LECCIONI 39
¿Churigá Jeobá eteme ju alué elá?
Alué elá ju ʼwe najtékame. Ta ʼwesi ralámuli bejtégame nímala elá gite. Onorúgame netele ramué, alekeri boʼné aní churigá unewa alué elá. ¿Chu aní boʼné napu ju alué elá? ¿Aʼlá ju apirigá goʼpoa alué elá o ejchériga mué saʼpchílachi? ¿Tachiri guʼírimala mué apirigá ʼwe aʼlá machimela napu chu ʼsímala?
1. ¿Churigá Jeobá eteme ju alué elá?
Napu alué Biblia oserúgame nile, Jeobá anele boʼné oyérame: «Suwábaga saʼpá ajalílaka alué elá ju» (Levítico 17:14). Jeobá eteme ju alué elá aʼchigóriga napu ju alué ajáliame. Alué ajáliame ju bilé kóliame napu Onorúgame nejí ʼlige ʼwe nirárime ju, alekeri alué elá abiena ʼwe nirárime ju.
2. ¿Onorúgame sulí churigá unewa elá?
ʼWe ʼya napu taʼchó netega alué kongregación kristiana, Jeobá nulele boʼné oyérame tabilé goʼpoa alué elá (leériwa Génesis 9:4 ʼlige Levítico 17:10). ʼLige, napu ʼma nerúgachi alué kongregación kristiana, Jeobá uché siné nulele ye. Alué napu aʼlá neseme —jaré apóstoli ʼlige ermano ʼwe machime napu oʼtome nile alué kongregación—anile ye rejcholi alué Esusi oyérame: «Alué elá tabilé goʼpóachigó [o tabilé unewa]» (leériwa Hechos 15:28, 29).
¿Chu aniame ju tabilé unewa alué elá? Bilé saʼwame anisá tabilé unewa wariente, mué tabilé bajímeli ko, ¿aʼlá bijchiá? Nobi ¿mué ʼwe aʼlá goʼmela goʼame wariente ʼyuga o mué ʼwe aʼlá ejchémara mué saʼpchila? Tabilé arigá nímala. Alieri ju apirigá tabilé unewa alué elá. Eʼwagá Onorúgame aniame ju tabilé goʼgá nibilé bají elá aminami alué saʼpá tabilé maʼchí pátigime elalá, tabilé goʼpóachigó. Tabiléchigo goʼpoa goʼame napu nígame nisa elá.
¿ʼLige chu ʼsímala napu unésaká alué elá napu niraga bilé yowí? Jaré napu unériame ju apirigá ʼyómala tabilé galeme ju Onorúgame, napurigá alué ejchériga elá, o ejchériga weʼkaná chojkena elá: glóbulo rojo, glóbulo blanco, plaqueta ʼlige plasma. Nobi, iʼsínimi jaré yowí ju tabilé machiárime ju ʼwe aʼlá napu aʼlá eté Onorúgame. Bilé ejemplo, jaré napu unériame ju apirigá ʼyómala uneme ju abé kuchípala naó chojkena elá. ʼLige jaré uneme ju alué elá napu nígame ju alué nayume. Bajchibé ʼma naʼtasa weʼkaná neraga nerú yowí, aʼpili ralámuli machí napu chu ʼsímala (Gálatas 6:5).a
ABÉ BENIBOA
Eʼnewa tachiri naʼtawa napuʼlige ta’chó narekia napu unériame ju apirigá ʼyómala.
3. ʼWe aʼlá naʼtawa ʼlige netewa napu Jeobá galeme ju
¿Churigá ʼwe aʼlá naʼtawa ʼla niraga napu Jeobá eteme ju alué elá? Eʼnewa alué VIDEO ʼlige raʼichawa chonigá ʼwe najtékame ju napurigá netewa napu animela alé:
Tániwa nejkuri oracioni netega (Santiago 1:5).
ʼYáawa napu anime ju alué Biblia ʼlige naʼtawa churigá eʼwámala mué napu anime ju alé (Proverbios 13:16).
Rukewa chu ʼsime ju alué saʼwame koche mué bejtégame ju churigá ʼyome ju.
Naʼtawa tachiri tábiri tajsiné narémala mué.
Iwériga nochawa apirigá aʼlá naʼtawa apirigá kilí asiboa (Hechos 24:16).b
Nelawa, ta ʼwesi—nibilé mué gunala, mué upila, bajchá jágame alé kongregación nibilé mué benírame alué Bíbliaka—tabilé animela napu chu ʼsímala mué, napu aʼpílipi naʼtámala chu ʼsímala ju (Romanos 14:12).
