Mukanda wa Kwanza ku Bakorinto

7 Lonu, keki i kyasuko palua bintu bimwaakyandika: Kili bwino mwalalume te kunti amukumie* mwanakazi. 2 Inzi, juu ya kusalanghana kwa bukambue,* kila mwalalume apalile kuya wali ni mukazi wakue mwine, ni kila mwanakazi aye wali ni mulume wakue mwine. 3 Kansi, mulume amupeele mukazi nsambu yakue,* mukazi ni wene, amukitile enka evio mulume wakue. 4 Mukazi tali na buvinde pa mubili wakue mwine, inzi mulume wakue i ali ni bobo buvinde. Mu enka ezio nzila, mulume tali na buvinde pa mubili wakue mwine, inzi mukazi wakue i ali ni bobo buvinde. 5 Tekuye mwatanana, inga sie kine mwaakyunvuana kukita evio pa musita ubiikilue, evi muye mwatengele ni musita wa kupepa, kabili muvinde kubwela kwaluka pamo, evi Sataana te kunti atwalilile kumyezia pantu mwaandua kwizuia. 6 Nalanda bebi byonse evi mumane bintu bitabiziiziwe, inzi nsimibiikiile sheria imupalile kukonka. 7 Ntonene balalume bonse baye bali nga vindi nene, inzi kila umo ali ni bupe bwakue mwine kufuma kuli Leeza. Fwe bonse tuli twamubombela Leeza mu nzila ipusene-puseene.

8 Lonu, nalanda evi ku baalia basyupile ao basyupilue pamo ni ku ba mukanfwilua: Kili bwino kuli bene kine basyala bali nga vindi nene. 9 Inzi, kine baandua kwizuia, kunti baupa ao kuupua, pantu kili bwino kuupa ao kuupua kuliko kuleema na tama ipitiliile.

10 Baalia bopile ao bopilue nabapeela aza malaizio: Mukazi tapalile kutengana ni mulume wakue. Bobu butunguluzi bufumine kuli Mulopue. 11 Inzi, kine watengana ni mulume wakue, tapalile kuupua, ao kine te evio, abwele kunvuana ni mulume wakue. Kabili, mulume tapalile kumusia mukazi wakue.

12 Inzi, bange nabalanda evi (nene i walanda, apana Mulopue): Kine lupua ali ni mukazi asizumiine, ni ozo mukazi etabiile kwikala nakue, tapalile kumusia; 13 kabili, kine mwanakazi ali ni mulume asizumiine, ni ozo mulume etabiile kwikala nakue, tapalile kumusia. 14 Pantu mulume asizumiine amwenue kuya wali mutakatifu juu ya mukazi wakue, ni mukazi asizumiine amwenue kuya wali mutakatifu juu ya ozo lupua. Kine te evio, baana benu te baasiile kuya bali batakatifu,* inzi lonu, bene ni batakatifu. 15 Inzi, kine olia asizumiine wapingula kuya,* muleke aye. Lupua ao nkazi takakilue mu ezio aali;* Leeza waakimipeela mutende. 16 We mukazi, wamana syani kine wewe wakaba kumupususia mulume obe? Ao, we mulume wamana syani kine wakaba kumupususia mukazi obe?

17 Inzi, kila umo atwalilile kwikala mu aali yonse yabanga walimo musita lwaakuutilue na Yehova* Leeza. Azo i malaizio andi mukupeela bilonghaano byonse. 18 Kine muntu waakuutilue na Leeza wasyatairiiwe, muleke atwalilile mu* ezio aali. Kabili, kine muntu waakuutilue tanatairiwe, wene tapalile kutairiwa. 19 Kutairiwa, te kantu, ni kusitairiwa, te kantu. Kintu kya mana ni kukonka malaizio akue Leeza. 20 Kila muntu apalile kutwalilila kuya wali nga vyabanga wali musita lwaakuutilue. 21 Kine wewe ubanga wali muzia musita luwaakuutilue, te kulekelela kekio kikwemie. Inzi, kine wewe kunti wavinda kwaluka uru, bombia ezio fwasi. 22 Muntu onse olia abanga wali muzia musita Mulopue lwaamukuutile, ali uru, kabili wene ni wakue Mulopue. Kukila pa kako, muntu onse olia abanga wali uru lwaakuutilue na Mulopue, wene ni muzia wakue Kristu. 23 Mwemue, mwaasitilue na bei ikata; lekele kwaluka bazia ba bantu. 24 Mwe ba lupua, twalilile kuya mwali nga vimubanga mwali musita lumwaakuutilue na Leeza.

