Mukanda wa Bubili ku Bakorinto
13 Leli i lya butatu lindi kwiza kwenu. “Bintu byonse bipalile kusininkiziiwa na busininkizio bwa* bantu babili ao batatu.” 2 Ata sie kine lonu nsili koko, kili sie nga evelia nene ali koko mara ya bubili. Kabili, nabasokela mbela baalia baakitile mazambi lwa ntanzi ni bange bonse, nangue kine naiza kabili koko nsikaba kubalangilila luse, 3 pantu muli mukukeba busininkizio bulangiliile nangue Kristu, olia asili mutope pali mwemue inzi olia alumine pakati kenu, ali mukulanda kakiine kupitila nene. 4 Kakiine, waaipailue pa kimuti juu ya butope,* inzi akosele juu ya maka akue Leeza. Kisinka, ni fwefue tuli batope nga evelia vyabanga wali, inzi twakekala pamo nakue pantu maka akue Leeza ali mukubomba pali mwemue.
5 Twalilile kwitoosia evi kumona kine muli mu kiketekelo; twalilile kusininkizia evi kumona kine mwemue muli syani. Ao, eba te mwinikile nangue Yesu Kristu ali mu buumo pamo ni mwemue? Inga sie kine mukeenue. 6 Nswapiile kakiine nangue mwakaba kwinika nangue fwefue te tukeenue.
7 Lonu, tuli mukupepa kuli Leeza evi te kunti mukite kintu ata kimo kibipile; te tuli mukupepa evi tumoneke kuya twaitabiilue, inzi tuli mukupepa evi mukite bintu biweme ata sie kine fwefue kunti twamoneka kuya twakeenue. 8 Pantu tetuvinda kukita kintu ata kimo kipuseene ni kisinka, inga sie kubomba evi kulengia kisinka kiye ku ntanzi. 9 Kakiine, tuli twasekelela musita onse utuli batope, inzi mwemue muli ni maka. Kabili tuli mukupepa evi mwaluke ba lenu. 10 Kekio i kyalengia myandikile bebio bintu musita unsiliko, evi musita unakaba kuya nali koko, te kunti nkabe kuya nasasile mu kubombia buvinde bunaapeelue na Mulopue. Buvinde bunaapeelue, te bwa kumituutilako, inzi ni bwa kumikuulilako.
11 Kupwako, mwe ba lupua, twalilile kusekelela, kwalulua ba lenu, kukoseleziiwa, kuya mwapateene mu mawazo, kuya mwaikeele kwa mutende; ni Leeza wa ntono, kabili wa mutende wakaba kuya wali pamo nenu. 12 Poziane na beze itakatifu. 13 Batakatifu bonse bamipozia.
14 Buwame* bwakue Mulopue Yesu Kristu, ni ntono yakue Leeza pamo ni bintu biweme bimuli mukupata mwe bonse kupitila mupasi utakatifu, biye byali pamo ni mwe bonse.