Mukanda ku Baroma
9 Ndi mukulanda kisinka muli Kristu, nsili mukubepa. Zamiri yane elia itungulwilue na mupasi utakatifu ili mukusininkizia 2 nangue ndi ni bulanda bukata ni misa isili mukupua mu mutima wane. 3 Kabenge kyaavindikeene, nga naaialwile ne mwine kuya nali muntu atenganisiiziwe kufuma kuli Kristu, nga olia alainiiwe evi ba lupua bane banonkelemo, bantu bane ba mu lupua kukonkana ni mubili, 4 i kulanda Baisraeli. Bene baasaakwilue evi baalulue baana bakue Leeza. Leeza waabalangiliile bulumba bwakue ni kubapeela mapatano, Sheria, bulayo ni mukinzi evi bamubombele. 5 Bene bafumine ku ba bikolue betu, kolia kwaafumine ni Kristu wali muntu. Kansi, Leeza olia ali pa muulu byonse atasiiwe lonse. Amen.
6 Inzi, bulayo bwakue Leeza te bwandile.* Pantu “Baisraeli” ba kisinka te baalia bonse sie baavyelue kufuma kuli Israeli. 7 Te bonse i baana ba kisinka pantu sie bafumine mu kizazi kyakue* Abrahamu. Leeza waamulandile evi Abrahamu: “Kelia kyakakuutua kizazi kyobe kyakeeza* kupitila Isaka.” 8 Kekio kilangiliile nangue baana bene-bene* bakue Abrahamu, te baana kakiine bakue Leeza. Inzi, baana baalia baavyelue juu ya bulayo bwakue Leeza, bamwenue kuya bali kizazi kya* kisinka. 9 Pantu Leeza waalaile evi: “Nakaba kwiza mwaka uli waiza pa musita nga ozu, kabili Sara wakaba kwaluka ni mwana mwalalume.” 10 Kibanga kyaali enka evio ni musita Rebeka lwaaimitile baana babili kufuma kuli kikolue wetu Isaka. 11 Ntanzi tebanavyalue, kabili ntanzi tebanakite kintu ata kimo kiweme ao kibipile, Leeza waalangiliile nangue kelia kyakebele kyakaswapila kusaakula ni kukuuta kwakue, inzi apana bikitua. 12 Leeza waamulandile evi Rebeka: “Mukulu wakaaluka muzia wakue mwanike.” 13 Nga evelia vilandile Malembo nangue: “Naamutonene Yakobo, inzi naamusuulile Esau.”
14 Eba, tuli mukulanda nangue Leeza te wa nsambu? Ata, te evio. 15 Pantu Leeza waamulandile evi Musa: “Nakaba kumulangilila luse muntu onse unasaakula, kabili nakaba kumulangilila nkumbu muntu onse unatona.” 16 Pa kako, kekio te kiswapiile kutona kwa muntu ao kwikwinda kwakue,* inzi kiswapiile luse lwakue Leeza. 17 Pantu Lilembo lili lyalanda evi pa lwakue Farao:* “Naakikulekelela uye wakosele juu ya ezi nsambu: kulangilila maka ane kukonkana ni wewe, kabili evi liina lyane lipundue mu kyalo kyonse.” 18 Pa kako, Leeza ali wamulangilila luse muntu onse watonene. Inzi, ali walekelela muntu onse atonene kuya wali ni mutue uumine, aaluke ni mutue uumine.
19 Bange kunti bangipuzia evi: “Juu ya ki atwaliliile kukeba kilubo muli fwefue? Nani ali kupinga kutona kwakue?” 20 Inzi, we muntu wa bulebule uli ni, evi uvinde kulanda ovio pa lwakue Leeza? Eba, kintu kyaakitilue* kunti kyamulanda olia waakikitile* nangue: “Juu ya ki wewe waankitile nali evi?” 21 Eba, mubumbi tezi kusangua wali na nsambu ya kubombia kibumbuli kimonke kya bulongo evi kubumba katondo ka* kubombiiwa mu nzila ya mukinzi ni kange ka kubombiiwa mu nzila ya kawaida? 22 I vikili ni kuli Leeza. Wene waapingwile kulangilila kipuki kyakue kikata ni kulangilila buvinde bwakue wasipikiziizie ni kubapembelela sana baalia baamulengiizie afipue;* kabili babo bantu babanga bapalile kwinoonua. 23 Waakitile evio evi kulangilila bulumba bwakue bukata ku baalia bakapokelela luse lwakue.* Waabateaniizie evi kubapeela bulumba. 24 Fwefue tuli baalia baakuutilue na wene, apana sie kufuma mu Bayuda, inzi kabili ni mu ntundu inge. 25 Kili mukukitika nga evelia vikyaalandilue mu kitabu kya Hosea nangue: “Baalia basili bantu bane nakabakuuta ‘bantu bane,’ kabili mwanakazi asibanga watonenue wakakuutua ‘mutonua.’ 26 Kabili, ni ku fwasi kolia kubaali balandua nangue ‘te muli bantu bane,’ bakakuutua ‘baana bakue Leeza akosele.’”
27 Kukila pa kako, Isaya wapunda evi pa lwakue Israeli: “Ata sie kine mpendua ya Baisraeli kunti yaya yavulile nga musenga wa lyezi, banini sie* i bakapususiiwa. 28 Pantu Yehova* wakalomba mpendua ku baalia bekeele pa kyalo, kabili wakabapingula bila kukokola.” 29 Kabili, nga evelia vyaalandile Isaya nangue: “Kabenge Yehova* wa bisepe bya ba malaika taatusiliilepo kizazi,* twaasiile kwaluka nga Sodoma, kabili nga twaapaleene ni Gomora.”
30 Ale tuli kulanda ki? Nangue bantu ba ntundu inge baakilangilila kiketekelo, kabili bamwenue kuya baolokele ata sie kine te baali bakonkezia bintu byolokele. 31 Kabili nangue ata sie kine Baisraeli baali bakonkezia sheria ya kooloka, te baavindile kwikala kukonkana ni ezio sheria. 32 Juu ya ki? Pantu baaeziizie kukita evio kupitila bintu bibaali bakita, apana kupitila kulangilila kiketekelo. Baaiputeele ku “libue lili lyaiputaluako.” 33 Kili nga evelia vilandile Malembo nangue: “Mona! Nabiika libue mu Sayuni lelia lyakalengia bantu bakeputale, kabili kilibue kya kubaponia, inzi olia akiketekeele takaba kutyoka mutima.”