Mukanda wa Kwanza ku Bakorinto
5 Lonu, naunvua nangue pakati kenu pali mukukitua bukambue.* Kabili, bobo bukambue* bubipile sana, pantu tebwizi kunvwika ata sie pakati ka bantu basizumiine.* Naakibwilua nangue kuli mwalalume umo ali waikala ni* muka baba wakue. 2 Eba, muli mukwitasia palua kekio kintu? Eba, te mupalile kukisua evi ozo muntu ali mukukita kekio kintu afumiiwe pakati kenu? 3 Ata sie kine nsili koko kimubili, kimupasi, ndi koko. Kabili, naakimupingula kale ozo mwalalume ali mukukita evio nga nene ali koko pamo nenu. 4 Musita umuli mwakolonghana pamo mu liina lyakue Mulopue wetu Yesu, mane nangue ndi nasangua pamo nenu mu mupasi, pamo ni buvinde bwakue Mulopue wetu Yesu. 5 Mupalile kumupeela Sataana muntu wa evio juu ya kwinoonua kwa mubili,* evi mupasi uweme wa kilonghaano upususiiwe mu busiku bwakue Mulopue.
6 Te kili bwino kuya mwaitantamuna palua ezio aali. Eba, te mumanine nangue levire* inini ili yasalanghana ku mukusu onse? 7 Fumie levire ya kale evi mwemue mwaluke mukusu wa lenu, pantu te muli na levire.* Kristu, mwana-mukooko wetu wa Pasaka, waafumiiziwe evi aye wali zabiu. 8 Kansi, tupalile kukita Nsikunkulu ya Pasaka, apana na mikate iliko levire ya kale, ao iliko levire ya lizambi ni bubifi, inzi na mikate isiliko levire, elia ilangiliile kintu kiweme, kabili kya kisinka.
9 Mu mukanda wane, naakimyandikila evi mulekele kupisia musita pamo ni bantu ba bukambue.* 10 Nsyakiba nalandila palua bantu ba mu kenu kyalo baalia bali bakita bukambue,* ao bali ni pupa, ao ba kabooko,* ao baalia bali bapupa mikisi. Kine ni evio, kakiine kili kulomba mufume mu kyalo. 11 Inzi, lonu namyandikila evi mulekele kupisia musita pamo ni muntu onse ali wakuutua lupua olia ali wakita bukambue,* ao ali ni pupa ao ali wapupa mikisi ao ali watukana* ao kyakolua ao kabooko.* Te mupalile ata sie kulia na muntu wa evio. 12 Kupingula baalia bali panze pa kilonghaano te miilo yane. Eba, mwemue te mupalile kupingula baalia bali mu kilonghaano, 13 musita Leeza lwali mukupingula baalia bali panze? “Fumie mubifi pakati kenu.”