Mukanda ku Bagalatia
2 Kisia myaka likumi na ina (14), naapilukiile kabili ku Yerusalemu pamo ni Barnaba, kabili naaile pamo ni Tito. 2 Naapilukiile koko juu ya belia binaafiikwiliilue, kabili naabalangiliile ba lupua mpunda iweme indi mukusimikila pakati ka ntundu. Inzi, naasaakeene sie ni ba lupua baalia babanga bakindikilue sana, evi kusininkizia kine miilo inaali nakita ao elia inaakitile te ibanga yali ya mpuni. 3 Ata sie kine Tito, olia waali pamo ni nene, abanga wali Mugiriki, taapatikiziiziwe kutairiwa. 4 Inzi, kwaalukile bwavia juu ya ba lupua ba bufi baalia baaingiziiziwe bafyaminiine; bene baaingiile kwa siri evi bapelelezie uru utuli twasekelela mu buumo ni Kristu Yesu, evi batwalule bazia kakiine; 5 te twaabatwiliziizie, ata, bila kanini,* evi kisinka kya mpunda iweme kitwalilile kuya kyali pamo ni mwemue.
6 Inzi, baalia babanga bamwenekele kuya bali ba mana, kakiine te baangongeziiziepo kantu ata kamo ka lenu. Ata sie kine lwa ntanzi babanga bali bantu ba syani, nene nsimwenepo kantu, pantu Leeza tezi kupingula kukonkana ni kumoneka kwa panze. 7 Kupusana ni kekio, musita ubaamwene nangue naapeelue mpunda iweme palua baalia basitairiiwe, nga evelia Petro vyaapeelue mpunda iweme palua baalia batairiiwe— 8 pantu olia waamupeele Petro buvinde bwa kuya wali mutumua ku baalia batairiiwe, waampeele ni nene buvinde ku bantu ba ntundu— 9 kabili musita ubaainikile nangue naapeelue buwame bwakue Leeza,* ba Yakobo, Kefa* ni Yoane, baalia babanga bamwenekele kuya bali nga mapumpu, baampoziizie nene pamo ni Barnaba na kuboko kwa kulio. Ezio ibanga yali alama ya kulangilila nangue tuli twabomba mu kimo, evi fwefue tuye ku bantu basili Bayuda,* inzi bene baye ku baalia batairiiwe. 10 Bene baatulombele sie kuya twabapozeleko mano bapabi, kabili naakikwinda sana kukita evio.
11 Inzi, musita Kefa* lwaaizile ku Antiokia, naamusasiliile pantu kyaali kyamwenekele paswetele nangue waaluviizie.* 12 Pantu ntanzi bantu bamo tebanafike kufuma kuli Yakobo, Kefa* abanga walia kyakulia pamo ni bantu ba ntundu. Inzi musita babo bantu lubaafikile, waalekeele kukita evio ni kwitenga. Waali watiina bantu ba mu kikundi kya baalia babanga batairiiwe. 13 Bayuda bange, ni bene baaiungile nakue mu bobo bunafiki, kabili baamwingiziizie ni Barnaba mu bobo bunafiki bwabo. 14 Inzi, lunaamwene nangue te baali baenda kukonkana ni kisinka kya mpunda iweme, naamulandile evi Kefa* ntanzi yabo bonse: “Ata sie kine wewe uli Muyuda, wikeele nga bantu bange,* te wikeele nga Bayuda. Ale juu ya ki ukebele kubapatikizia babo bantu bange bekale kukonkana ni desturi ya Bayuda?”
15 Fwe Bayuda mu kuvyalua, kabili basili na mazambi kufuma ku ntundu, 16 tumanine nangue muntu tezi kupundua kuya waolokele kupitila kukita bintu bilombelue na sheria, inzi sie kupitila kumuketekela Yesu Kristu. Pa kako, twaakilangilila kiketekelo kyetu muli Kristu Yesu evi tupundue kuya twaolokele kupitila kumuketekela wene, apana kupitila kukita bintu bilombelue na sheria, pantu te kuli muntu* wakapundua kuya waolokele kupitila kukita bintu bilombelue na sheria. 17 Kine lonu twaakipatua kabili kuya twali ba mazambi lutuli mukukeba kupundua kuya twaolokele kupitila Kristu, eba manake Kristu waaluka mubombi wa lizambi? Ata, te evio! 18 Kine nabwela kukuula bintu belia binaatuutilenke, ndi kulangilila nangue ndi wa bilubo. 19 Pantu naakonkele sheria, naafwile palua sheria evi ngiye nakosele pa lwakue Leeza. 20 Nkonkomeenue pa kimuti pamo ni Kristu. Nene nsikeele kabili juu yane ne mwine, inzi ngikeele bwikazi buli mu buumo ni Kristu. Kakiine, mu bukose bwa kimubili bundi nabo lonu, ngikeele kupitila kumuketekela Mwana mwina Leeza, olia waantonene ni kwipeela mwine juu yane. 21 Nene nsikeene* buwame* bwakue Leeza, pantu kine kooloka kuliko kupitila sheria, kansi Kristu waafwile kya mpuni.