LECCIONI 43
¿Churigá etémala ju alué kristiano bajíriame alué wariente?
Bochígimi gawichí, alué ralámuli eteme ju seʼwinátiri bajíriame alué wariente. Jaré bajime ju iʼsínimi amígola ʼyuga. Jaré tabilé bajíname ju napu nígame arkoli. ʼLige jaré bajime ju ikí boʼíbika bitiá. ¿Tachiri aní alué Biblia napu ju bajíriame wariente?
1. ¿ʼWe chátiri ju bajiria arkoli?
Alué Biblia napu ju bajiria alué wariente tabilé ju ʼwe chátiri. Eligá, alué Onorúgame Raʼíchala aní napu «alué arkoli raʼsáláme ju sulachí alué rió» abiena ju bilé kóliame napu nejime ju Jeobá (Salmo 104:14, 15). Abiena, alué Biblia raʼíchame ju jaré rió ʼlige umugí napu eʼwame nile Onorúgame abiena bajime nile alué wariente (1 Timoteo 5:23).
2. ¿Tachiri rejcholi nejí alué Biblia alué ralámuli napu bajínale arkoli?
Jeobá sulime ju apirigá rekupua ʼlige apirigá ʼwe asíriga bajime ju arkoli (Gálatas 5:21). Alué Biblia aní: «Tabilé napuíwa alué ralámuli ʼyuga napu ju ʼwe bajime alué wariente» (Proverbios 23:20). Alekeri, ramué naʼtasa apirigá bajiwa wariente—ʼoni o ujché jaré si napuíka—, tajsiné ʼwe bajiwa napusí ʼma tabilé aʼlá ʼnátiga ʼlige netea weʼká eʼkarúgame ʼwe chátiri. Aminami tabilé ʼwe bajiwa apirigá cha olámala ramué saʼpchila ʼlige alarigá nayúkame niwa. Ramué tabilé gayeme nísaká peʼtá bajía, ʼliko tabilé bajiwa. napusí ʼma tábile aʼlá nátigaʼwe rasigá rikusa
3. ¿Churigá ʼwe niraga eteme ju ramué napu ujché jaré neténali?
Aʼpili ramué machí aʼlá bajínale alué wariente o tabilé bajínale. Tabilé cha anigá mochímala ramué napu ujché jaré bajínale alué wariente. Aminami tabilé anewa bajiwa tabilé bajínisa (Romanos 14:10). Napu ramué bajisa ʼlige ujché jaré tabilé ganíliga mochime ju ʼliko tabilé bajiwa (leériwa Romanos 14:21). Alué kristiano iligá ʼnátaga «uché jaré ralámuli guʼírilinti, tase pe boʼnepi guʼírilininti ʼnata asiboa» (leériwa 1 Corintios 10:23, 24).
ABÉ BENIBOA
Eʼnewa jaré bijchiá raʼíchali uchúkame Bíbliachi guʼírimala mué machiá aʼlá bajímala mué alué wariente o tabilé, ʼlige chiena waʼlú bajímala. Abiena eʼnewa napu chu iʼsímala mué aʼrénisa alué wariente.
4. Mué machí aʼlá bajímala o tabilé
¿Tachiri ʼnátame nile Esusi napu ju alué bajíriame arkoli? Apirigá machiboa alué nejériame, eʼnériwa bajchá tábiri ʼwe semátiri napu newale alué Onorúgame aʼwalílate. Leériwa Juan 2:1-11 ʼlige raʼichawa ye:
¿Tachiri beniri ramué ye raʼíchali churigá eteme ju Esusi napu ju alué wariente aminami napu bajime ju?
Esusi tabilé anile ʼwe chátiri ju apirigá bajiwa wariente, ʼliko ¿tachiri naʼtámala ju bilé kristiano napu bilé ralámuli bajime nísaká?
Rekó bilé kristiano aʼlá bajímala arkoli tabilé aniárime ju nabí aʼlá ju bajía. Leériwa Proverbios 22:3 ʼlige raʼichawa aʼlá nímala ju apirigá bajímala napuʼlige:
Mué manejárimala bilé troka o bilé makina.
Mué nisa bilé mukí rojpégame.
Alué saʼwame anisá mué tabilé bajímala arkoli.
ʼWe nóchali ju mué machiá chiena waʼlú bajímala.
Alué nuláriame tabilé lisensia nejí apirigá mué bajímala.
Asá uchechi bilé ʼyuga napu tabilé bajínale arkoli napugiti abé ʼya ʼwe bajime nile.
