Yaandikilue na Mateo
16 Bafarisayo ni Basadukayo baamupaleeme Yesu evi bamwezie. Baamulombele abakitile alama imo kufuma ku muulu. 2 Yesu waabaasukile evi: “Kine koba kazimina muli mwalanda nangue, ‘Lukele aali ya ewa yakaba yaweme, pantu mu muulu mukasikile,’ 3 ni lukele-keele muli mwalanda nangue, ‘Lelo kuli kuya kwali mupepo, kabili ili kunoka pantu mu muulu mukasikile ni kilezi kitingile.’ Mwemue mumanine kwinika aali ya mu muulu, inzi bintu bili mukukitika mu enu nsiku yetu, te muli mukwinika kine bili na mana ki. 4 Kizazi kya* bantu babipile ni ba bukende* kyatwalilila kukeba alama, inzi tekikaba kupeelua ata alama, inga sie alama yakue nabi* Yona.” Kisia, Yesu waafuminepo ni kubasia.
5 Basambi baabukile ku bwala bunge bwa lyezi, inzi baalabile kutwama mikate. 6 Yesu waabalandile evi basambi bakue: “Twalilile kuya mwakentele kabili mwakengeele ni levire ya Bafarisayo ni ya Basadukayo.” 7 Pa kako, baatendekele kuwaza evi pakati kabo: “Emue, te twatwamanga ata mikate!” 8 Yesu lwaamanine bintu bibaali balanziana, waabalandile evi: “Mwe bantu ba kiketekelo kinini, juu ya ki muli mukulanziana mwalanda nangue te muli na mikate? 9 Eba, temunainike ao te mulangulukile elia mikate isano yaaliile bantu elufu isano (5 000), kabili ni bipanda binga bimwaaizuziizie? 10 Ao elia mikate saba yaaliile bantu elufu ina (4 000), kabili ni bipanda* binga bikata bimwaaizuziizie? 11 Mwaandua syani kwinika nangue nsiile nalanda ni mwemue palua mukate? Inzi, mwakengeele ni levire ya Bafarisayo ni ya Basadukayo.” 12 Kisia baainikile nangue taali wabalanda baye bakengeele palua levire ya mukate, inzi baye bakengeele ni masambilizio a Bafarisayo ni Basadukayo.
13 Yesu lwaafikile mu kazonga ka Kaisaria Filipi, waabepuziizie evi basambi bakue: “Ati, bantu bali balanda nangue Mwana mwina muntu nani?” 14 Baamulandile evi: “Bange bali balanda nangue Yoane Mubatizi, bange nangue Eliya ni bange bali balanda nangue Yeremia ao umo wa ba nabi.”* 15 Yesu waabepuziizie evi: “Ale mwemue muli mwalanda nangue nene ndi ni?” 16 Simoni Petro waasukile evi: “Wewe uli Kristu, Mwana mwina Leeza akosele.” 17 Yesu waamulandile evi: “Ali ni nsansa ni wewe Simoni mwina Yona, pantu te nama ni milopa byakubwila,* inzi Baba wane wa ku muulu i waakubwila. 18 Kabili nakulanda nangue: Wewe uli Petro, ni pa keki kilibue i panakemika kilonghaano kyane, ni milyango ya Mankabuli* teikapita maka kekio kilonghaano. 19 Nakakupeela mafungulo a Bukolo bwa ku muulu. Kabili, kila kintu kiwakakaka pa kyalo, kyakaba kyasyakakilue ni ku muulu, ni kila kintu kiwakakakula pa kyalo, kyakaba kyasyakakwilue ni ku muulu.” 20 Kisia, waabakonkobeziizie sana basambi bakue te kunti babwileko muntu ata umo nangue wene i Kristu.
21 Kutendekela pa ozo musita, Yesu waabambile kubabwila basambi bakue nangue apalile kuya ku Yerusalemu ni kutesua sana na bantu bakotele, bakulu ba ba makoani, ba kalemba ba sheria, ni kwipaiwa, kabili nangue busiku bwa butatu wakafufuka. 22 Kisia, Petro waamutweme ni kuya nakue pa mbali ni kubamba kumusasilila wamulanda evi: “We Mulopue, apana walanda evio, bebi bintu byonse tebikaba kukupata.” 23 Inzi, Yesu waamupilibukiile Petro kya musana ni kumulanda evi: “Pita ku nyuma yane we Sataana! Uli mukulengia ngandue kukita kelia kitonene Leeza, pantu wewe uli mukuwaza mawazo a bantu te akue Leeza.”
24 Kisia, Yesu waabalandile evi basambi bakue: “Kine muntu watona kunkonka, apalile kwikaana ye mwine ni kutwama kimuti kyakue kya mateso ni kutwalilila kunkonka. 25 Pantu, kila muntu olia watona kupususia bukose bwakue wakabuzezia,* inzi kila muntu olia wazezia bukose bwakue* juu yane, wakabupata. 26 Kulanda kisinka, muntu kunti wapata faida ki kine wapata kyalo kyonse inzi wazezia bukose bwakue?* Ao, muntu kunti wafumia kintu ki kya kunti asintwileko na bukose bwakue?* 27 Musita uli waiza, Mwana mwina muntu wakaba ni buvinde bukata kufuma kuli Baba wakue. Wakaba wali pamo ni ba malaika bakue, kabili wakabapingula bantu. Wakabakanda baalia bali bakita bintu bibipile ni kubapaala baalia bali bakita bintu biweme. 28 Kakiine, namyana nangue kuli bamo pakati ka baaba bemeene panu, te bakatompa lufu ata kanini mpakanke bakamumone Mwana mwina muntu waiza mu Bukolo bwakue.”