LECCIONI 42
¿Tachiri aní alué Biblia napu ju tabilé newíkame ʼlige newíkame?
Jarena kachi, alué ralámuli ʼnátame ju apirigá ʼwe raʼsálagá bejtériwa newika mochiwa. Nobi, tabilé suwábaga newíkame ʼwe raʼsálagá ju nibilé suwábaga tabilé newíkame ju tabilé resí níliga mochígame ju. Alué Biblia aní napu ju tabilé newíkame ʼlige newíkame bilé kóliame ju.
1. ¿Tachiri tábiri ʼwe aʼlá nerú alué tabilé newíkame?
Alué Biblia aní: «Aʼlá ju rekó bilé rió mukí rewae nobi abéchigo aʼlá jukó tabilé rewae» (leériwa 1 Corintios 7:32, 33, 38). ¿Chu aniame ju bilé ralámuli «abéchigo aʼlá jukó» tabilé rewinálime? Alué kristiano tabilé newíkame tabilé weʼká ʼnátaga ajtí napu ʼnátame ju bilé newíkame. ʼLiko, alué tabilé newíkame abé ikírame ju meʼtigá alué newíkame. Jaré gayéname ju simiá ujché jarena apirigá predicárimala aʼlá raʼíchali. ʼLige alué tabilé newíkame ju aʼboi gayéname ju wanapa pe ʼwera apirigá aʼbeka mochímala Jeobá si.
2. ¿Tachiri tábiri ʼwe aʼlá nerú alué ʼla newíkame ju?
Alué newíkame abiena tábiri ʼwe aʼlá nerú. Alué Biblia aní napu «ju ʼwe aʼlá oká meʼtigá biʼlepi» (Eclesiastés 4:9). Ye ju alarigá napu ju alué newíkame napu eʼwame ju alué ʼla bijchiá raʼíchali uchúkame alé Bíbliachi. Alué ralámuli newíkame napu firmárile bilé apeli, aʼboi ʼma anile nabí aʼnagupi galegá etémala, aminami ʼla nirámala ʼlige repúmala aʼbópika. Alekeri aʼboi abé kilí mochí meʼtigá alué ralámuli napuíka mochígame tabilé newika. Napu alué newíkame ju, oʼchérame ju alué ʼkúchila bilena koche mochí ʼwe aʼlá.
3. ¿Tachiri ʼnata Jeobá napu ju alué newíkame?
Napu Jeobá newale bajchá newíkame, anile: «bilé rió ʼma aʼrémili ko boʼné oʼnola ʼlige boʼné eyela» ʼlige «arigá napuíka mochímala aʼboi» (Génesis 2:24). Jeobá najkí alué gunala ʼlige alué upila apirigá ʼwe galegá napuíka mochímala napu ajagá mochí. Pe lisensia nejime apirigá ku rojonáriwa niwa aʼboi newíkame gojsá napu tabilé boʼné gunala o boʼné upila si. Napu arigá nisa, Onorúgame pe lisensia nejí alué gunala o alué upila tabilé chojkila ju, ku rojanámala arigá najkisá aʼboi (Mateo 19:9).a Jeobá pe lisensia nejí apirigá alué kristiano pe nígame nímala biʼlepi upila o biʼlepi gunala (1 Timoteo 3:2).
ABÉ BENIBOA
Beníriwa tachiri chu ʼsímala mué—tabilé newíkame o newíkame ju—apirigá raʼsálagá asimela mué ʼlige apirigá raʼsáláwa Jeobá.
4. ʼWe aʼlá unewa alué kóliame tabilé newika asagá
Esusi eteme nile alué tabilé newíkame napurigá bilé kóliame (Mateo 19:11, 12). Leériwa Mateo 4:23 ʼlige raʼichawa ye:
¿Churigá Esusi unele tabilé newika asagá apirigá nochámala boʼné Oʼnola si ʼlige guʼíriga ujché jaré?
Alué kristiano tabilé newíkame ju raʼsálagá mochímala ʼla unesa napu ju ʼoni mochiga tabilé newika, napurigá ʼsile Esusi. Eʼnewa alué VIDEO ʼlige raʼichawa ye:
¿Churigá unémala ʼwe aʼlá alué kristiano napu ʼoni mochígame tabilé newíkame?
¿Mué ʼma machime nile?
Alué Biblia tabilé aní chekí bamígame niwa apirigá newipua. Pe aní apirigá buwewa napusí «ʼma eʼwele nisa», arigá yaʼmá tabilé aʼwágame nímala apirigá nejtome neténali arigá ʼma naʼtámala nímala ʼwe aʼlá (1 Corintios 7:36).
5. ʼWe ʼla naʼtawa chieri si newímala mué
ʼWe ʼla naʼtawa chieri si newímala mué, ye ju ʼwe najtékame. Leériwa Mateo 19:4-6, 9 ʼlige raʼichawa ye:
¿Chonigá alué kristiano ʼwe ʼla naʼtámala taʼchó newika?
