Mukanda wa Bubili ku Bakorinto

3 Eba, twatendeka kabili kwipendekezia fwe bene? Ao nga bantu bange, eba tuli ni lazima ya mikanda ya kupendekeziiwa ya kwiza kuli mwemue ao ya kufuma kuli mwemue? 2 Mwe benka i mukanda wetu, olia wandikilue pa mitima yetu, olia umanikile, kabili uli mukusomua na bantu bonse. 3 Pantu, kimwenekele paswetele nangue mwemue i mukanda wakue Kristu olia utwaakyandika twali babombi bakue Leeza. Ozo mukanda te wandikilue na wino, inzi na mupasi wakue Leeza akosele, kabili te wandikilue pa mabue, inzi pa mitima.*

4 Tusininkiziizie evio pa lwakue Leeza kupitila Kristu. 5 Te tukebele kulanda nangue twimwene fwe bene kuya twapalile kakiine kubomba ezi miilo, inzi kupala kwetu kufumine kuli Leeza. 6 Kisinka, wene i waakitulengia tuye twapalile kakiine kwaluka babombi ba mapatano a lenu, apana ba sheria yandikilue, inzi ba mupasi; pantu sheria elia yandikilue ili yaleta bupinguzi bwa lufu, inzi mupasi uli waleta bukose.

7 Lonu, sheria elia ili yaleta lufu, kabili elia yaaponkwenue pa mabue mu ma erufi, yaaizile yali ni bulumba bwa evio, evi baana bena Israeli te kunti bakentesie ku lukebu lwakue Musa juu ya bulumba bolia bubanga bwali ku lukebu lwakue, bulumba bolia bwaali bwa kupita. 8 Kine kyaali evio, ale mupasi uli kwanda syani kuya wali ni bulumba bukililepo? 9 Kine Sheria elia yaabapingwile bantu kuya bali ni kilubo ibanga yali ya bulumba, kansi miilo elia ili yalengia bantu baye baolokele, ikililepo kuya yali ya bulumba! 10 Kakiine, ata sie kelia kyaalwilue kya bulumba lwa kale, kyaavuulilue bobo bulumba juu ya bulumba bukilile kutana kupita bobo. 11 Pantu, kine kelia kyaali kya kupita kyaaingiziiziwe kyali ni bulumba, kansi kelia kisyelepo kipalile kuya kyali ni bulumba bukililepo kutana!

12 Pantu tuli ni kekio kiswapilo, tuli mukulanda twali ni uru ukata, 13 kabili, te tuli mukukita kelia kyaakitile Musa lwabanga wavimba kitambala pa lukebu lwakue evi baana bena Israeli te kunti bakentesie ku mpela ya kelia kyaali kyakufumiiwapo. 14 Inzi, mano abo aatazile. Mpaka lonu, kitambala kyenka kelia, kisyele bila kyafumiiziwe musita mapatano a kale lwali mukusomua, pantu kili kyafumiiwa sie kupitila Kristu. 15 Kakiine, mpaka lwenka lonu, musita onse Musa lwali mukusomua, kitambala kili kyavimba mitima yabo. 16 Inzi, kine muntu waya ku lubali lwakue Yehova,* kitambala kili kyavimbulua. 17 Yehova* wene ni Mupasi, kabili palia pali mupasi wakue Yehova* pali pasangua pali uru. 18 Kabili, fwe bonse musita utuli twalangilila bulumba bwakue Yehova,* nga evelia vili vyakita kio, ni koku twali ni nkebu isivimbilue bitambala, tuli twaalulua evi twaluke nga Leeza, kabili evi tukilepo kulangilila bulumba bwakue,* nga enka evelia vitonene Yehova,* Mupasi.*