LECCIONI 50
Churigá mué inímala rejimala raʼsálagá (2 chojkena)
Alué ʼkuchi ju alué kónali napu Jeobá nejí. Boʼné najkí napu alué oʼnola ʼwe aʼlá repúmala alué kónali. Alekeri Jeobá ʼyame ju rejcholi apirigá arigá netémala. Abiena ʼyame rejcholi alué ʼkúchila apirigá guʼírimala ʼwe raʼsálagá bejtewa.
1. ¿Tachiri rejcholi ʼyame ju Jeobá napu ju oʼnola?
Jeobá najkí apirigá alué oʼnola galémala aʼboi ʼkúchila ʼlige abé nochámala ju apirigá mochímala aʼboi ʼkúchila si. Abiena najkí repúmala aʼboi ʼkúchila apirigá tabilé resí níliga mochímala napu ju tábiri enátiri ʼlige benírimala ju unegá alué Biblia (Proverbios 1:8). Jeobá anime ju alué ʼkúchigame: «Abé ʼla ju beníriga napu Jeobá nejí rejcholi» (leériwa Efesios 6:4, TNM). Jeobá galeme ju alué oʼnola aʼlá nesérime aʼboi ʼkúchila eʼwagá boʼné rejcholi, ʼlige apirigá tabilé aʼreme uchechi bilé ralámuli nesérisa aʼboi ʼkúchila.
2. ¿Tachiri rejcholi ʼyame ju Jeobá napu ju ʼkúchila?
Jeobá tánime ju alué ʼkuchi: «ʼWe aʼlá eʼwélime júkuru ʼemi eyela ʼlige ʼemi oʼnólachigó» (leériwa Colosenses 3:20). Napu alué ʼkúchila eʼwame nisa ʼlige niraga etesa aʼboi oʼnola ʼwe raʼsálagá mochímala aʼboi ʼlige Jeobá abiena (Proverbios 23:22-25). Esusi nile bilé towí ʼwe aʼlá ʼsime nile, rekó tabilé eʼkágame nile, ʼla eʼwame nile ʼlige ʼla niraga eteme nile boʼné oʼnola napu eʼkágame nile (Lucas 2:51, 52).
3. ¿Churigá aʼbeka mochímala Jeobá si suwábaga rejimala?
Mué ʼkúchame nisa, najkí mué ʼkúchila galémala ju Jeobá, apirigá mué. ¿Churigá netémala mué? Netega napu aní alué Biblia: «Beníriwa [Jeobá raʼichálila] mué ʼkúchila napu mué ajtígachi mué bejtélachi, bowé eʼyénachi» (Deuteronomio 6:7). Apirigá beníriwa mué weʼsá kachi beníriwa bilé tábiri. Mué ʼla machí, apirigá mué ʼkúchila tabilé weʼkuámala bilé tábiri, iʼsínimi animela ju mué weʼsá. Ye raʼíchali aniárime ju weʼsá kachi bilé raweli ʼwe nochámala ju mué apirigá raʼichámala napu ju Jeobá mué ʼkúchila si. ʼWe aʼlá napu suwábaga rejimala wanápame ju peʼwera nabí tarali kachi apirigá benírimala alué Biblia napuíka. Mué tabilé ʼkúchame nisa abiena wanapa peʼwera apirigá beníriwa Onorúgame Raʼíchala nabí tarali kachi, ʼwe guʼírimala mué.
ABÉ BENIBOA
Beníriwa jaré rejcholi apirigá guʼírimala ʼeme rejimala ʼwe raʼsálagá mochímala ʼlige tabilé ikírimala ʼwe chátiri.
4. Beníriwa mué ʼkúchila galegá si
Beníriga mué ʼkúchila iʼsínimi ju ʼwe nóchali. ¿Churigá guʼírimala ju mué alué Biblia? Leériwa Santiago 1:19, 20 ʼlige raʼichawa ye:
¿Churigá etérime nímala napu galeme ju aʼboi ʼkúchila napu raʼíchiga aʼboi ʼkúchila si?
¿Chonigá alué oʼnola tabilé ʼyámala ju recholi aʼboi ʼkúchila napu ayoga asá?a
5. Repuwa ʼeme ʼkúchila
Apirigá repúmala ʼeme ʼkúchila ʼwe nirárime ju raʼicha aʼboi si napu ju alué nejtome rekó nóchali nisa. Eʼnewa alué VIDEO ʼlige raʼichawa ye:
¿Chonigá jaré ʼkúchigame ʼwe nóchali eteme ju raʼicha aʼboi ʼkúchila si napu ju nejtome?
¿Tachiri guʼírale jaré ʼkúchigame apirigá raʼichámala aʼboi ʼkúchila si napu ju alué nejtome?
Napu ʼwe ʼya ʼma anile, alué ralámuli napu ejperégame jena gawichí asíriga ʼwe chátiri ju jipe. Leériwa 2 Timoteo 3:1, 13 ʼlige raʼichawa ye:
Jaré ralámuli ʼwe chátiri napu raʼíchame ju alué bersíkulo 13 cha olame ju alué uʼkuchítiri. ʼLiko, ¿chonigá ʼwe najtékame ju alué oʼnola raʼichámala boʼné ʼkúchila napu ju alué nejtome?
