Mukanda ku Bagalatia
3 Mwe Bagalatia basili na mano! Nani waakimisonsezia mu bintu bibipile? Pantu lwa ntanzi, mwaapatile masambilizio onvwikile bwino palua lufu lwakue Yesu Kristu pa kimuti. 2 Nkebele kumiipuzia keki kipuzio:* Eba, mwaapokeleele mupasi kupitila kukita bintu bilombelue na sheria, ao mwaaupokeleele juu ya kuketekela bintu bimwaaunvwile? 3 Eba, mwemue mupusilue mano sana? Kisia kutendeka lwendo lwa kimupasi,* ale mwaya kupeleela syani ku lwendo lwa kimubili?* 4 Eba, mwaasipikiziizie maavia engi evio kya mpuni? Nene nsininkiziizie kakiine nangue te mwaakitile evio kya mpuni! 5 Pa kako, olia ali wamipeela mupasi ni kukita bimpezia mano* pakati kenu, eba ali wakita evio pantu mwemue muli mwakita bintu bilombelue na sheria ao pantu muketekeele bintu bimwaaunvwile? 6 Kili sie nga evelia vikyaali kuli Abrahamu, wene “waamuketekeele Yehova,* kabili waamwenue kuya waolokele.”
7 Kakiine, mumanine nangue baalia balamatiliile ku kiketekelo i baana bakue Abrahamu. 8 Leeza waalandile ntanzi mu Malembo nangue wakabapunda bantu ba ntundu kuya baolokele juu ya kiketekelo kyabo. Kabili, wene waapundile ntanzi ya musita ezio mpunda iweme kuli Abrahamu lwaalandile nangue: “Kupitila wewe, ntundu yonse yakapaalua.” 9 Pa kako, baalia bali balaminina ku kiketekelo, bali mukupaalua pamo ni Abrahamu, olia abanga wali ni kiketekelo.
10 Baalia bonse baswapiile bintu bilombelue na sheria, balainiiwe, pantu Malembo alandile nangue: “Muntu onse asitwaliliile kukita bintu byandikilue mu kitabu kya kukunzua kya Sheria, apalile kulainiiwa.” 11 Kukila pa kako, kimwenekele paswetele nangue te kuli muntu apundilue ntanzi yakue Leeza kuya waolokele kupitila sheria, pantu “muntu olokele wakeekala juu ya kiketekelo kyakue.” 12 Lonu, Sheria te iswapiile kiketekelo. Inzi, “olia onse ali wakita bebi bintu, wakaba kwikala kupitila bebio bintu.” 13 Kristu waatusitile ni kutukakula kufuma mu laana ya Sheria lwaalukile laana pa fwasi yetu, pantu Malembo alandile evi: “Olia onse akonkomeenue pa kimuti, alainiiwe.” 14 Kyaakitikile evio evi mpaalo yakue Abrahamu ize ku ntundu kupitila Kristu Yesu, evi kupitila kiketekelo kyetu, tupokelele mupasi olia waalailue.
15 Mwe ba lupua, nalanda kukonkana ni fwe bantu vituli twakita: Bantu kine bakita mapatano, ata sie kine aitabilua na muntu umo sie, te kuli muntu ali kuatyona ao kongeziapo kantu. 16 Abrahamu waalailue pamo ni kizazi kyakue.* Lilembo te lilandile nangue “pamo ni bizazi byobe,”* evi kulandila palua bantu bengi. Inzi, lilandile nangue “pamo ni kizazi kyobe,”* evi kulandila palua muntu umo, i kulanda Kristu. 17 Kukila pa kako, nalanda evi: Sheria elia yaaizile kwalukako myaka mia ina ni makumi atatu (430) kisia papo, te ityonene mapatano alia aakitilue na Leeza lwa ntanzi, kabili te iinoonene bulayo. 18 Kine kupyana kuswapiile sheria, manake te kuswapiile kabili bulayo; inzi Leeza, mu kutona kwakue, waamupeele Abrahamu bupyani kupitila bulayo.
19 Ale Sheria yaaletelue juu ya ki? Sheria yaaongeziiziwe evi kulengia bilubo bimanike, mpaka kizazi kelia kyaalailue* bobo bulayo kifike. Kabili, yaaletelue na ba malaika kupitila minue ya muntu wa kupatanisia. 20 Kine mapatano akitua sie na muntu umo, te kilombele kuye kwali muntu wa kupatanisia; ni Leeza abanga wali sie bunke lwaali walaya. 21 Eba, pa kako, Sheria ipingeene ni bulayo bwakue Leeza? Ata, te evio! Pantu kabenge bantu baapokeleele sheria elia ili yaleta bukose, nga kyaasiile kuvindikana bantu kumonua kuya baolokele kupitila sheria. 22 Inzi, Mulandu Wakue Leeza waabiikile bintu byonse pensina buvinde bwa lizambi, evi baalia bali ni kiketekelo bapate bintu biweme belia byaalailue baalia bamuketekeele Yesu Kristu.
23 Inzi, ntanzi kiketekelo kya kisinka kifike, tubanga twasungilue na sheria, kabili twaalukile pensina buvinde bwa ezio sheria, ni koku twapembeleele kiketekelo kelia kyaali pepi ni kufiikulua. 24 Pa kako, Sheria yaalukile musungi wetu wa kututwala kuli Kristu, evi tupundue kuya twaolokele kupitila kiketekelo. 25 Inzi, pantu lonu kiketekelo kya kisinka kyaakifika kale, te tukili kabili na lazima ya Sheria ya kututungulula.*
26 Kakiine, mwe bonse muli baana bakue Leeza kupitila kiketekelo kyenu muli Kristu Yesu. 27 Mwe bonse baabatiziiziwe muli Kristu, mumuvwele Kristu. 28 Uye wali Muyuda ao Mugiriki, uye wali muzia ao muntu ali uru, uye wali mwalalume ao mwanakazi, te kantu, pantu mwe bonse muli mu buumo ni Kristu Yesu. 29 Kukila pa kako, kine mwemue muli bakue Kristu, kakiine muli kizazi kyakue* Abrahamu, bapyani kukonkana ni bulayo.