Mukanda wa Kwanza ku Bakorinto
1 Ozu mukanda wafuma kuli nene Paulo, olia waakuutilue kwaluka mutumua wakue Kristu Yesu kupitila kutona kwakue Leeza. Ndi pamo ni Sostene lupua wetu. 2 Naandikila kilonghaano kyakue Leeza kelia kili mu Korinto, kuli mwemue baalia baalwilue batakatifu* mu buumo ni Kristu Yesu, mwe baakuutilue kwaluka batakatifu, pamo ni baalia bonse bali mukulilila kila fwasi mu liina lyakue Mulopue wetu Yesu Kristu, Mulopue wabo, kabili Mulopue wetu.
3 Leeza Baba wetu pamo ni Mulopue Yesu Kristu bamilangilile buwame* ni kumipeela mutende.
4 Lyonse, ndi namutasia Leeza wane palua buwame* bolia bumwaakilangililua mwe basambi bakue Kristu Yesu. 5 Mwemue mwaakipaalua sana pantu muli mu buumo pamo nakue, kabili wene waakimilengia sana mwaluke ni buvinde bwa kulanda,* ni kumipeela buvinde bwa kunvua sana, 6 pantu mwaakisininkizia kakiine mpunda imwaaunvwile pa lwakue Kristu. 7 Te muli mukupusua na bupe ata bumo kufuma kuli Leeza, musita umupembeleele kwa amu kufiikulua kwakue Mulopue wetu Yesu Kristu. 8 Leeza wakamipeela maka mpaka ku mwisio evi mu busiku bwakue Mulopue wetu Yesu Kristu te kunti kukabe muntu ata umo wa kumisitaka palua kintu ata kimo. 9 Leeza wene ni wa kisinka, kabili wene i olia waamikuutile, evi musekelele buumo* pamo ni Mwana wakue Yesu Kristu, Mulopue wetu.
10 Mwe ba lupua, lonu namikinkizia mu liina lyakue Mulopue wetu Yesu Kristu nangue mwe bonse mupalile kuya mwaunvuana mu kulanda, kabili nangue te mupalile kuya mwakasanikile pakati kenu, inzi muye mwakwateene kakiine mu mano amonke ni mu nzila imonke ya kuwaza. 11 Bamo pakati ka bantu ba mu nsesi yakue Kloe, baakimbwilako mpunda pa lwenu, mwe ba lupua bane, nangue kuli kusyunvuana pakati kenu. 12 Kinkebele kulanda ni keki: Pakati kenu, umo ali walanda nangue: “Nene ndi wakue Paulo,” ni unge nangue “Nene ndi wakue Apolo,” inzi unge ali walanda nangue “Nene ndi wakue Kefa,”* unge kabili nangue “Nene ndi wakue Kristu.” 13 Eba, Kristu akasanikile? Paulo taaipailue pa kimuti juu yenu. Eba, te evio? Ao eba, mwaabatiziiziwe mu liina lyakue Paulo? 14 Namutasia Leeza pantu nsyaabatiziizie muntu ata umo pakati kenu, inga sie Krispo ni Gayo, 15 evi te kunti kuye kwali muntu ata umo pakati kenu wa kulanda nangue mwemue mwaabatiziiziwe mu liina lyane. 16 Een, kabili naabatiziizie bantu ba mu nsesi yakue Stefana. Inzi palua baaba bange, nsimanine kine kuli ni muntu unge unaabatiziizie. 17 Pantu Kristu waantumine, apana juu ya kubatizia, inzi juu ya kupunda mpunda iweme. Kabili nsyaakitile evio na bulanzi bwa bukengezi, bolia bwaasiile kulengia buvinde bwa kimuti kya mateso* kyakue Kristu bwaluke bwa bulebule.
18 Mpunda palua kimuti kya mateso* imwenue kuya yali bulubi ku baalia bali mukuya ku kwinoonua. Inzi, ku fwefue bali mukupususiiwa, yene ni buvinde bwakue Leeza. 19 Pantu Malembo alandile nangue: “Nakaba kwinoona mulangue wa baalia bali ni mulangue, kabili nakaba kukaana* mano a baalia bali ni mano.” 20 Kunti twalanda ki palua muntu wa mulangue, ao pa lwakue kalemba,* ao palua muntu ali wabisiana wa mu kenu kyalo?* Leeza waakilengia mulangue wa kyalo umoneke kuya wali bulubi. 21 Pantu kyalo kyaaswapiile mulangue wakue wine, te kyaafikiile kumumana Leeza. Inzi, Leeza waatonene kubapususia baalia baazumiine mpunda elia yaali yamwenue na bange kuya yali bulubi.
22 Bayuda bali balomba alama, ni Bagiriki bali bakeba mulangue; 23 inzi, tuli twasimikila nangue Kristu waaipailue pa kimuti. Ezio mpunda ku Bayuda, ili yalengia beputale, inzi ku ntundu, kekio kyunvwikile kuya kyali bulubi. 24 Ata sie kine kili evio, ku baalia baakuutilue, Bayuda ni Bagiriki, Kristu wene ni maka akue Leeza, kabili wene ni mulangue wakue Leeza. 25 Kintu kya bulubi kyakue Leeza kili ni mulangue kuliko mulangue wa bantu, ni kintu kitope kyakue Leeza kilumiisie kuliko maka a bantu.
26 Mwe ba lupua, mumwene vimubanga mwali lumwaakuutilue na Leeza. Mu kumona kwa bantu, te bengi pakati kenu bali ni mulangue, te bengi bali ni maka, te bengi bafumine mu lupua lwa mana,* 27 inzi, Leeza waasaakwile bintu bya bulubi bya kyalo evi kuzyelekania bantu ba mulangue; Leeza waasaakwile bintu bitope bya kyalo evi kuzyelekania bintu bilumine; 28 kabili, Leeza waasaakwile bintu bya kyalo bisili bya mana pamo ni bintu bipuulwilue, belia bimwenue kuya byali bya bulebule, evi kulengia bintu bimwenue kuya byali bya mana byaluke bya bulebule. 29 Waakitile evio evi muntu ata umo te kunti etasie* pa menso akue Leeza. 30 Inzi kupitila wene, mwemue muli mu buumo ni Kristu Yesu, olia waatuleteele mulangue kufuma kuli Leeza. Kupitila Kristu, Leeza waakitulengia twaluke bantu bolokele, kabili batakatifu. Kukila pa kako, waakitukakula kupitila kilubula-mulandu, 31 evi kiye kyali sie nga evelia vilandile Malembo nangue: “Olia ali waitasia, muleke etasie muli Yehova.”*