Mukanda wa Bubili ku Batesalonika
2 Inzi, mwe ba lupua, palua kubapo kwakue Mulopue wetu Yesu Kristu ni palua kukolonghaniiwa kwetu evi twaluke pamo nakue, twamilomba nangue 2 tekulekelele mano enu avulunghaniiwe lubilo, kabili tekututumiiwe lubilo na mpunda elia ilangiliile nangue busiku bwakue Yehova* bufikile, iye yali kupitila mpunda imwenekele nangue ifumine kuli Leeza,* ao kupitila mpunda imuli mwabwilua ao kupitila mukanda olia umwenekele nangue ufumine kuli fwefue.
3 Tekulekelele muntu ata umo amizezie* mu nzila ata imo, pantu bobo busiku tebukeeza ntanzi bukisanguka* tebunafike ni muntu olia ali watyona sheria tanafiikulue, wene i mwana wa kwinoonua. 4 Wene ali wapinga ni kwilendula pa muulu pa kila kintu kili kyakuutua leeza ao kila kintu kili kyapupua,* ni pa kako, ali waikala mu ekalu yakue Leeza ni kwilangilila ntanzi ya bantu bonse kuya wali leeza. 5 Eba, te mulangulukile nangue lunaali pamo ni mwemue, naali namibwila bebio bintu?
6 Kabili, lonu mumanine kelia kili mukumukingilila ozo muntu ali watyona sheria. Ali mukukingililua evi akabe kufiikulua pa musita wakue. 7 Kakiine, buvinde bufyeme bwa koko kutyonua kwa sheria buli mukubomba lonu. Inzi, bwakatwalilila mpaka musita lwali wakaba kufumiiwa mu nzila olia ali mukumukingilila lonu. 8 Kisia, kakiine, ozo ali watyona sheria, wakafiikulua. Wene wakenoonua na Mulopue Yesu kupitila mupasi wa kanua kakue ni kumwinoona musita kubapo kwakue Mulopue lukwakaba kumoneka. 9 Inzi, olia ali watyona sheria alipo juu ya miilo yakue Sataana, pamo ni kila kikitua kya maka, alama ya bufi ni bimpezia mano, 10 kabili ali wabombia bintu bisyolokele bya kila namuna evi kubabepa baalia bali mukuya ku kwinoonua, pantu te baaitabiile ni kutona kisinka kelia kyakabalengia bapusuke. 11 Kekio i kilengiizie Leeza abalekelele bazeziiwe na bufi, evi bafikiile kuzumina bintu bya bufi, 12 juu ya kunti bonse bakabe kupingulua pantu te baazumiine kisinka, inzi baasekeleele bintu bisyolokele.
13 Inzi, mwe ba lupua batonenue na Yehova,* lyonse tuli twaiunvua kuya twapatikiziiziwe kumutasia Leeza juu yenu, pantu kubambila ku ntendeko, Leeza waamisaakwile evi mupusuke kupitila kumyalula batakatifu na mupasi wakue ni kupitila kiketekelo kimuli nakio mu kisinka. 14 Wene waamikuutile evi mupusuke kupitila mpunda iweme ituli twasimikila juu ya kunti mupate bulumba bwakue Mulopue wetu Yesu Kristu. 15 Kansi, mwe ba lupua, imanisie, twalilile kukwatisia bintu* bimwaasambiliile, iye yali kupitila mpunda ili yalandua ao kupitila mukanda kufuma kuli fwefue. 16 Leeza Baba wetu, atutonene, kabili juu ya buwame bwakue, ali watukoselezia lonse ni kutupeela kiswapilo kiweme. Tuli mukupepa evi wene pamo ni Mulopue wetu Yesu Kristu 17 bakoselezie mitima yenu ni kumilengia mwimanisie* evi lyonse muye mwakita ni kulanda bintu biweme.