Yaandikilue na Marko
15 Luyaalukile sie lukele-keele koba kasyatula, bakulu ba ba makoani pamo ni bantu bakotele ni ba kalemba ba sheria, i kulanda, Sanedrini yonse, baakolongheene pamo evi bakwate mupango pa lwakue Yesu. Kisia kumukaka Yesu, baamutweme ni kuya kumubiika mu minue yakue Pilato. 2 Pa kako, Pilato waamwipuziizie evi: “Eba, wewe i Likolo wa Bayuda?” Yesu waamwasukile evi: “We mwine i walanda.” 3 Inzi, bakulu ba ba makoani baali bamusongela bintu bingi. 4 Pilato waabambile kumwipuzia ni linge walanda evi: “Te uli mukwasuka? Eba, te unvwile bintu bwingi bibali mukukusongela?” 5 Inzi, Yesu taasukile ata kantu, pa kako Pilato waapapile.
6 Mu kila nsikunkulu ya pasaka, Pilato waali wazoweye kubakakwila muntu umo akakilue olia ubaali balomba. 7 Ozo musita, kubanga kwali muntu umo olia waali wakuutua Baraba. Wene pamo ni bange baalia baali bakakilue nakue mu prizo, baapingile buteeko ni kwipayana. 8 Pa kako, bantu bengi baaizile ni kubamba kumulomba Pilato akite kelia kyabanga wazoweye kubakitila. 9 Pilato waabaasukile evi: “Ati, mutonene mikakwile Likolo wa Bayuda?” 10 Pantu Pilato waainikile nangue bwivu i bwaabalengiizie bakulu ba ba makoani bamubiike Yesu mu minue yakue. 11 Inzi, bakulu ba ba makoani baabasonseziizie babo bantu bengi balande Baraba akakulue kuliko kumukakula Yesu. 12 Pilato waabepuziizie evi ni linge: “Ale nene mukite syani ozu umuli mwakuuta nangue Likolo wa Bayuda?” 13 Baatwaliliile kupunda balanda evi: “Akonkomenue pa kimuti!”* 14 Inzi, Pilato waabepuziizie kabili evi: “Juu ya ki? Ozu muntu waakiluvia ki?” Inzi, bantu bonse baasamwine sana ni linge, balanda evi: “Akonkomenue pa kimuti!”* 15 Pa kako, pantu Pilato waatonene kubasansamusia babo bantu bengi, waabakakwiliile Baraba; kabili kisia kulaizia bamuvipule Yesu, waamubiikile mu minue yabo evi bamwipaye pa kimuti.
16 Kisia, ba soda baamutwele mu musolo, i kulanda, ku musolo wa nsesi yakue guvernere, kabili baakuutile ba soda bonse bakolonghane. 17 Baamuvwikile ngubo ya rangi ya kafichongo, kisia baalemene taazi* ya myunga-myunga ni kumuvwika; 18 kabili baabambile kumulanda evi: “Mwapola* we Likolo wa Bayuda!” 19 Kabili, baali bamuuma na litete ku mutue ni kumutiila mate, kisia baamufukamiine ni kumufwinamina.* 20 Lubaapwile kumupunika, baamuvuulile elia ngubo ya rangi ya kafichongo ni kumuvwika maubo akue a panze. Kisia, baamutwele panze evi bamukonkomene pa kimuti. 21 Kabili, baamupatikiziizie mupitanzila umo olia abanga wafuma ku makaba, waali wakuutua Simoni wa ku Kirene, baba wakue kwa Aleksanda ni Rufo, evi atwame kimuti kya mateso* kyakue Yesu.