Osawa napu mué neténali.
4. Alué testigo Jeobá ʼyáame ju ʼwe aʼlá ʼyome
Eʼwawa napu anime ju Onorúgame napu elá tabilé aniame ju napu tabilé ʼyowa napu ju ʼwe aʼlá. Eʼnewa alué VIDEO.
Leériwa Tito 3:2 ʼlige raʼichawa ye:
¿Chonigá ʼwe kilí raʼichawa ʼlige ʼla niraga etega alué saʼwame ʼyuga?
Tabilé narékiame ju |
Aʼpílipi ʼnátame ju |
|---|---|
A. Plasma |
Abé kuchípala chojkena alué plasma |
B. Glóbulo blanco |
Abé kuchípala chojkena alué glóbulo blanco |
C. Plaqueta |
Abé kuchípala chojkena alué plaqueta |
D. Glóbulo rojo |
Abé kuchípala chojkena alué glóbulo rojo |
5. Abé kuchípala naó chojkena elá
Alué elá nígame ju naó chojkena: glóbulo rojo, glóbulo blanco, plaqueta ʼlige plasma. ʼLige aʼpílipi naó chojkena nígame ju weʼká abé kuchípala chojkena, machirume ju «fracción sanguínea» napu ju yolí raʼíchiga.c Jaré ye abé kuchípala naó chojkena elá unériame ju napurigá yowí apirigá ʼyómala jaré naulí ʼlige napu elá maʼchínachi.
Aʼpílipi kristiano naʼtámala ju ʼla unémala abé kuchípala naó chojkena elá, aminami eʼwagá napu aní alué Biblia apirigá kilí asimela Onorúgame ʼyuga. Kérémá jaré kristiano tabilé unénali alué yowí nibilé napu unériame ju apirigá ʼyómala api uneme ju abé kuchípala naó chojkena elá. Kerékó ujché jaré ʼla uneme ju.
Napu taʼchó ʼnátiga, naʼtawa aminami mué boʼné rukewa:
¿Churigá raʼichámala mué alué saʼwame si chonigá tabilé unémala o chonigá ʼla unémala abé kuchípala naó chojkena elá?
JARÉ RALÁMULI RUKÉ: «Alué elá nejkúrime ju apirigá ajágame mochiwa, ʼliko ¿chonigá ju ʼwe chátiri ejchériga elá ramué saʼpchílachi?».
¿Tachiri ʼnata mué?
ABÉ NAJTÉKAME
Jeobá tabilé najkí apirigá ramué cha olawa alué elá.
Api mué ʼma benile
¿Chonigá Jeobá ʼwe niraga eteme ju alué elá?
¿Chonigá machiaru napu nulame ju Onorúgame tabilé unewa elá abiena ju napurigá tabilé unewa ejchériga ramué saʼpchílachi?
¿Tachiri guʼírimala mué apirigá ʼwe aʼlá naʼtámala aʼlá unémala alué elá apirigá bilé yowí?
UCHÉ RAJPÉ ʼYÁAWA
Napu taʼchó ʼnátiga unésaká mué bo’né elá apirigá ʼyómala mué, ¿tachiri tábiri mué bajchá machimela?
«Alué rukériame napu alué leériame» (La Atalaya, 15 de octubre de 2000)
Napu taʼchó ʼnátiga mué unésaká alué yowí inígame abé kuchípala naó chojkena elá, ¿tachiri benírimala mué?
«Alué rukériame napu alué leériame» (La Atalaya, 15 de junio de 2004)
¿Chonigá ʼla bijchile bilé saʼwame napu anime ju Jeobá alué elá ʼwe aʼlá ju?
«Jipe eteme ju ne alué elá napu churigá Jeobá eteme ju» (¡Despertad!, 8 de diciembre de 2003)
Eʼnewa churigá alué bajchá jágame napu nóchame ju alé Komité Enlace alué Ospital ʼyuga guʼírame ju alué ermano.
a Eʼnewa alué leccioni 35, «¿Tachiri netewa apirigá ʼwe aʼlá naʼtawa?».
b Eʼnewa napu aní 5, «Abé kuchípala naó chojkena elá», ʼlige napu aní 3, «Napu unériame ju apirigá ʼyómala unegá elá».
c Jaré saʼwame eteme ju napurigá abé kuchípala alué naó chojkena elá. Alekeri, mué raʼichámala chonigá tabilé nareme ju ejchériga alué elá, nibilé ejchériga glóbulo rojo, glóbulo blanco, plaqueta o plasma.