¿Galeme ju Onorúgame suwábaga napu ju alué piesta?

Jeobá najkí apirigá ramué ʼwe raʼsálagá napu bejtérime ju abiena najkí apirigá newawa bilé piesta iʼsínimi. ¿Galeme ju Onorúgame suwábaga alué piesta ʼlige alué omáwari? ¿Churigá etérime nímala ramué aʼlá galeme ju Onorúgame ʼlige ʼwe ʼla niraga eteme ju ramué napu boʼné chu níliame ju?

1. ¿Chonigá Jeobá tabilé galeme ju jaré piesta?

Machimela mué weʼká piesta nawágame ju bilena relijioni tabilé bijchiá ju o bijchígame ju napu tabilé beníriame alué Biblia. Abiena, jaré piesta naʼólame ju napu ju alué sujkurúgume o beníriame ju api alawálila tajsiné mukume ju. Abiena, jaré piesta chojkile aʼboi mayega bilé tábiri enátiri simírimala o beníriame ju yaʼmá mué narémala nile alué tábiri (Isaías 65:11). Alekeri Jeobá aneme ju boʼné oyérame: «Buyásiwa [...]. Tabilé oyérawa alué chátiri ʼnátili» (2 Corintios 6:17).a

2. ¿Churigá eté Jeobá alué omáwari napu alué ralámuli ʼwe niraga etesa chechi bilé ralámuli?

Jeobá ramué aní tabilé niwa napurigá alué ralámuli napu «pe bijchígame ju alué ralámuli», ye bilé trampa ju (leériwa Jeremías 17:5). Jaré piesta newárime ju apirigá nirawa alué eʼsélikame o jaré sontalo. Jaré piesta netériame ju apirigá nirámala alué símbolo o alué independensia alué país (1 Juan 5:21). Abiena nerú piesta apirigá nirámala napu ju jaré organisasión polítika o sosial. Napu ramué ʼwe niraga etéasa bilé ralámuli o bilé organisasión —ʼlige aʼboi beníriame ju napu Onorúgame tabilé najkime ju—, ¿chu mayé mué napu chu níliame ju boʼné?

3. ¿Tachiri tábiri napu netériame ju alé piesta tabilé ʼla eteme ju Jeobá?

Alué Biblia sulime ju napu «ʼwe rasigá bajime wariente», alué «piesta napu netériame ju ʼwe chátiri» ʼlige alué «piesta apirigá bajiwa» (1 Pedro 4:3, TNM). Jaré piesta, weʼká eʼkarúgame tábiri chátiri neteme ju alué ralámuli ʼwe rekusa. Ramué najkiárime nisa apirigá niwa amígola Jeobá si, ʼliko niwa ramué ʼwe mejká aʼrewa napu ju alué ʼwe chátiri.

ABÉ BENIBOA

4. Tabilé omawa bilé piesta tabilé ʼla nirame ju Jeobá

Leériwa Efesios 5:10 ʼlige raʼichawa ye:

• ¿Tachiri beniboa apirigá machiboa aʼlá omawa alué piesta o tabilé?

• ¿Tachiri piesta omame ju napu mué bejtégame ju?

• ¿Mué mayé Jeobá aʼlá eté?

Ejemplo, ¿iʼsínimi rukériame ju mué boʼné tachiri nátame ju Onorúgame alué bamíliame? Ta ʼwesi asemi anime ju Bíbliachika bilé Onorúgame oyérame bamíliame olámala, nobi alué Biblia aʼlá raʼíchame ju oká ralámuli tabilé nirame nile Onorúgame netele piesta napu alué bamígachi. Leériwa Génesis 40:20-22 ʼlige Mateo 14:6-10. ʼLige raʼichawa ye:

• ¿Tachiri ikírale napu aʼlige aʼboi bamígachi?

• Jipe napu ʼma leérisa ye raʼíchali, ¿tachiri ʼnata mué churigá eté Jeobá alué bamíliame?

Rekó mué machisá ye, kerékó mué boʼnepi ruké «¿Aʼlá bijchiá eté Jeobá ʼla niraga napu ne netéasa bilé piesta napu ju bamíliame o simisáká bilé piesta api alué Biblia tabilé  ʼla eteme ju?». Leériwa Éxodo 32:1-8. ʼLige eʼnewa alué VIDEO ʼlige raʼichawa ye:

VIDEO: Alué piesta ʼlige omáwari napu tabilé galeme ju Onorúgame (5:07)

• ¿Chonigá beniboa tachiri galeme ju Jeobá?

• ¿Churigá netewa alué?