25 Lonu, nsili na malaizio kufuma kuli Mulopue palua baalia basinaupe ao kuupua,* inzi namipeela mawazo ane nali muntu wa kisinka olia waalangiliilue luse na Mulopue. 26 Mu onu musita waviizie, nene mwene kyawamiisie mwalalume kutwalilila nga vyali. 27 Kine wewe uli ni mukazi, te kwezia kumusia. Kine te uli na mukazi, te kukeba mwanakazi wa kuupa. 28 Inzi, kine wewe waupa, te ukitile lizambi. Kabili, kine muntu asinaupe ao kuupua,* wapingula kuupa ao kuupua, takitile lizambi. Ata sie kine ni evio, baalia bali bakita evio, bakaaluka ni maavia mu bwikazi bwabo.* Inzi, nene ndi mukwezia kumikwasia evi te kunti mupatue na azo maavia.

29 Kukila pa kako, mwe ba lupua, namyana evi: Musita usyeleko wakepa. Kutendekela lonu, baalia bali ni bakazi bapalile kwikala nga evelia basili na bakazi, 30 baalia bali mukulila bapalile kwikala nga baalia basili mukulila, baalia bali mukusekelela, bapalile kwikala nga baalia basili mukusekelela, ni baalia bali mukusita bapalile kwikala nga baalia basikwete kantu, 31 ni baalia bali mukubombia kyalo, bapalile kuya bali nga baalia basili mukukibombia sana, pantu bintu belia bili mukukitika mu* kenu kyalo bili mukwaluluka. 32 Kakiine, ntonene te kunti muye mwaema. Mwalalume asyupile ali waemena bintu byakue Mulopue, ni vya kukita evi amusansamusie* Mulopue. 33 Inzi, mwalalume opile, ali waemena bintu bya kyalo ni vyali kuvinda kumusansamusia* mukazi wakue, 34 kabili mawazo akue akasanikile. Kukila pa kako, mwanakazi asyupilue pamo ni bikira bali baemena bintu byakue Mulopue, evi mubili wabo ni mawazo abo* biye byali bitakatifu. Inzi, mwanakazi opilue ali waemena bintu bya kyalo ni vyali kuvinda kumusansamusia* mulume wakue. 35 Ndi mukulanda evio juu ya kunti munonkelemo, apana juu ya kumikaania,* inzi juu ya kumisonsezia kukita kelia kipalile, ni kwipeela lonse kuli Mulopue bila kupuululua.

36 Inzi, kine muntu wamona nangue ali mukukita bintu bisipalile juu ya kusyala bila waupile ao kuupua,* kabili kine te mulumendo sana ao mukazyana sana,* akite kelia kyatonene; takitile lizambi. Muleke ope ao opue. 37 Inzi, kine muntu asininkiziizie kakiine nangue tali na lazima ya kuupa ao kuupua, kabili ali ni buvinde bwa kutungulula tama yakue mwine, ni kuya wapingwile mu mutima wakue kusyupa ao kusyupua,* wakita bwino. 38 Pa kako, onse waupa ao kuupua wakita bwino, inzi olia asyupile ao kuupua, wakilapo kukita bwino.

39 Mukazi akakilue musita onse mulume wakue lwakikosele, inzi kine mulume wakue wafua, wene waaluka uru kuupua na mwalalume onse wali kutona. Ata sie kine kyaaluka evio, wene apalile kuupua sie muli Mulopue. 40 Inzi, mu kumona kwane, ozo mwanakazi ali kukila kwaluka ni nsansa kine wasyala sie waikeele nga vyali. Kabili, mwene kakiine nangue ni nene ndi ni mupasi wakue Leeza.