¿Mué ʼma machime nile?
Testigo Jeobá neteme ju weʼká oselí apirigá alué ʼkúchame beniria aʼboi ʼkúchila alué nejtome apirigá repúmala alué ralámuli cha nokame. Eʼnewa:
Repuwa ʼemi ʼkúchila (video)
«Churigá raʼichámala mué ʼkúchila alué nejtome» (¡Despertad!, núm. 5 2016)
6. Nirawa mué oʼnola
Alué uʼkuchítiri ʼlige ejtemali nirame ju oʼnola churigá aʼlá raʼíchiga. Eʼnewa alué VIDEO ʼlige raʼichawa ye:
¿Chonigá ju ʼwe aʼlá napu bilé reʼmalí ʼwe niraga raʼichasa boʼné oʼnola si?
¿Churigá netémala bilé reʼmalí apirigá raʼichámala ʼwe niraga alué oʼnola si?
Leériwa Proverbios 1:8 ʼlige raʼichawa ye:
¿Chu ʼsímala ju bilé reʼmalí napu bilé oʼnola anisá napu chu ʼsímala ju?
7. Nirawa Jeobá alué rejimala si
Alué testigo Jeobá wanapa pe ʼwera nabí tarali apirigá nirawa Onorúgame alué rejimala si. ¿Churigá ju napu niraga Onorúgame alué rejimala si? Eʼnewa alué VIDEO ʼlige raʼichawa ye:
¿Tachiri guʼírimala api nabí tarali nirawa Onorúgame alué rejimala si?
¿Tachiri netémala alué oʼnola napu niraga Onorúgame alué rejimala si apirigá guʼírimala suwábaga ʼlige ʼwe raʼsálagá mochímala? (Eʼnewa bajchá retrato).
¿Chonigá iʼsínimi ju ʼwe nóchali beníriwa alué rejimala si?
ʼWe ʼya alué Israeli rawélachi, Jeobá tánime nile alué rejimala apirigá aʼkuepi raʼichámala alué Onorúgame Raʼíchala. Leériwa Deuteronomio 6:6, 7 ʼlige raʼichawa ye:
¿Churigá netémala ju ye?
Chu ʼsímala ju napu niraga Onorúgame alué rejimala si:
Beníriwa napu eʼnewa alé napuíkachi.
Leériwa ʼlige raʼichawa bilé raʼíchali alé Bíbliachi api galé alué rejimala.
Uʼkuchí ʼkúchame nisa, descargáriwa o ujchewa apélichi alé jw.org.
Ejtemali ʼkúchame nisa beníriwa bilé oselí apirigá ejtemali alé jw.org.
Netériwa mué ʼkúchila si tétali napu uchúkame alé Bíbliachi.
Eʼnewa ʼlige raʼichawa bilé video napu uchúkame alé jw.org.
JARÉ RALÁMULI ANÍ: «Alué Biblia ju ʼwe nóchali apirigá námala alué uʼkuchítiri».
¿Tachiri ʼnata mué?
ABÉ NAJTÉKAME
Jeobá najkí alué ʼkúchame ʼwe galeme, beníriwa ʼlige repuwa aʼboi ʼkúchila; najkí alué ʼkúchila nirámala ʼlige eʼwámala aʼboi oʼnola, ʼlige suwábaga rejimala nirámala boʼné.
Api mué ʼma benile
¿Churigá alué oʼnola aʼlá benírimala ju aʼboi ʼkúchila ʼlige repúmala?
¿Churigá etérime nímala alué ʼkúchila apirigá nirámala aʼboi oʼnola?
¿Chonigá ju ʼwe aʼlá apirigá wanapa peʼwera nabí tarali apirigá nirawa Onorúgame alué rejimala si?
UCHÉ RAJPÉ ʼYÁAWA
¿Tachiri tábiri guʼírimala mué ranala napu ʼma waʼlú nisa?
«Usani tábiri ʼwe najtékame beníriame ju alué ʼkúchila» (¡Despertad!, num. 2 2019)
Leériwa jaré rejcholi napu alué Biblia nejí napu repume ju alué oʼnola ʼma oʼchérame.
«¿Najkí Onorúgame napurigá repuwa alué oʼnola napurigá oʼchérame nisa?» (Artículo de jw.org)
Eʼnewa churigá bilé rió tabilé machime nile churigá repúmala nile boʼné ʼkúchila, gayénale ʼwe aʼlá oʼnó.
Beníriwa churigá nímala abé aʼbeka asimela oʼnola boʼné ʼkúchila si.
a Alé Bíbliachi alué raʼíchali «disciplina» yoli raʼíchiga, aniárime ju beniria rejcholi ʼyaga apirigá guʼírimala aʼlá naʼtámala. Tabilé aniárime ju resí olagá (Proverbios 4:1).