LECCIONI 53

Raʼsáláwa Jeobá napu mué eʼneme ju ʼlige reʼí

Edición impresa

Jeoba ju «Onorúgame ʼwe raʼsáláme» (1 Timoteo 1:11, TNM). Boʼné abiena najkí apirigá ramué niwa ʼwe raʼsáláme, apirigá raʼsálagá bejtewa. Boʼné ajtí ʼwe raʼsálagá ramué wanápasa pe ʼwera apirigá ganíliga resipua alué nóchali. Jena leccioni eʼnériame niwa churigá unewa alué pe ʼwera apirigá ramué reʼeme nímala napu churigá nulá Jeobá.

1. ¿Tachiri naʼtawa bajchá taʼchó etega ʼlige reʼekia?

¿Tachiri ʼwe galeme ju mué netea? Jaré ralámuli galeme ju rejpí aʼboi galílachi léeriga bilé líburu, wikali akigá, eʼnegá bilé pelíkula o eʼkarúgame eʼnegá alé internetchi. Ujché jaré galeme ju netea tábiri eʼkarúgame aʼboi amígola si napurigá pasiáriga, baʼwí oʼwichika o reʼéniga. Apiépiri tábiri napu ramué galeme ju netea, ʼwe najtékame ju apirigá ʼla beniboa tachiri «galeme ko Onorúgame» (Efesios 5:10). ʼWe najtékame naume ju ye napugiti weʼká ralámuli galeme ju reʼekia etega, akigá ʼlige netega tábiri napu Jeobá gichime ju, napu ju najkoga, alué nejtome tabilé ʼla eteme ju Jeobá ʼlige sujkurúliame (leériwa Salmo 11:5). ¿Tachiri guʼírimala apirigá ramué ʼwe aʼlá naʼtawa?

Napu ramué ʼyáasa amígola galeme Jeobá ʼwe aʼla guʼírimala ju ramué, napu tachiri reʼémala ju ramué. Napu ʼma benirú alé leccioni 48, «alué napu eʼyéname ju ralámuli ʼwe machime ʼnátaga ʼyuga, alueka ʼwe aʼlá machime nímala», ʼliko alué napu napuígasa bilé ralamuli tabilé galeme Jeobá, «alueka tabilé machime nímala» (Proverbios 13:20).

2. ¿Chonigá ʼwe najtékame ju apirigá unewa alué raweli?

Rekó alué reʼí nisa ʼwe aʼlá, tabilé weʼká ʼora asiboa alé. Alarigá nisa ʼliko tabilé nígame nímala raweli apirigá netewa tábiri abé najtékame. Alué Biblia ramué oilárime ju apirigá «ʼwe aʼlá unewa raweli» (leériwa Efesios 5:15, 16, TNM).

ABÉ BENIBOA

Eʼnewa tachiri chu ʼsímala ju mué apirigá mué ʼwe aʼlá eʼnémala ju reʼí

3. ʼWe ʼla repuwa napu ju reʼí chátiri

¿Chonigá ʼwe aʼlá ʼyáawa napu ramué unémala nímala? Eʼnewa alué VIDEO ʼlige raʼichawa ye:

VIDEO: ¿Tachiri reʼémala ju ne? (4:39)

¿Churigá nile napu ju alué reʼí nijrápame ʼwe ʼya alé Roma, jaré tábiri abalieri ju jipe raweli?
Alé vidéochi, ¿tachiri benírile alué Danny napu ju alué reʼí?

Leériwa Romanos 12:9 ʼlige raʼichawa ye:

¿Churigá guʼíriga ramué ye bersíkulo apirigá ʼyáawa ʼwe aʼlá reʼí?

¿Tachiri ju jaré tábiri napu Jeobá gichime ju? Leériwa Proverbios 6:16, 17 ʼlige Gálatas 5:19-21. Napu ʼma leérisa ye bersíkulo, ʼliko raʼichawa ye:

Napu anime ju ye bersíkulo, ¿tachiri tábiri ʼwe etériame ju jipe raweli?

¿Churigá ʼwe aʼlá chaʼpiboa napu mué reʼémala?

Rukewa mué boʼné:

¿Tachiri ju? ¿Ju napu Jeoba gichime?
¿Chiéniko? ¿Nerú ujché jaré tábiri abé najtékame apirigá netewa meʼtigá alué?
¿Chieri si? ¿Ajtime ju ne ralámuli si napu tabilé galeme ju Jeobá?

Apirigá ramué ripupua, mejkaka jawa napu ju alué tábiri ʼwe enátiri. Alekeri tabilé aʼbeka mochiwa alué reʼí napu tabilé ʼwe aʼlá ju apirigá tabilé cha olámala ramué.

Bilé troka simigá bilena rekoata. Suwana kachi ʼma wijchiá chujkú.

4. ʼWe aʼlá unewa alué raweli

Eʼnewa alué VIDEO, ʼlige raʼichawa ye:

VIDEO: ¿Tachirchi simírame ju mué raweli? (2:45)

Alé vidéochi, alué ermano tabilé eʼnegá asale tábiri ʼwe chátiri, ¿rekó churigá unegá asale alué raweli?

Leériwa Filipenses 1:10, TNM, ʼlige raʼichawa ye:

¿Churigá guʼiri ye bersíkulo apirigá ʼwe aʼlá unewa ramué raweli?

5. ʼYáawa reʼí napu ju ʼwe aʼlá

Rekó jaré reʼí tabilé galeme ju Jeobá, ʼla nerú ʼwe aʼlá reʼí ʼlige ramué ʼla raʼsáláme nímala alué, napu galeme ju boʼné. Leériwa Eclesiastés 8:15 ʼlige Filipenses 4:8, TNM, ʼlige raʼichawa ye:

¿Tachiri reʼí ʼwe raʼsáláme ju mué?

Weʼká retrato: Ralámuli seʼwinátiri bamígame ju reʼegá mochí: 1. BIlé tewé akea wikali ʼlige netea bilé dibujo. 2. Baikiá ejtemali reʼeka pelota. 3. Oká towí eʼyena bilena bisicleta. 4. Bilé towí neteme ju bilé toroka napu ju reʼéliame. 5. Bilé rió gitué bilé tambor. 6. BIlé towí reʼéme ju bilé bideojuego boʼné oʼnola si. 7. Bilé mukí retrato maʼchipaka ilí. — Ramué umeba ʼwe aʼlá reʼega weʼkaná neraga ʼlige ʼwe kilí mochiga.

JARÉ RALÁMULI ANÍ: «Tabilé ju ʼwe chátiri alué reʼí napu uchúkame ju napu ju najkoga, alué nejtome ʼlige sujkurúliame rekó napu tabilé netega alué tábiri».