Mukanda ku Baroma
13 Kila muntu aye* wanakila buteeko buli bwatuteeka,* pantu te kuli buteeko buliko bila bwaitabiziiziwe na Leeza. Buteeko buliko lonu, bubiikilue na Leeza pa fwasi ilingiliile. 2 Pa kako, olia onse ali wapinga buteeko, wapinga mupango wakue Leeza. Baalia bali bapinga ozo mupango bakapingulua.* 3 Ba kateeka te bezi kutiinua na baalia bali bakita bintu biweme, inzi bali batiinua na baalia bali bakita bintu bibipile. Eba, utonene te kunti uye watiina buteeko? Twalilila kukita bintu biweme, kabili bwakaba kukutasia. 4 Leeza ali mukububombia juu ya faida yobe. Inzi, kine wewe wakita bintu bibipile, uli ni nsambu ya kuya waunvwile mwenzo; pantu bwene bwaapeelue nsambu ni maka a kulapizia baalia bali bakita bibipile. Bwene buli bwabombiiwa na Leeza evi kumulapizia olia ali wakita bibipile.
5 Kuli nsambu iweme ipalile kumilengia muye mwanakila, apana juu ya kutiina sie kulapiziiwa, inzi kabili juu ya kunti mutwalilile kuya mwali ni zamiri iweme. 6 Kekio, i kilengiizie muye mwalipa ni bitansi.* Pantu ba kateeka, bene ni babombi bakue Leeza baalia bali babomba lyonse palua wenka ozo mupango. 7 Bapeele bonse belia bibapalile kupeelua. Olia walomba kitansi, mulipe kitansi; olia walomba muniengia, mupeele muniengia; olia walomba kutiinua, mutiine; olia walomba mukinzi, mukindike.
8 Tekuye mwali ni lideni ata limo ku muntu onse, inga sie kuya mwatoneene, pantu olia onse atonene muntu mwinakue wafikilizia sheria. 9 Pantu, sheria elia ilandile nangue, “Te upalile kukita bukende, te upalile kwipaya, te upalile kwiba, te upalile kutamani,” pamo ni malaizio ange onse alia ali mu Sheria bikakilue pamo mu bobu bulanzi: “Upalile kumutona mwikazi nobe nga viwitonene we mwine.” 10 Ntono teizi kumukitila mwikazi nakue bintu bibipile, pa kako ntono ili yafikilizia sheria.
11 Mupalile kukita evio, pantu mumanine nangue musita wa kunti mubuuke kufuma mu tulo ufikile. Lonu, bupusuko bwetu bwakila kupalama kuliko musita utwaazumiine. 12 Nsita ya busiku yaya sana; kwasyala bukie. Pa kako, tupalile kulekela kukita bintu bya nfinzi, kabili tupalile kuvwala bintu bya mwangaza bya kulwaninako. 13 Kansi, tuye twaenda mu nzila ipalile* nga mu nsita ya koba. Apana kupitila kwisansamusia mu nzila ya kinvulunghania* ni kukolua, mu lwendo lwa bukambue ni lwendo lubipile lwa bila busoni,* mazibo, ao kwaluka ni bwivu. 14 Inzi, konke mu pepi mufuano wakue Mulopue Yesu Kristu, kabili tekuye mwapanga ntanzi ya musita kufikilizia tama ya lizambi.*