Mukanda wa Kwanza ku Batesalonika

1 Nene Paulo, ndi pamo ni Silvano* ni Timoteo. Naandikila kilonghaano kili ku Tesalonika kelia kili mu buumo ni Leeza Baba ni Mulopue Yesu Kristu:

Buwame bwakue Leeza* ni mutende biye byali pamo ni mwemue.

2 Lyonse, tuli twamutasia Leeza musita utuli twamizimbula mwe bonse mu mapepo etu, 3 pantu tutwaliliile kulanguluka miilo yenu isonseziiziwe na kiketekelo, kwikwinda kwenu konse kolia kusonseziiziwe na ntono, pamo ni kusipikizia kwenu juu ya kiswapilo kimuli nakio muli Mulopue wetu Yesu Kristu, ntanzi yakue Leeza wetu kabili Baba. 4 Mwe ba lupua batonenue na Leeza, tumanine nangue wene waamisaakwile, 5 pantu mpunda iweme ituli mukusimikila, te yaaizile kuli mwemue kupitila milandu sie, inzi kabili yaaizile kupitila buvinde, kupitila mupasi utakatifu ni kupitila busininkizio buli ni maka. Kabili, mumanine kine twaalukile bantu ba syani pakati kenu juu yenu. 6 Kukila pa kako, mwemue mwaakonkele mufuano wetu ni wakue Mulopue, pantu mwaaitabiile mulandu mwali ni nsansa elia ili yaletua na mupasi utakatifu ata sie kine mubanga mwali mu meezio engi, 7 ni pa kako, mwaalukile mufuano ku baalia bonse bazumiine mu Makedonia ni mu Akaya.

8 Kisinka ni keki, mulandu wakue Yehova* kufuma kuli mwemue te waakyunvwika sie mu Makedonia ni mu Akaya, inzi waakyunvwika ni mu fwasi yonse, kabili ni kiketekelo kyenu kyaakisalanghana mu fwasi yonse, ni pa kako, te tuli na lazima ya kulanda kantu ata kamo; 9 pantu bantu ba mu ezio fwasi batwaliliile kuleta mpunda palua musita utwaasaakeene ni mwemue lya kwanza ni vimwaalekeele kupupa mikisi yenu evi kutendeka kumubombela Leeza akosele, kabili wa kisinka, 10 ni kumupembelela Mwana wakue kufuma ku muulu. Leeza waamufufwile ozo Mwana kufuma ku bafwile, i kulanda, Yesu, olia wakaba kutupususia ku kipuki kikata kyakue Leeza kelia kili mukwiza.