Yaandikilue na Marko
12 Kisia, waabambile kulanziana nabo wabombia mifuano: “Muntu umo, waabyele mizabibu ni kusakilila mu mbali bukaba, waaimbilemo kiina kya kutikilamo mizabibu ni kwimika lupungu. Kisia, waabasiliile balimi ni kuya mu kyalo kinge. 2 Musita wa kukununa matunda luwaakumeene, waatumine mubombi umo aye ku baalia balimi evi amutwamineko semu fulani ya matunda a mu bukaba bwa mizabibu. 3 Inzi, baamukwete ni kumuuma, kisia baamukuumbile bila watweme ata kantu. 4 Waabatumiineko kabili mubombi unge, ni wene baamukisiizie ku mutue ni kumumonia busoni. 5 Kabili, waatumineko ni unge, ni ozo baamwipaile. Kisia, waatumineko ni bange bengi, bamo pakati kabo baauminue ni bange baaipailue. 6 Waasyele sie na muntu umo, mwana wakue mutonua. Ku mwisio, waamutumine ku baalia balimi, walanda evi: ‘Mwana wane wene baya bamukindike.’ 7 Inzi, babo balimi baabambile kulanziana evi: ‘Ozu i wakapeelua bobu bukaba, ize tumwipaye evi bebi byonse bikabe kwaluka byetu.’ 8 Pa kako, balimi baamukwete ni kumwipaya, kisia baamupozele panze pa bukaba bwa mizabibu. 9 Mwine wa bukaba bwa mizabibu wakaba kukita ki? Wakaba kwiza kubepaya babo balimi. Kisia, bukaba bwakue bwa mizabibu, wakaba kubapeela balimi bange. 10 Temunasomepo ata limo leli Lilembo lilandile nangue ‘Libue lelia lyaapozelue na bajenzi i lyaakyaluka libue line-liine lya mu katunfi.* 11 Lyaakifuma kuli Yehova,* kabili lya kupapia ku menso etu’?”
12 Lubaainikile nangue waaletele ozo mufuano juu yabo, baatonene kumukwata, inzi baatiinine baalia bantu bengi. Pa kako, baamusiile ni kuya.
13 Kisia, baamutumiine Bafarisayo bamo ni bantu ba mu kyama kyakue Herode evi bamukwate mu bulanzi bwakue. 14 Babo bantu lubaafikile, baamulandile evi: “We Mwalimu, tumanine nangue uli walanda kisinka, kabili te wizi kukeba kwitabilua na bantu pantu te wizi kupingula bantu kukonkana ni kumoneka kwabo. Inzi, uli wasambilizia nzila yakue Leeza kukonkana ni kisinka. Eba, sheria itabiziizie* kumulipa Kaisari kitansi* ao ata? 15 Eba, tupalile kulipa ao abe?” Lwaainikile bunafiki bwabo, waabalandile evi: “Juu ya ki muli mukungezia?* Ndetele kingolongolo* mone.” 16 Baamuleteele kimo, kisia waabalandile evi: “Lolu lukebu ni ezi myandiko ilipo byakue ni?” Baamwasukile evi: “Byakue Kaisari.” 17 Kisia, Yesu waalandile evi: “Bintu byakue Kaisari mupeele Kaisari, inzi bintu byakue Leeza mupeele Leeza.” Kabili baamupapile sana.
18 Basadukayo baalia bali balanda nangue te kuli kufufuka, baaizile ni kumwipuzia evi Yesu: 19 “We Mwalimu, Musa waatwandikiile nangue kine muntu wafua, wamusia mukazi inzi bila kusia mwana, mwalawakue* apalile kumutwama ozo mukazi evi amuvyalile kaka wakue baana. 20 Kwetu kubanga kwali balalume saba ba munda mumo. Wa kwanza waaupile, inzi lwaafwile taasiile ata mwana. 21 Ni wa bubili waamuupile ozo mwanakazi, inzi waafwile bila kusia ata mwana, i vikyaakitikile ni ku wa butatu. 22 Bonse saba te baasiile ata mwana. Kupwako, mwanakazi ni wene waafwile. 23 Ale musita wa kufufuka, ozo mwanakazi wakaba muka ni? Pantu abanga wali mukazi wa babo bonse saba.” 24 Yesu waabalandile evi: “Te mumanine Malembo ao sie maka akue Leeza; kekio i kilengiizie muye mwazezele. 25 Pantu musita bantu bafwile lubakafufuka, te kuli balalume bakoopa ni banakazi bakoopua, inzi bakaba bali nga ba malaika ba ku muulu. 26 Inzi, palua kufufulua kwa bantu bafwile, eba, te mwaasomene mu kitabu kyakue Musa, mu lyasi lilandile palua kinvuule kya myunga, Leeza lwaamulandile evi Musa: ‘Nene ndi Leeza wakue Abrahamu, Leeza wakue Isaka, ni Leeza wakue Yakobo’? 27 Wene te Leeza wa bantu bafwile, inzi wa bantu bakosele. Muluviizie sana.”
