Beniboa napu alué gichao tiempo suwile 1914 bamí.

2. ¿Tachiri simírale jena gawichí ʼlige chieti ju alué ralámuli napuʼlige 1914?

Napu ju alué Esusi oyérame rukele: «¿Chieti tábiri nerúlamala ruyame mué ku sebamio?¿Chieti tábiri nerúlamala napuʼlige gawí suibámichi?» (Mateo 24:3). Apirigá nejérimala, Esusi anile weʼká tábiri simírimala bajchibé napu boʼné chojkigachi nulámala ʼpa rewagachi apirigá alué Selígame alué Onorúgame Gobiérnola. Anile nerúmala najkóliame, eluítiri aminami gawítiri nokimela ichúrimi (leériwa Mateo 24:7). Alué Biblia abiena anime chieti nímala alué ralámuli «alé nujubapi rawé» ʼlige nímala «ʼwe resítiri bamí» (2 Timoteo 3:1-5). Napu ju 1914 bamí, ye tábiri ʼwe etériame ju.

3. ¿Chonigá abé resítiri mochiru bochígimi gawichí napu chokilsa Onorúgame Gobiérnola?

Napu bajchibé Esusi gayénale Selígame Onorúgame Gobiérnola, nerule bilé najkóliame ʼpa rewagachi, ʼlige boʼné najkole alué Satanasi ʼlige alué uʼkuchípala remónisi. Satanasi weʼkáule, napu churigá aní alué Biblia, «ʼma pátuturu ʼpa rewagáchika ʼma gompaniérola ʼyúriga» (Apocalipsis 12:9, 10, 12). Satanasi ʼwe ayoga ajtí machiame pe ʼwe ʼma suwimela. Alekeri netea ʼwe chátiri bochígimi Gawichí. ¡Alekeri bochígime Gawichí resí nilia mochiru! Napu ju alué Onorúgame Gobiérnola suwibámala napu ju ye resí níliame.

ABÉ BENIBOA

4. Napu anile alué Biblia chu ikimela beniri napu ju 1914 ʼwe najtékame ju

VIDEO: Alué Onorúgame Gobiérnola chojkile nulá 1914 bamí (5:02)

Onorúgame netele napu alué Nabukoronosori anilime, bilé selígame ʼwe ʼya Babilonia, remule bilé tábiri napu ikimela pe aʼkinana. Ye remúriame ʼlige napu anile Ranieli beniri, ye raʼíchali simírale napu ju gobiérnola Nabukoronosori aʼlige simírimala napu ju alué Onorúgame Gobiérnola (leériwa Daniel 4:17).a

Leériwa Daniel 4:20-26. ʼLige unewa alué retrato apirigá nejewa alué rukéliame:

• A) ¿Tachiri remule Nabukoronosori? (Eʼnewa alué bersíkulo 20 ʼlige 21).

• B) ¿Chu ikile alué rojá? (Eʼnewa alué bersíkulo 23).

• C) ¿Chu ikimela napu ʼma simirsa «gichao tiempo»? (Eʼnewa alué bersíkulo 26).

Alué rojá remútiame ʼlige alué Onorúgame Gobiérnola

ALUÉ PROFECÍA (Daniel 4:20-36)

Alué gobiérnola

A) Bilé rojá reʼpá ilígame

Bilé gobiérnola bujériame

B) «Raunawa ye rojá» ʼlige aʼrewa napu ʼma simírimala «gichao tiempo»

Gobiérnola ujchéchigo iligá

C) «ʼMa ku nígame boʼné gobiérnola»

Bajchá simírame:

• D) ¿Chieri nile alué rojá? (Eʼnewa alué bersíkulo 22).

• E) ¿Chiéniko aʼrele nulá? (Leériwa Daniel 4:29-33).

• F) ¿Chu ikile napu bajchabé «gichao tiempo»? (Leériwa Daniel 4:34-36).

BAJCHÁ SIMÍRAME

Alué gobiérnola

D) Nabukoronosori, selígame alé Babilonia

Bilé gobiérnola bujériame

E) Nabukoronosori loʼí gayénale napu ju bajchibé alué bamí 606 a.e.c.b ʼlige tabilé umeba nulá gichao bamí

Gobiérnola ujchéchigo iligá

F) Nabukoronosori ʼya ʼma tabilé loʼí asale ʼlige chojkile che siné nulá

Osá simírame:

• G) ¿Chieri nile alué rojá? (Leériwa 1 Crónicas 29:23).

