Yaandikilue na Mateo
19 Yesu lwaapwile kulanda bebio bintu, waafumine ku Galilaya ni kuya ku mipaka ya Yudea, ku bwala bunge bwa Yordani. 2 Bantu bengi sana baamukonkele, ni koko, waabakosiizie balwele.
3 Kisia, Bafarisayo baaizile bali ni mupango wa kumutea Yesu, baamwipuziizie evi: “Eba, mwalalume apalile kumukaana mukazi wakue juu ya kila nsambu?” 4 Waabaasukile evi: “Eba, te mwaasomene nangue olia waababumbile ntangia ku ntendeko, waababumbile bali ba mwalalume ni mwanakazi 5 ni kulanda evi: ‘Pa kako, mwalalume wakamusia baba wakue ni mama wakue ni wene wakalamatilila ku mukazi wakue ni babo babili bakaaluka mubili umo’? 6 Kisia, te bakili kabili bantu babili, inzi mubili umo. Pa kako, kelia kyaakwataniizie Leeza, muntu te kunti akilekenkanie.” 7 Bafarisayo baamwipuziizie evi: “Ale juu ya ki Musa waalandile nangue mulume amupeele mukazi wakue mukanda wa kulangilila nangue wamukuumba ni kumukaana?” 8 Waabaasukile evi: “Musa waamitabiziizie kukaana bakazi benu pantu mitima yenu yumine; inzi, te kyaali evio ntangia ku ntendeko. 9 Namyana nangue, kila mwalalume olia wamukaana mukazi wakue asikitile kilubo kya bukambue* ni kuya kuupa mwanakazi unge, wakita bukende.”
10 Basambi baamulandile evi: “Kine bintu bili evio ku mwalalume ni mukazi wakue, kansi kyawama sie kwikala bila kuupa.” 11 Yesu waabalandile evi: “Te kila muntu ali waitabila kwikala bila kuupa, inzi inga sie baalia baapeelue bobo bupe. 12 Pantu kuli baalia bali bavyalua bali mbela ba bibola, ni baalia bali baalulua ba bibola na bantu, kabili kuli ni baalia bali baialula ba bibola juu ya Bukolo bwa ku muulu. Kansi, olia watona kwikala bila kuupa, akite evio vyenka.”
13 Kisia, bantu baamuleteele baanike evi abiike minue yakue pali bene ni kubapepela, inzi basambi baabasasiliile bavyazi. 14 Inzi, Yesu waabalandile evi: “Balekele baanike beze kuli nene, kabili tekwezie kubakaania, pantu Bukolo bwa ku muulu ni bwa bantu bali nga baaba baanike.” 15 Kabili, waabiikile minue yakue pali bene kisia waafumine papo.
16 Mona! mulumendo umo waaizile kuli Yesu wamwipuzia evi: “We Mwalimu, ni bintu ki biweme bimpalile kukita juu ya kupata bukose bwa lonse?” 17 Yesu waamwasukile evi: “Juu ya ki wangipuzia palua bintu biweme? Kuli sie Umo i aweme. Kine watona kupata bukose, twalilila kukonka malaizio.” 18 Ozo mulumendo waamulandile evi: “Malaizio ki?” Yesu waamwasukile evi: “Te upalile kwipaya, te upalile kukita bukende, te upalile kwiba, te upalile kusininkizia bya bufi, 19 mukindike baba obe ni mama obe, kabili upalile kumutona mwikazi nobe nga viwitonene we mwine.” 20 Ozo mulumendo waamulandile evi: “Bebio byonse ndi nakita; ale kisyeleko ni kiki?” 21 Yesu waamulandile evi: “Kine utonene kuya wapwililikile,* endo waye usisie bintu byobe ni kubapeela bapabi. Kine wakita evio, wakaba kwaluka ni bukonto ku muulu; kisia wize waluke musambi wane.” 22 Ozo mulumendo lwaaunvwile evio, waafuminepo wali ni bulanda pantu abanga wakwete bintu bingi. 23 Kisia Yesu waabalandile evi basambi bakue: “Kakiine namyana nangue, kyakaba kyakolele ku muntu anonkele kwingila mu Bukolo bwa ku muulu. 24 Kabili namyana nangue, kileengele sana kuli nghamia kupita mu lipulo lya nsindano kuliko muntu anonkele kwingila mu Bukolo Bwakue Leeza.”
25 Musita basambi lubaaunvwile evio, baapapile sana ni kwipuzia evi: “Ale, nani kakiine wakapusuka?” 26 Yesu waabakentele sana mu menso abo ni kubalanda evi: “Keki tekivindikana ku bantu, inzi kuli Leeza bintu byonse bili byavindikana.”
27 Kisia Petro waamulandile evi: “Mona! Twaakisia bintu byonse ni kukukonka, ale fwefue twakaba kupata ki?” 28 Yesu waabalandile evi: “Kakiine namyana nangue, bintu lubyakaaluka bya lenu, musita Mwana mwina muntu lwakekala mu kitebe kyakue kikata* kya Bukolo, mwemue bali mukunkonka mwakekala mu bitebe likumi na bibili (12) bya Bukolo evi kupingula mikoa likumi na ibili (12) ya Israeli. 29 Kila muntu olia waakisia nsesi ao ba kaka ao balabakue ao ba dada ao baba ao mama ao baana ao makaba juu ya liina lyane wakapata bingi mara mia imo, kabili wakapata bukose bwa lonse.
30 Inzi, bengi ba kwanza bakaaluka ba mwisio, ni ba mwisio bakaaluka ba kwanza.