28 Kalemba umo wa sheria waaizile ni kunvua vibaali babisiana. Lwaaunvwile nangue Yesu waabaasukile bwino, waamwipuziizie evi: “Ni malaizio ki a kwanza pa onse?” 29 Yesu waasukile evi: “A kwanza ni aza: ‘Twilizia, We Israeli, Yehova* Leeza wetu ni Yehova* umo, 30 kabili upalile kumutona Yehova* Leeza obe kwa mutima obe onse, kwa mweo* obe onse, na mano obe onse ni na maka obe onse.’ 31 A bubili ni aza: ‘Upalile kumutona mwikazi nobe nga viwitonene we mwine.’ Te kuli ata malaizio ange akata sana apitile aza.” 32 Ozo kalemba wa sheria waamulandile evi: “We Mwalimu, walanda bwino, kukonkana ni kisinka. ‘Wene ni Umo, kabili te kuli unge, inga sie wene’. 33 Ni kumutona kwa mutima wetu onse, na mano etu onse* ni na maka etu onse, ni kumutona mwikazi netu nga vitwitonene fwe bene kukilile kuwama kuliko bupe bonse bwa kuzizia ni zabiu.” 34 Yesu lwaainikile nangue ozo kalemba waasukile kwa mulangue, waamulandile evi: “Wewe te uli kule ni Bukolo Bwakue Leeza.” Kupwako, bonse baaunvwile mwenzo wa kumwipuzia kipuzio kinge.
35 Yesu lwaatwaliliile kusambilizia mu ekalu, waaipuziizie evi: “Ale juu ya ki ba kalemba ba sheria bali balanda nangue Kristu ni mwana mwina Daudi? 36 Lwaatungulwilue na mupasi utakatifu, Daudi mwine waalandile evi, ‘Yehova* waamulandile evi Mulopue wane: “Ikala ku kuboko kwane kwa kulio mpaka nkababiike balwani bobe mwinsina makasa obe.”’ 37 Daudi mwine wamukuuta Mulopue, ale ali kuya wali syani mwana wakue?”
Kabili, bantu bengi sana babanga bamutwiliziizie bali ni nsansa. 38 Waatwaliliile kusambilizia, walanda evi: “Kengele ni ba kalemba ba sheria baalia bali batona kwendooka bavwele makanzu, kabili bali batona kupoziiwa ku nsoko, 39 ni kutona kwikala pa bitebe bya ku ntanzi* bya mu ma sinagogi, ni mu ma fwasi akindeeme sana ku kyakulia kya kyungulo. 40 Bali babapoka ba mukanfwilua bintu bibakwete, ni kupepa mapepo aleepele juu ya kunti bamonue na bange. Babo, bakapingulua ovio sana.”
41 Kisia, waaikeele wali mukukenta bisanduku bya bukonto. Waabambile kukenta bantu bengi vibaali babiika makuta mu bebio bisanduku. Kabili, banonsi bengi baali babiikamo bingolongolo bingi. 42 Kisia, mukanfwilua umo mupabi waaizile ni kubiikamo tu bingolongolo tubili twa bei inini sana.* 43 Lwaamwene evio, waabakuutile basambi bakue ni kubalanda evi: “Kakiine, namyana nangue ozu mukanfwilua mupabi wabiikamo makuta engi sana kupita makuta abiikamo baaba bange bonse mu bisanduku bya bukonto. 44 Pantu bonse babiikamo kukonkana ni kuvula kwa makuta abo, inzi ozu mukanfwilua, ata sie kine ni mupabi, wabiikamo makuta onse aakiba wali nao, kila kintu kyaakiba nakio kya kumukwasia mu bwikazi bwakue.”