• H) ¿Chiéniko aʼrele nulá? ¿Churigá machirú tabilé nulagá apuʼlige Esusi asale Wijchimoba? (Leériwa Lucas 21:24).

• I) ¿Koche ʼlige chiéniko nulale napu ju ye gobiérnola?

OSÁ SIMÍRAME

Alué gobiérnola

G) Alué selígame israelita napu ju Onorúgame ilígame

Bilé gobiérnola bujériame

H) Rusaleni gajunárime nile alué 607 bamí a.e.c.; ʼma tabilé nulá selígame israelita napu ju 2.520 bamí

Gobiérnola ujchéchigo iligá

I) Esusi chojkile nulá ʼpa rewagachi napurigá Selígame alué Onorúgame Gobiérnola 1914 bamí

5. Alué 1914 bamí alué tábiri seʼwinátiri gayénale

Eʼnewa alué VIDEO.

VIDEO: Alué 1914 alué tábiri seʼwinátiri gayénale (1:10)

Esusi ʼya ʼma siné anile churigá nímala napu ʼma nulámala jena wijchimoba. Leériwa Lucas 21:9-11 ʼlige raʼichawa ye:

• Napu churigá aní alué Biblia, ¿tachiri eté mué aminami tachiri aké mué?

Alué apóstoli Páulo raʼíchale churigá nímala alué ralámuli nujubapi rawé kachi napu alué ralámuli nulachi. Leériwa 2 Timoteo 3:1-5 ʼlige raʼichawa ye:

• Napu aní ye texto, ¿tachiri tábiri ʼwe chátiri eté mué?

6. Machiá napu Onorúgame Gobiérnola ʼma nulagá ramué guʼiro apirigá olámala

Leériwa Mateo 24:3, 14 ʼlige raʼichawa ye:

• ¿Tachiri nóchali ʼwe nirágame etériame ju napu alué Onorúgame Gobiérnola ʼma nulá?

• ¿Churigá umeba nochámala mué ye nóchali?

Alué Onorúgame Gobiérnola ʼma nulagá, ʼlige pe ʼwe yati nulámala jena Wijchimoba. Leériwa Hebreos 10:24, 25 ʼlige raʼichawa ye:

• ¿Tachiri netémili suwábaga jipe «asíriga enátiri raweli sebámala»?

ABÉ NAJTÉKAME

Napu anile alué Biblia chu ikimela ʼlige napu jipe etériame ju beniri napu alué Onorúgame Gobiérnola ʼma nulá ajtí. ʼLige ramué etériame ju napu bijchigi napuʼlige predikáriga ʼlige simíriame ju alué napuwíliachi.

Api mué ʼma benile

• ¿Chu ikile bajchabé napu suwile alué gichao tiempo napu aní alué líburu napu Ranieli osale?

• ¿Chonigá aʼlá bijchiá mué napu alué Onorúgame Gobiérnola chojkile nulá 1914?

• ¿Churigá ʼma mué etériame ju aʼlá bijchiá napu alué Onorúgame Gobiérnola ʼma nulagá ajtí?

UCHÉ RAJPÉ ʼYÁAWA

Leériwa napu aní jaré ralámuli ʼwe machígame ju napu alué gawichí ʼwe seʼwinátiri ju napuʼlige bamí 1914.

«Alué bamí napu alué ralámuli ʼma tabilé niraga alué tábili aʼlá ju» (¡Despertad!, abril de 2007)

Eʼnewa churigá guʼírale bilé rió napu aní Mateo 24:14.

«Alué reʼí béisbol ʼwe niraga eteme nile ne» (La Atalaya, núm. 3 2017)

¿Churigá machiaru napu aní alué Biblia alé kapítulo  4 Daniel ruyeme ju alué Onorúgame Gobiérnola?

«¿Chiéniko chojkile nulá alué Onorúgame Gobiérnola? (Bajchá chojkena)» (La Atalaya, 1 de octubre de 2014)

Alué kapítulo 4 líburu Daniel raʼíchame ju alué «gichao tiempo», ¿tachiri ramué beniria napu ye tiempo suwile alué bamí 1914?

«¿Chiéniko chojkile nulá alué Onorúgame Gobiérnola? (Osá chojkena)» (La Atalaya, 1 de noviembre de 2014)