Yaandikilue na Mateo
8 Kisia Yesu kukooka kufuma ku lupili, bantu bengi sana baamukonkele. 2 Kabili mona! muntu umo olia waali walwele bukoma waaizile kuli Yesu ni kumufwinamina* walanda evi: “We Mulopue kine sie watona, nswesie.” 3 Kisia, Yesu waaolwele kuboko kwakue, waamukumiizie ni kumulanda evi: “Natona! Sweta.” Penka papo, bukoma bwakue bwaapwile. 4 Kisia, Yesu waamulandile evi: “Unvua, te kubwilako ata muntu. Inzi, endo waye wilangisie kuli koani, kabili ufumie ni bupe bolia bwaalandile Musa, evi ni bene basininkizie nangue wakosa.”
5 Lwaaingiile mu Kapernaumu, mukulu umo wa ba soda waaizile kuli wene, wamupapaata 6 walanda evi: “We Mulopue, mubombi wane aleele mu nsesi walwele bulebe, kabili ali mukwandua ni kwitensia.” 7 Waamulandile evi: “Lundi kwiza kwenu, ndi kumukosia.” 8 Ozo mukulu wa ba soda waamwasukile evi: “We Mulopue nsipalile kukupokelela ku nsesi yane. Inzi, landa sie kantu kamo ni mubombi wane ali kukosa. 9 Pantu ni nene ndi ni bantu bange bali bantungulula, kabili ndi ni ba soda bandi natungulula. Lundi namulanda ozu soda nangue ‘Endo waye!’ ali waya, ni lundi namwana ozu unge nangue ‘Iza!’ ali waiza. Kabili, lundi namwana mubombi wane nangue ‘Kita keki!’ ali wakita.” 10 Yesu lwaaunvwile ezio milandu, waapapile ni kubalanda evi baalia baali bamukonkele: “Namyana kisinka nangue mu Israeli, nsinamonemo ata muntu ali ni kiketekelo kikata nga keki. 11 Inzi, namyana nangue bantu bengi bakufuma kutula-koba ni kuzika-koba bakeza ni kwikala ku meza pamo ni Abrahamu, Isaka ni Yakobo mu Bukolo bwa ku muulu; 12 ata sie evio, baana ba bukolo bakapozua panze pa kafinzi. Koko, i ku bakalila ni kusyenkania meno abo.” 13 Yesu waamulandile evi olia mukulu wa ba soda, “Endo waye, kabili ikitike kuli wewe kukonkana ni kiketekelo kyobe.” Ni wenka ozo musita, ozo mubombi waakosele.
14 Yesu lwaaingiile mu nsesi yakue Petro, waamumwene mama muko wakue kwa Petro waleele waunvwile oma. 15 Kisia, Yesu waamukwete ku kuboko ni oma yabanga wali nayo yaapwile. Waabuukile ni kutendeka kumuteaniizia byakulia. 16 Luyaalukile kyungulo, Yesu baamuleteele bantu baali ni mipasi ibipile. Abanga wafumia ezio mipasi na kulanda sie, kabili waabakosiizie bonse baali balwele. 17 Waakitile evio evi kufikilizia milandu yakue nabi* Isaya, olia waalandile evi: “Wene mwine waatweme malwele etu ni misa yetu.”
18 Musita Yesu lwaamwene bantu bengi baali bamuzyungulukiile, waabalandile basambi bakue baye ku bwala bunge bwa lyezi. 19 Kisia, mwalimu umo wa sheria waaizile ni kumulanda evi Yesu: “We Mwalimu, nene nakaba kuya nakukonka konse kuwakaba waya.” 20 Inzi, Yesu waamwasukile evi: “Ba zenzembue bali ni mapala, ni toni twa mu muulu tuli ni binsua. Inzi, Mwana mwina muntu tali na fwasi pa kulaala.” 21 Umo pakati ka basambi waamulandile evi Yesu: “We Mulopue, ndekele ngiyenke muziike baba wane.” 22 Yesu waamulandile evi: “Wewe twalilila kukonka. Inzi, balekele bafwile baziike bantu babo bafwile.”
23 Kabili, Yesu lwaapilukile mu bwato, basambi bakue baamukonkele. 24 Kabili mona! mwela ukata waabuukile mu lyezi, ni mabimbi aali asempwila menda mu bwato. Inzi, Yesu waali waonene. 25 Kisia, baamukensiizie ni kumulanda evi: “We Mulopue tupususie, kwasyala tufue!” 26 Inzi, Yesu waabalandile evi: “Juu ya ki mwaunvua sana mwenzo* mwe bantu bali ni kiketekelo kinini?” Kisia, waabuukile ni kuusasilila mwela pamo ni lyezi. Penka papo, mwela ni lyezi byateekameene sana. 27 Pa kako, basambi baapapile balanda evi: “Emue, ozu muntu ni wa syani? Ata sie mwela ni lyezi byamunvua.”
28 Yesu lwaafikile ku bwala bunge mu kyalo kya Bagadarene, balalume babili baalia baali ni mipasi ibipile, baafumine ku mankabuli* baiza basaakaane nakue. Baali basasile sana, kabili te kwali ata muntu waali waezia kupita mu ozo musebo. 29 Kabili mona! baasamwine balanda evi: “We Mwana mwina Leeza, waiza wakonkele ki konu? Eba, waiza kututesa ni musita ubiikilue teunakumane?” 30 Pepi ni ezio fwasi ibabanga balipo, kubanga kwali libumba likata lya ba ngulube babanga balia. 31 Pa kako, elia mipasi ibipile yaabambile kumupapaata Yesu yali mukulanda evi: “Kine watukuumba, tulande tuye mu lelia libumba likata lya ba ngulube.” 32 Yesu waailandile evi ezio mipasi ibipile: “Endo mwaye!” Kisia, yaafumine ni kuya kwingila mu ngulube. Kabili mona! lelio libumba lyonse lya ba ngulube lyaasaamukiile mu kiponga* ni kwipoza mu lyezi ni kufwila mu menda. 33 Inzi, basungi baabutukile ni kuya kwingila mu muzi. Baalandile kila kintu kyaakitikile pamo ni mpunda palua baalia balalume baali ni mipasi ibipile. 34 Kabili mona! bantu bonse ba mu muzi baaile kusaakaana ni Yesu. Kabili lubaamumwene, baamupapaatile afume koko.