Mukanda ku Baroma
2 We muntu, ata sie kine uli ni, te uli na nsambu ya kwisakila kine uli wapingula bange palua bintu byenka belia byuli wakita ni wewe. Musita luuli wabapingula, uli waipingula we mwine. 2 Tumanine nangue musita Leeza lwali wapingula bantu bali bakita bintu bya evio, bupinguzi bwakue buli bwasangua bwapateene ni kisinka.
3 We muntu, eba umwene nangue wakaba kupaanda ku bupinguzi bwakue Leeza, musita luuli wapingula bantu bali bakita bintu bya evio ni koku wewe wali mukubikita? 4 Ao eba, uli mukufuupula buwame bwakue bukata, kweleela ni kupembelela kwakue? Eba, te winikile nangue Leeza ali mukwikwinda kukukwasia kupitila buwame bwakue evi ulapile? 5 Inzi, pantu mutima obe uumine, kabili pantu uli mukukaana kulapila, kakiine Leeza wakaba kukupingula mu busiku bwa kipuki kyakue kikata, musita lwakaba kulangilila bupinguzi bwakue bolokele. 6 Kabili, wakamulipa kila muntu kukonkana ni bintu byali wakita. 7 Wakabapeela bukose bwa lonse baalia batwaliliile kukita bintu biweme. Bantu ba evio bali mukukeba bulumba, mukinzi ni bukose bwa lonse. 8 Inzi, Leeza wakaba kubalangilila kipuki kikata baalia bali batona kukankabula ni baalia basizi kunakila kisinka. 9 Kila muntu, aye wali Muyuda ao Mugiriki, olia ali wakita bintu bya kukisia wakapatua na lyemo ni bulanda. 10 Inzi, kila muntu olia ali wakita bintu biweme wakaba kupata bulumba, mukinzi ni mutende, kutendekela ku Bayuda, kabili ni ku Bagiriki. 11 Leeza tali na kapaatulula.
12 Baalia bonse baakitile lizambi bila sheria, bakafua bila sheria. Inzi, baalia baakitile lizambi pensina sheria, bakapingulua na ezio sheria. 13 Baalia bali baunvua sheria te bamwenue kuya baolokele ntanzi yakue Leeza, inzi baalia bali bakita kukonkana ni sheria bakapundua kuya baolokele. 14 Bantu basili Bayuda te bali na sheria. Inzi, musita lubali bakita bintu bili byaiza sie biine ni kukita bintu kukonkana ni sheria, babo bantu balangiliile nangue sheria ili mukati mwabo. 15 Bali balangilila nangue bintu belia bili byasambilizia sheria byandikilue mu mitima yabo, ni zamiri yabo ili yasininkizia kekio. Mawazo abo bene ali abasitaka ao ata sie kubasakila. 16 Kekio, kyakakitika musita Leeza lwakapingula kupitila Kristu Yesu bintu bifyeme bya bantu, kukonkana ni mpunda iweme indi napunda.
17 Wewe uli waikuuta Muyuda, uswapiile sheria, kabili uli waitanka muli Leeza. 18 Kabili umanine kutona kwakue Leeza ni kwitabila bintu biwamiisie pantu wewe waasambiliziiziwe na Sheria. 19 Usininkiziizie nangue uli watungulula mpofu, kabili uli musaniko ku baalia bali mu kafinzi. 20 Umwene nangue kunti waolola ba bipuba, kabili nangue kunti wabasambilizia baanike, pantu uli ni buvinde bwa musinzi bwa kwinika ni kumana kisinka kili mu Sheria. 21 Ata sie kine kili evio, eba wewe uli wabasambilizia bange inzi we mwine bila kuya waisambilizia? Wewe ali wasimikila nangue “Te kuya waiba,” eba, uli waiba? 22 Wewe ali walanda nangue “Te kukita bukende,” eba, uli wakita bukende? Wewe ali walanda nangue usuulile mikisi, inzi eba uli waiba mu ma ekalu? 23 Wewe uli waitanka pantu umanine sheria yakue Leeza, inzi eba, uli waandua kumukindika Leeza kupitila kutyona Sheria? 24 Nga vilandile Malembo nangue “liina lyakue Leeza lili mukuzyelekaniiwa pakati ka bantu ba ku kyalo* juu yenu.”
25 Kakiine, kutairiwa kuli ni faida kine sie uli wakonka sheria. Inzi, kine watyona sheria kili sie nga evelia wewe asitairiiwe ata kanini. 26 Pa kako, kine muntu asitairiiwe akonkele malaizio olokele ali mu Sheria, Leeza ali kumumona nga evelia atairiiwe, eba te evio? 27 Mwaasambiliziiziwe palua kutairiwa ni palua Sheria yandikilue, inzi te muli mukuikonka. Pa kako, musita muntu asitairiiwe lwali wakonka Sheria ali wamipingula. 28 Muntu kuya wali Muyuda kakiine te kwa panze, kabili kutairiwa kwa kisinka kubiikile mukati bintu bingi kukila pa mubili umonekele. 29 Muntu kuya wali Muyuda kakiine kubiikile mukati bumuntu bwa mukati; kabili kutairiwa kwakue, kwene ni kolia kwa mu mutima kupitila mupasi utakatifu, apana kupitila kukonka Sheria yandikilue. Ozo muntu, ali watasiiwa na Leeza, apana na bantu.