Mukanda ku Baroma
16 Namibwila pa lwakue* nkazi wetu Foibe, olia ali wabombela mu kilonghaano kili mu Kenkrea, 2 evi mumupokelele mu nzila ipalile ku batakatifu bakue Mulopue, ni kumupeela kintu kyonse kyali nakio lazima, pantu waailangiliile ye mwine nangue ali wasakila bantu bengi, kubiika mukati ni nene.
3 Bapozie ba Priska ni Akila, babombi nane muli Kristu Yesu, 4 baalia baakibiika bukose bwabo* mu atari juu yane.* Nene pamo ni bilonghaano byonse bisili bya Bayuda, tuli mukubatasia. 5 Kabili, pozie kilonghaano kili mu nsesi yabo. Mupozie mutonua wane Epaineto, olia ali pakati ka matunda a kwanza pa lwakue Kristu kufuma mu Azia. 6 Mupozie Maria, olia waakibomba kwa mute juu yenu. 7 Bapozie bantu ba mu lupua lwane ba Androniko ni Yunia, kabili benane mu kifungo, balalume bamanikile bwino ku batumua, kabili baalia bakokola kale kuliko nene bali mu buumo pamo ni Kristu.
8 Fikie lyambo lyane kuli Ampliato, mutonua wane muli Mulopue. 9 Mupozie Urbano mubombi netu muli Kristu, pamo ni mutonua wane Stako. 10 Mupozie Apele, olia etabiilue muli Kristu. Bapozie baalia ba mu nsesi yakue Aristobulo. 11 Mupozie Herodioni, muntu wa mu lupua lwane. Pozie bantu ba mu nsesi yakue Narkiso, basambi bakue Mulopue. 12 Bapozie ba Trifaina ni Trifoza, banakazi bali babomba kwa mute muli Mulopue. Mupozie Persisi mutonua wetu, pantu ali wabomba kwa mute muli Mulopue. 13 Mupozie Rufo, olia asaakwilue muli Mulopue, pamo ni mama wakue, kabili mama wane. 14 Bapozie ba Asinkrito, Flegoni, Hermesi, Patroba, Hermasi, ni ba lupua bali pamo nabo. 15 Bapozie ba Filologo ni Yulia, Nerea pamo ni dada wakue, ni Olimpa, pamo ni batakatifu bonse bali pamo nabo. 16 Poziane na beze itakatifu. Bilonghaano byonse byakue Kristu byamipozia.
17 Mwe ba lupua, lonu namilomba evi muye mwakengeele palua baalia bali balengia kwaluke kukasanika ni kulengia bange beputale, baalia bali bapinga masambilizio amwaakisambilila. Iiseeluke kufuma ku babo bantu. 18 Pantu bantu ba evio, te bazia bakue Mulopue wetu Kristu, inzi bene ni bazia ba tama yabo* bene. Bali bazezia bantu kupitila lyasi liwaminiziiziwe pamo ni bulanzi bwa kulavikizia. 19 Kunakila kwenu kwaakimanika ku bantu bonse, ni pa kako ndi mukusekelela juu yenu. Ntonene muye mwali ni mulangue, kabili muye mwakita biweme, inzi bila mwali na kilubo ni kuya mwatiina kibipile. 20 Lenu sie, Leeza olia ali wapeelana mutende wakaba kumusansa Sataana pensina makasa enu. Kansi, buwame busipalilue bwakue Mulopue wetu Yesu buye bwali pamo nenu.
21 Timoteo mubombi nane wamipozia, pamo ni Lukio, Yasoni ni Sosipata, bantu ba mu lupua lwane.
22 Nene Tertio, olia waandika ozu mukanda, namipozia muli Mulopue.
23 Gayo, olia waakimpokelela, kabili olia ali ni nsesi ili yalonghaaninuamo, wamipozia. Erasto musungi wa bunonsi* wa muzi, wamipozia, pamo ni Kwarto lupua wakue. 24* ——
25 Leeza kunti wamipeela maka kupitila mpunda iweme indi napunda ni kupitila kusimikila pa lwakue Yesu Kristu. Ezi mpunda, yaakifiikulua kupitila siri itakatifu. Kabili ezio siri, yaakikita musita waleepele yafiikilue. 26 Inzi, lonu yaakilangililua* kuli fwefue ni kulengia imanike kupitila Malembo a bunabi* pakati ka bantu bonse kukonkana ni malaizio akue Leeza wa lonse, evi kusonsezia kunakila kupitila kiketekelo. 27 Kuli Leeza, olia ali ni mulangue wene bunke, kuye kwali bulumba lonse kupitila Yesu Kristu. Amen.