¿Aʼlá roʼámala nímala mué arkoli alé newíkame o uchechi bilé piesta? Apirigá machimela tachiri tábiri bajchá naʼtámala mué, eʼnewa alué VIDEO.
Leériwa Romanos 13:13 ʼlige 1 Corintios 10:31, 32. Napuʼlige ʼma leérisa aʼpili texto, raʼichawa ye:
¿Churigá guʼírimala mué ye bijchiá raʼíchali apirigá naʼtámala arigá mué raʼsálámala Jeobá?
Aʼpili kristiano machí aʼlá bajímala o tabilé. Iʼsínimi ʼla bajínale ʼlige iʼsínimi tabilé.
5. Mué machí chiena waʼlú bajímala
Mué ʼlá bajínasa arkoli bajchá naʼtawa, rekó Jeobá tabilé chátiri eteme ju bajíriame, sulime ju ʼwe asíriga bajíriame alué arkoli. ¿Chonigá? Leériwa Oseas 4:11, 18 ʼlige raʼichawa ye:
¿Tachiri simíriame napu bilé ralámuli ʼwe bajisa?
¿Tachiri nejkúrimala apirigá tabilé waʼlú bajímala? Machiboa koche si bajiwa. Leériwa Proverbios 11:2 ʼlige raʼichawa ye:
¿Chonigá ʼwe aʼlá ju apirigá mué naʼtawa koche si bajiwa?
6. ʼMa tabilé bajiwa arkoli
Machiboa tachiri netele bilé rió apirigá aʼrémala bajía. Eʼnewa alué VIDEO ʼlige raʼichawa ye:
¿Tachiri neteme nile alué Dimitri napu ʼwe bajisa nile?
¿Aʼrele bajía bajchá siné napu boʼné aʼrénali?
¿Chu ʼsile apirigá ʼma tabilé bajía?
Leériwa 1 Corintios 6:10, 11 ʼlige raʼichawa ye:
¿ʼWe enátiri ju rekútiwa? ¿Chonigá?
¿Churigá machiaru bilé ʼwe bajime arkoli gayéname ju seʼwinátiri?
Leériwa Mateo 5:30 ʼlige raʼichawa ye:
Esusi unele alué ejemplo apirigá repúniga bilé sekala arigá benírile ramé wériga nóchawa apirigá netewa napu Onorúgame aní. Mué aʼlá aʼrénisa bajime, ¿chu ʼsímala ju mué?a
Leériwa 1 Corintios 15:33 ʼlige raʼichawa ye:
¿Chu ikimela mué napu mué napuíme nisa jaré ralámuli si ʼwe bajime?
JARÉ RALÁMULI RUKÉ: «¿Chonigá ju ʼwe chátiri apirigá bajiwa?».
¿Chu animela mué?
ABÉ NAJTÉKAME
Jeobá nejile alué arkoli apirigá ramué ganílimala, nobi boʼné sulime ju apirigá rekupua, ʼlige apirigá ʼwe asíriga bajime ju arkoli.
Api mué ʼma benile
¿Tachiri aní alué Biblia napu ju alué arkoli bajíriame?
¿Chu ikime ju napu bilé ʼwe bajisa?
¿Churigá ʼwe niraga eteme ju ramué napu ujché jaré chu ʼsímala alué arkoli si?
UCHÉ RAJPÉ ʼYÁAWA
¿Tachiri naʼtámala ju bajchá alué ejtemali apirigá machimela aʼlá bajímala arkoli?
Beníriwa tachiri chu ʼsímala mué apirigá aʼrémala ʼwe bajía.
«Tachiri chu ʼsímala apirigá tabilé ʼwe bajímala arkoli» (La Atalaya, 1 de enero de 2010)
¿Aʼlá ju alué kristiano najchómala aʼnagupi alué baso wariente roʼáriga?
«Alué rukériame napu alué leériame» (La Atalaya, 15 de febrero de 2007)
Leériwa chiena bilé rió aʼrele bajía alué wariente alé tétaliame «Ne nile napurigá bilé bote ewágame tabilé bochígame».
«Alué Biblia guʼírile apirigá seʼwinátiri nile» (La Atalaya, 1 de mayo de 2012)
a Alué ralámuli napu ʼwe bajime arkoli najkimela nímala bilé nejkúrime. Weʼká saʼwame anime ju alué ralámuli napu ʼya ʼwe bajime nile arkoli ʼma tajsiné ku bajiwa alué arkoli.