22 Kisia, baamutwele Yesu ku fwasi yaali yakuutua Golgota, ozu mulandu kine wapilibulua uli na mana ya, “Fwasi ya Kabongozio.” 23 Lubabanga bali pa ezi fwasi, baaeziizie kumupeela divai ili yakolana yalimo minti, inzi waakeene kumina. 24 Baamukonkomeene pa kimuti, kabili baakaseene maubo akue a panze kupitila kusaapa bubale evi bamone kine kila soda ali kutwamapo ki. 25 Ibanga yasyali mu ma nevere (9:00) ya lukele-keele, musita Yesu lubaamukonkomeene pa kimuti. 26 Baalamikilepo lubao lubabanga baandikilepo nsambu yaalengiizie Yesu epaiwe, baandikilepo evi: “Ozu i Likolo wa Bayuda.” 27 Kukila pa kako, baakonkomeenepo ni ba kabooko babili pa bimuti mu mbali yakue, umo ku kuboko kwakue kwa kulio ni unge ku kuboko kwakue kwa kuso. 28* —— 29 Ni bapitanzila babanga bamutuka bapukumia mitue yabo, balanda evi: “O mone! Wewe wakiba wakebele kutuuta ekalu ni kuikuula mu nsiku itatu, 30 iipususie we mwine, kooka pa kimuti kya mateso.”* 31 Bakulu ba ba makoani ni ba kalemba ba sheria ni bene babanga bamuseka pakati kabo, balanda evi: “Bange bene waabapususiizie, inzi waandua kwipususia wene mwine! 32 Ale kansi Kristu, Likolo wa Baisraeli, akooke pa kimuti kya mateso* evi tumone ni kuzumina.” Ata sie baalia babanga baakonkomeenue pa bimuti mu mbali yakue, ni bene babanga bamupunika.
33 Luyaalukile mu ma duzere (12:00) mpaka mu ma trwazere (3:00) ya kyungulo, mu kyalo kyonse mwaalukile kafinzi. 34 Ni mu ma trwazere (3:00) ya kyungulo, Yesu waapundile wasamwine, walanda evi: “Eli, Eli, lama sabaktani?” ezi milandu kine yapilibulua ili na mana ya, “We Leeza wane, We Leeza wane, juu ya ki wandekelela?” 35 Kabili, bantu bamo pa baalia babanga baimeene pepi lubaaunvwile ezio milandu, baabambile kulanda evi: “Unvue! Ozu muntu ali mukumukuuta Eliya.” 36 Kisia muntu umo waakundukile, watwama shifo ni kutubia mu divai ilulile, waatungikile shifo ku litete ni kumupeela amine, walanda evi: “Muleke! Ele tumone kine Eliya ali kwiza kumukoosia.” 37 Inzi, Yesu waapundile wasamwine, ni kufua.* 38 Kisia, rido ya patakatifu yaakatikilemo bipande bibili, kutendekela ku muulu mpaka kwinsina. 39 Mukulu wa ba soda olia abanga waimene wamukentele Yesu, lwaamwene aali yaafwiliilemo, waalandile evi: “Kakiine ozu muntu wakiba wali Mwana mwina Leeza.”
40 Kubanga kwali ni banakazi baali bakenteleele baaimeene lwa kule. Pakati kabo, pabanga pali Maria Magdalene, Maria mama wakue kwa ba Yakobo Mwanike* ni Yose, pamo ni Salome, 41 baalia babanga bamukonka ni kumukwasia lwabanga wali ku Galilaya, pamo ni banakazi bange bengi baalia baaizile pamo ni Yesu ku Yerusalemu.
42 Pantu ibanga yasyali kyungulo ni koba kasyaile, kabili pantu bubanga bwali busiku bwa Kuteania, i kulanda, busiku bubanga bwakonkelepo bubanga bwali busiku bwa Sabata, 43 kwaaizile muntu umo olia abanga wakuutua Yosefu wa ku Arimatea, muntu waali wakindikilue mu tribinali ya diini ya Bayuda,* ni wene abanga wapembeele Bukolo Bwakue Leeza. Waaikoseleziizie ni kuya kuli Pilato ni kumulomba mubili wakue Yesu. 44 Inzi, Pilato waatonene kumana kine Yesu abanga wasyafwile, pa kako, waamukuutile mukulu wa ba soda ni kumwipuzia. 45 Lwaamanine nangue Yesu abanga wasyafwile, waamwitabiziizie Yosefu atwame mubili. 46 Kisia Yosefu kusita ngubo ya kitani kyaweme ni kusaamuna mubili wakue Yesu, waamukunziliile mu ngubo ya kitani kyaweme ni kuya kuubiika mu mankabuli* alia abanga aimbilue mu kilibue. Kisia, waatintile libue mpaka pa lipulo lya mankabuli. 47 Inzi, Maria Magdalene pamo ni Maria mama wakue kwa Yose baatwaliliile kukenta paalia paaziikilue Yesu.