Mukanda wa Bubili ku Bakorinto
11 Ata sie kine mwenekele nga muntu asili na mano, ntonene munsipikizie. Inzi, kakiine muli mukunsipikizia! 2 Ndi ni bwivu pa lwenu nga evelia Leeza vyali ni bwivu pa lwenu,* pantu naamilaile ne mwine nangue mwakoopua na mulume umo, i kulanda Kristu, kabili ntonene kumitwala kuli wene mwali nga bikira ali ni lwendo luswetele. 3 Inzi, mu nzila imo ndi mukutiina, pantu nga evelia kizoka vikyaamubepele Eva kupitila bukengezi bwakue, mano enu kunti ainoonua kufuma mu kisinka ni mu kusweta, belia bimupalile kulangilila ntanzi yakue Kristu. 4 Nalanda evio pantu kine muntu waiza ni kusimikila Yesu unge apuseene ni olia utwaasimikiile, ao kine mwapokelela mupasi unge upuseene ni olia umwaapokeleele, ao kine mwapokelela mpunda inge iweme ipuseene ni elia imwaaitabiile, mwemue mumusipikiziizie ozo muntu mwaleengeelue. 5 Pantu nene mwene nangue nsyaakiilangilila mu kintu ata kimo kuya nali wa pansi kuliko batumua benu baalia bemwene kuya bakilile kuwama. 6 Inzi, ata sie kine nsimanine kulanda bwino, kakiine manine bintu pa lwakue Leeza; kisinka, twaakimilangilila kekio paswetele mu kila nzila ni mu kila kintu.
7 Naamipundiile mpunda iweme yakue Leeza nali ni nsansa bila kumilomba kantu. Eba, naakitile lizambi pa kwikeefia evi mwemue mukindikue? 8 Naakwasiiziwe na bilonghaano binge, kabili kili sie nga evelia nene waaibile bintu byabo evi mibombele* mwemue. 9 Kabili, musita umbanga nali pamo ni mwemue, ni lunaalukile ni lazima ya bintu, nsyaalukile mutembo ku muntu ata umo, pantu ba lupua baalia baafumine ku Makedonia baampeele bintu bingi binaali nabio lazima. Een, naatiinine kwaluka mutembo kuli mwemue mu kila nzila, kabili nakaba kutwalilila kukita evio. 10 Luntwaliliile kuya nali musambi wakue Kristu, nsikaba kulekela kwitanka palua kekio mu tuzonga twa Akaya. 11 Eba, juu ya ki naakitile evio? Eba, i kulanda nangue nsimitonene? Leeza amanine nangue mitonene.
12 Inzi, nakaba kutwalilila kukita kelia kindi mukukita evi kufumia kabepelo ka baalia batonene kupata nsambu ya* kulengia bamoneke kuya bapaleene ni fwefue mu bintu bibali mukwitankilapo. 13 Pantu bantu ba evio, bene ni batumua ba bufi, babombi baalia bali bababepa bantu, kabili bali baialula bo bene kuya bali nga batumua bakue Kristu. 14 Kukila pa kako, te kya kupapia pantu Sataana ye mwine atwaliliile kwialula nga malaika wa mwangaza. 15 Kansi, te kintu kya kupapia kine babombi bakue ni bene batwaliliile kwialula nga babombi ba kooloka. Inzi, mpela yabo yakaba yali kukonkana ni bintu bibali bakita.
16 Nalanda kabili nangue: Te kuli muntu ata umo apalile kutontonkania nangue nsili na mano, inzi ata sie kine mumwene kuya nali evio, mwemue nsipikizie sie evi ni nene ngitankeko kanini. 17 Kelia kindi mukulanda lonu, nsili mukukilanda nga muntu akonkele mufuano wakue Mulopue, inzi nga muntu asili na mano olia eswapiile, kabili etankile. 18 Pantu bengi bali mukwitanka kukonkana ni mubili,* ni nene naketanka. 19 Pantu mwemue “muli ni mano” sana, muli mukubasipikizia kwa nsansa baalia basili na mano. 20 Kakiine, muli mwamusipikizia olia onse ali wamyalula bazia, onse ali wamiliila bintu byenu, onse ali wamisompola bintu bimuli nabio, onse ali waitantamuna pali mwemue, ni olia onse ali wamyuma pa menso.
21 Tuli ni busoni bwa kulanda evio, pantu kunti kyamoneka nangue tuli mukukita bintu mu butope.
Inzi, kine bantu bange te bali mukunvua busoni bwa kwitanka, kansi ni nene nsyunvua busoni bwa kwitanka ata sie kine bange bali kumona nangue nsili na mano. 22 Eba, bene ni Baebrania? Ni nene ndi Mwebrania. Eba, bene ni Baisraeli? Ni nene ndi Mwisraeli. Eba, bene ni ba mu kizazi kyakue* Abrahamu? Ni nene ndi wa mu kizazi kyakue Abrahamu. 23 Eba, bene ni babombi bakue Kristu? Naasuka nga nene azambukile, nangue nkilile kubapita: Naakikita miilo ingi, naakikakua lingi sana, naakyumua lingi sana, kabili lingi naakipanda zenze kufua. 24 Mara isano, Bayuda baangumine nfimbo makumi ana (40) kupunguziamo imo. 25 Mara itatu, naauminue tupini, limo naauminue mabue, mara itatu naatyokeelue na bwato, naapisiizie busiku ni koba pa lyezi; 26 lingi naali nasangua mu bulendo, mu atari ya mu mimana, ya ba bipondo, ya kufuma ku bantu bane ne mwine, ya kufuma ku ntundu inge, ya mu mizi ikata, ya mu kaseeba, ya mu lyezi, mu atari pakati ka ba lupua ba bufi, 27 naabombele miilo ikolele, kabili yaviizie, lingi naali napunga busiku, mbanga nasangua mu nzala ni kyaka, lingi naali napusua byakulia, naali nasangua mu kasama, kabili naali napusua ngubo.*
28 Kukila pa bebio bintu, kuli kintu kili mukunghemia mukati mwane kila busiku: ndi mukwema palua bilonghaano byonse. 29 Musita muntu umo lwali watopa, eba ni nene nsizi kutopa abe? Musita muntu umo lwali waiputala, eba ni nene nsizi kufipua abe?
30 Kine mpalile kwitanka, ndi kwitanka palua bintu bilangiliile butope bwane. 31 Leeza, kabili Baba wakue kwa Mulopue Yesu, Olia apalile kutasiiwa lonse, amanine nangue nsili mukubepa. 32 Mu Damasko, guvernere wakue likolo Areta waali wasungile muzi wa Badamasko evi ankwate, 33 inzi, baankoosiizie mu kipanda pa dirisia ibanga yali pa kibumba kya muzi, kabili naapusukile mu minue yakue.