Alué Biblia guʼírimala mué apirigá machimela tachiri ʼwe aʼlá tábiri nígame nímala alué gunala ʼlige upila ʼwe aʼlá. Abé najtékame ju, ʼyáawa bilé ʼwe galeme ju Jeobá.b Leériwa 1 Corintios 7:39 ʼlige 2 Corintios 6:14. ʼLige raʼichawa ye:
Bilé ʼla bijchiá kristiano rewinálisaká, ¿chonigá ʼyáamala bilé napu bijchígame nímala napu alué bijchígame ju?
Newisa bilé ralámuli si tabilé galeme alué Jeobá, ¿chu nílimala alué?
Oká ajágame seʼwinátiri ujchusa ʼlige ujchesa alué mosogola, okánika resí níliga mochime ju. Abalieri alué kristiano newisa bilé si tabilé galeme Jeobá ʼwe resí níliga mochímala.
6. Eʼnewa alué newíkame napu churigá eteme ju Jeobá
ʼWe ʼya alé Israeli anilichi, jaré rió ku rojáname nile pe apiépiri tábiri gite. Leériwa Malaquías 2:13, 14, 16 ʼlige raʼichawa ye:
¿Chonigá Jeobá gichime ju napuʼlige bilé ku rojanárisa rekó tabilé lisensia nejí alué Biblia?
Napu alué neteme ralámuli gojsá chechi bilé ralámuli si tabilé gunala o tabilé upila si ʼlige ku rojanárisa ʼwe resí níliga mochime ju alué gunala o upila tabilé chojkila ju aminami alué ʼkúchila.
Eʼnewa alué VIDEO ʼlige raʼichawa ye:
Mué newíkame asisáká bilé si tabilé galeme Jeobá, ¿chu ʼsímala ju mué apirigá ʼwe raʼsálagá mochímala ʼeme okánika?
7. Eʼwawa napu Jeobá aní churigá nímala alué newíkame
Jaré níliame ju ʼwe nóchali eʼwá napu aní Jeobá churigá nímala alué newíkame.c Boʼné guʼírame ju alué napu ʼwe iwériga nóchame ju napu netea ye. Eʼnewa alué VIDEO.
Leériwa Hebreos 13:4 ʼlige raʼichawa ye:
¿Mué mayé napu Jeobá tánime ju alué newíkame aʼlá ju? ¿Chonigá alarigá ʼnata mué?
Jeobá najkí alué kristiano firmárimala bilé apeli napuʼlige newisa ʼlige ku rojárisa, ye ju napu alué gobierno tánime amulí suwábaga gawichí. Leériwa Tito 3:1 ʼlige raʼichawa ye:
Mué newíkame nisa, ¿mué bilé apeli ʼma firmárile napu nulame ju alué gobierno?
JARÉ RALÁMULI RUKÉ: «¿Chonigá firmárowa bilé apeli? ¿Aʼlá bijchiá najkiárime ju bilé apeli?».
¿Tachiri nejémala mué?
ABÉ NAJTÉKAME
Alué tabilé newíkame ʼlige newíkame ju bilé kóliame napu Jeobá nejime. Napu tabilé newíkame ju ʼlige alué newíkame ju aʼlá bejtéliwa ʼwe raʼsálagá aʼlá netésaká ye tábiri napurigá Jeobá najkí.
Api mué ʼma benile
¿Churigá unémala ʼwe aʼlá alué ralámuli napu ʼoni mochígame tabilé newíkame?
¿Chonigá aní alué Biblia alué kristiano pe rewimela ju bilé si napu bijchígame nímala napu alué bijchígame ju?
Napurigá aní alué Biblia, ¿chieri nímala pe biʼlepi tábiri nerú aʼlá najtékame apirigá ku rojanárimala?
UCHÉ RAJPÉ ʼYÁAWA
¿Tachiri aniárime ju apirigá newika alé pe «rió Onorúgame oyérame nímili júkuru» si?
«Alué rukériame napu alué leériame» (La Atalaya, 1 de julio de 2004)
Machiboa oká tétali napu raʼíchame ju napu ju taʼchó newíkame ʼlige ʼma newíkame apirigá guʼírimala mué apirigá ʼwe aʼlá naʼtámala.
Chu ʼsímala mué bajchá apirigá ʼwe aʼlá simírimala napu ʼma newisa (11:53)
Eʼnewa chonigá bilé ermano ʼla machí ajtí napu Jeobá nejile bilé tábiri ʼwe aʼlá meʼtigá napu ʼma aʼrele.
Bajchá taʼchó ʼnátiga ku rojanárime o waná mochíniga, ¿tachiri naʼtámala bajchá alué kristiano?
«ʼWe ʼla niraga etewa napu ‘Onorúgame napubule’» (La Atalaya, diciembre de 2018)
a Alé jena aní 4 mué rewimela raʼíchali napu ju wanapa mochígame (napu tabilé gojsá napu tabilé boʼné gunala o boʼné upila si).
b Jarena kachi, napu ju alué oʼnola ʼyáame ju chieri si rewimela alué inolá o alué malala. Napu ye simirsa, napu ju ʼwe aʼlá oʼnola bajchá ʼwe ʼla eʼneme ju alué ralámuli aʼlá galeme ju Jeobá. Aʼboi abé najtékame eteme ju ye meʼtigá enomígame nisa.
c Mué napuíka asá bilé si tabilé newika, mué naʼtámala napu chu ʼsímala, newímala mué o aʼrémala mué.