Churigá machiboa aʼlá Onorúgame ʼla etésaká bilé omáwari

• ¿Beniri napu alué Biblia tabilé ʼla eteme ju? Apirigá machimela, ʼyáawa churigá chojkile alué piesta.

• ¿ʼWe asíriga niraga eté alué ralámuli, jaré organisasión o alué símbolo alué país? Ramué ʼwe ʼla niraga eteme ju Jeobá meʼtigá ujché jaré tábiri ʼlige ramué bijchígame júkuru boʼné gatémala ju alué tábiri chátiri napu nerú jena gawichí.

• ¿Alué tábiri napu netériame ju alé piesta tabilé galeme ju Jeobá? Ramué biʼígame niwa napu neteme ju.

5. Guʼíriwa ujché jaré apirigá aʼboi námala ʼlige nirámala napu mué bijchígame

VIDEO: ’We a’lá niraga ra’ichawa napu ramué bijchígame ju (2:01)

Leériwa Mateo 7:12 ʼlige raʼichawa ye:

• Napu aní ye bersíkulo, ¿mué ra’ichámala mué rejimala si anigá tabilé omawa bilé piesta napu bo’né tabilé bijchígame ju napu mué bijchígame ju?

• ¿Churigá etériame nímala api mué ʼla niraga eteme mué rejimala ʼlige ʼwe galeme ju aʼboi rekó mué tabilé omame ju alué si jaré piesta?

6. Jeobá najkí api ramué ʼwe raʼsálagá niwa

Jeobá galeme ju ramué ganíliga mochiwa ramué rejimala ʼlige ramué amígola si. Leériwa Eclesiastés 8:15 ʼlige raʼichawa ye:

• ¿Churigá beniri ye bersíkulo api Jeobá najkí ramué ʼwe raʼsálagá niwa?

Abiena Jeobá najkí boʼné oyérame ʼwe reʼégame niwa ʼlige ʼwe ganíliga a’bopi napuíka mochiga. Eʼnewa alué VIDEO apirigá ʼwe aʼlá machimela mué alarigá eʼnériame ju alé waʼlú napuwílime internacional.

VIDEO: ʼLa kógiga aʼnagupi alé waʼlú napuwílime internacional (5:40)

Leériwa Gálatas 6:10 ʼlige raʼichawa ye:

• ¿Aʼlá najkiárime ju apirigá netewa jaré piesta apirigá aʼlá guʼíriwa ujché jaré?

• ¿Tachiri kónali najkí mué ʼya: ʼyámala rekó tabilé najkígachi, o ʼyámala mué ʼwe raʼsálagá napu maʼchíniga mué sulachí?

• Weʼká Testigo iʼsínimi neteme ju bilé tábiri ʼwe semátiri apirigá aʼboi ʼkúchila ʼlige kónime ju. Mué ʼkúchigame nisa, ¿tachiri tábiri ʼwe semátiri netémala mué aʼboi neraga?

ABÉ NAJTÉKAME

Jeobá najkí apirigá ramué ganíliga mochiwa ramué rejimala ʼlige ramué amígola si, nobi tabilé najkí apirigá ramué omawa bilé piesta napu boʼné tabilé galeme ju.

Api mué ʼma benile

• ¿Tachiri rukewa ramué apirigá machiboa napu Jeobá aʼlá niraga etéasa bilé piesta?

• ¿Churiga guʼíriwa ramué rejimala ʼlige ramué amígola apirigá aʼboi aʼlá námala ramué bijchígame ju alué piesta?

• ¿Churigá machiaru Jeobá najkí apirigá ramué mochiwa ʼwe raʼsálagá ʼlige ʼwe reʼégame niwa?

UCHÉ RAJPÉ ʼYÁAWA

Leériwa jaré piesta napu alué kristiano tabilé omame ju.

«¿Chonigá alué testigo Jeobá tabilé omame ju jaré piesta?» (Artículo de jw.org)

Beníriwa naó tábiri napu beníriame ju Onorúgame tabilé ʼla niraga eté napu ju alué bamíliame.

«¿Chonigá alué testigo Jeobá tabilé omame ju alué bamíliame?» (Artículo de jw.org)

Eʼnewa churigá alué uʼkuchítiri galeme Jeobá, ʼla raʼsálari alué apiʼlige nerú omáuli.

Jeobá ʼwe niraga eteme ju mué (11:35)

Weʼká milloni kristiano tabilé omame ju alué «Navidad». ¿Aʼlá raʼsálagá mochí aʼboi arigá ʼnátiga?

«Aʼboi rewale bilé tábiri ʼwe aʼlá» (La Atalaya, 1 de diciembre de 2012)