Yaandikilue na Marko
7 Bafarisayo pamo ni ba kalemba bamo ba sheria, baalia baafumine ku Yerusalemu, baakolongheene palia pabanga pali Yesu. 2 Kisia, baabamwene basambi bamo bakue Yesu bali mukulia kyakulia mu minue mwafiitile, i kulanda, minue bila yasambile.* 3 (Bafarisayo ni Bayuda bonse te bezi kulia bila basambile mu minue bafikia mpaka mu kakongina, pantu balamatiliile ku desturi ya ba bikolue babo, 4 kabili kine bafuma ku nsoko, te bezi kulia bila kusamba. Kuli ma desturi ange engi abapeelue kabili abalamatiliileko, nga evelia: Kubatizia bikombe, ngeso ni biyombo bya mikuba.) 5 Pa kako, babo Bafarisayo ni ba kalemba ba sheria baamwipuziizie evi Yesu: “Juu ya ki basambi bobe te bezi kukonka masambilizio a ba bikolue betu, inzi bali balia kyakulia mu minue mwafiitile?” 6 Yesu waabaasukile evi: “Isaya waali ni nsambu ya kulanda evi ntanzi pa lwenu mwe banafiki, nga vilandile Malembo, ‘Baaba bantu bali bankindika sie pa milomo yabo, inzi mitima yabo ili kule ni nene. 7 Bali mukutwalilila kumpupa kya mpuni, pantu masambilizio abo ni malaizio sie a bantu.’ 8 Muli mwasia malaizio akue Leeza ni kulamatilila ku desturi ya bantu.”
9 Kukila pa kako, waabalandile evi: “Muli mwapuulula malaizio akue Leeza mu bukengezi bwenu evi mukonke desturi yenu. 10 Kwa mufuano, Musa waalandile evi: ‘Mukindike baba obe ni mama obe,’ kabili ‘Olia wamutuka* baba wakue ao mama wakue, apalile kwipaiwa.’ 11 Inzi mwemue muli mwalanda evi: ‘Kine muntu wamulanda evi baba wakue ao mama wakue: “Kila kintu kindi nakio kelia kili kuvinda kukukwasia ni korbani (i kulanda, bupe bulailue kupeelua Leeza),”’ 12 te mwizi kumulekelela akite kintu ata kimo juu yakue baba wakue ao mama wakue. 13 Pa kako, mwemue mwalengia mulandu wakue Leeza te kunti uye wali na mana kupitila desturi imuli mwatunga. Kabili, muli mwakita bintu bingi byapaleene ni keki.” 14 Kisia, waakuutile kabili bantu bengi ni kubalanda evi: “Ntwilizie mwe bonse, kabili unvue mana ya bebi binsyali nakeba kulanda. 15 Te kuli kintu kili kyafuma panze pa muntu ni kwingila mukati mwakue kili kuvinda kumufiisia; inzi bintu belia bili byafuma mukati ka muntu, i bili byamufiisia.” 16* ——
17 Lwaafumine pa babo bantu bengi ni kuya kwingila mu nsesi, basambi bakue baabambile kumwipuzia palua olia mufuano. 18 Yesu waabalandile evi: “Eba, kansi ni mwemue te munvwile nga bene? Eba, te mumanine nangue te kuli kintu kili kyafuma panze pa muntu ni kwingila mukati mwakue kili kumufiisia, 19 pantu te kingiile mu mutima wakue inzi kyaingila munda, kisia kyafuma ni kwingila mu kabine?” Pa kako, waapundile nangue byakulia byonse biswetele. 20 Waaongeziizie evi: “Kelia kili kyafuma mu muntu i kili kyamufiisia. 21 Pantu mukati, mu mutima wa muntu, i muli mwafuma mawazo abipile a bukambue,* bukabooko, bungipaani, 22 bukende, pupa, bubiifi, bupompo, lwendo lubipile lwa bila busoni, linso lya bwivu, matuka, kiitoni ni bupuba. 23 Bebi bintu byonse bibipile bili byafuma mukati, kabili bili byamufiisia muntu.”
24 Waafumine papo ni kuya mu kazonga ka Tiro ni Sidoni. Koko, waaingiile mu nsesi pantu taali watonene muntu ata umo amane nangue waakiza, inzi bantu baamanine sie. 25 Bila kukokola, kubanga kwali mwanakazi umo abanga wakwete mwana mwanakazi mwanike waingiilue na mupasi ufiitile. Ozo mwanakazi waaunvwile mpunda pa lwakue Yesu, kisia waaizile ni kufukama ku maulu akue. 26 Ozo mwanakazi abanga wali Mugiriki, kabili abanga waikeele ku Foinike ya mu Siria. Waatwaliliile kumulomba Yesu akuumbe mupasi ubipile evi ufume muli mwana wakue mwanakazi. 27 Yesu waamulandile evi: “Lekelanke baana bekute, pantu te kili bwino kubuula mukate wa baana ni kupozela tubua twana.” 28 Inzi, ozo mwanakazi waamwasukile evi: “Kisinka we Mulopue. Inzi, ata sie tubua twana tolia tuli mwinsina meza tuli twalia mavunga ali aponia baana banini.” 29 Yesu waamulandile evi: “Pantu walanda evio, endo waye; olia mupasi ubipile wafumanga kale muli mwana obe mwanakazi.” 30 Pa kako, ozo mwanakazi waaile ku nsesi yakue ni kukasanga ka mukazyana kaikeele pa butanda, kabili mupasi ubipile ubanga wasyafumine.
31 Yesu waafumine mu kazonga ka Tiro, wapita ku Sidoni, kisia wabwela ku lyezi lya Galilaya wapita ku Dekapoli.* 32 Ku ezi fwasi, baamuleteele mwalalume umo mpokoto olia abanga wali ni bwavia bwa kulanda, kabili baamupapaatile Yesu evi abiike minue yakue pali wene. 33 Kisia, waamutweme ni kuya nakue pa mbali kule ni babo bantu bengi. Yesu waabiikile minue yakue mu matui akue ozo muntu, kisia kutiila mate, waakumiizie pa lulimi lwakue ozo muntu. 34 Waakentele mu muulu, wakula sana mwela ni kumulanda evi: “Efata,” i kulanda, “Zibuka.” 35 Matui akue aazibukile ni bwavia bwakue bwa kulanda bwaapwile, kabili waabambile kulanda bwino. 36 Yesu waabakaaniizie te kunti babwileko muntu ata umo, inzi vyaali waya wakila kubakaania, i vibaali baya bakila kusalanghania ezio mpunda. 37 Kakiine baapapile sana ni kulanda evi: “Bintu byonse byali mukukita biweme. Ali mukukita ata sie ba mpokoto bonvue ni bakameme balande.”