Mukanda wa Bubili ku Batesalonika
3 Kupwako, mwe ba lupua, twalilile kupepa pa lwetu evi mulandu wakue Yehova* utwalilile kusalanghana lubilo ni kulumbaniiwa nga evelia vikili mukukitika kuli mwemue. 2 Kabili, pepe evi tupususiiwe ku bantu bali bakisiana ni babifi, pantu kiketekelo tekizi kusangua na bantu bonse. 3 Inzi, Mulopue wene ni wa kisinka, kabili wakaba kumipeela maka ni kumisunga kufuma kuli olia mubifi. 4 Kukila pa kako, tusininkiziizie muli Mulopue pa lwenu nangue muli mukukonka malaizio etu, kabili nangue mwakaba kutwalilila kuakonka. 5 Kansi, Mulopue atwalilile kutungulula mitima yenu evi mumutone Leeza ni kulangilila mibele ya kusipikizia pa lwakue Kristu.
6 Mwe ba lupua, lonu twamipeela aza malaizio mu liina lyakue Mulopue wetu Yesu Kristu: Seelukile kule ni lupua onse ali mukwenda mu nzila ya kinvulunghania, kabili asizi kukonka malaizio* amwaapokeleele* kufuma kuli fwefue. 7 Mwe bene mumanine vimupalile kukonka mufuano wetu, pantu te twaakitile bintu mu nzila ya kinvulunghania pakati kenu, 8 ao sie kulia kyakulia kya muntu kwa bule.* Inzi, busiku ni koba twaali twabomba miilo ikolele, kabili ya kutopia evi te kunti tumutwike muntu ata umo pakati kenu mutembo ufinine. 9 Te twaakitile evio juu ya kupusa nsambu, inzi twaakitile evio pantu twaatonene kwipeela evi kumisiila mufuano wa kukonka. 10 Kakiine, lutwaali pamo nenu, twaali twamipeela aza malaizio: “Kine muntu tatonene kubomba, ni kulia te kunti alie.” 11 Pantu tuli mukunvua nangue bamo pakati kenu bali mukwenda mu nzila ya kinvulunghania; bene te bali mukubomba ata kanini, inzi bali mukwiingizia mu bintu nghwana. 12 Babo bantu, twabalanda ni kubasonsezia mu liina lyakue Mulopue Yesu Kristu nangue, bapalile kuya bateekameene mu bwikazi, kabili baye babomba ni kulia kyakulia kibaakipata bo bene.
13 Inzi mwe ba lupua, tekulekele kukita bintu biweme. 14 Kine umo pakati kenu tali mukunakila milandu yetu ili mu ozu mukanda, mubiike alama, kabili lekele kupisia musita pamo nakue evi onvue busoni. 15 Ata sie kine kili evio, tekumumone kuya wali mulwani, inzi twalilile kumusoka pantu wene ni lupua wenu.
16 Kansi lonu, Mulopue wa mutende atwalilile ye mwine kumipeela mutende mu kila nzila. Mulopue aye wali pamo ni mwe bonse.
17 Leli ni lyambo lyane, linaandika na kuboko kwane, ne Paulo; evi i vindi naandika ni kusinia mikanda yane yonse.
18 Buwame* bwakue Mulopue wetu Yesu Kristu buye bwali pamo ni mwe bonse.