Mukanda ku Bagalatia

4 Lonu, nalanda nangue musita muntu wa kupyana lwakili mwanike, tezi kuya wapuseene na muzia, ata sie kine wene i mulopue wa bintu byonse, 2 inzi, kuli bantu bali bamusunga wene pamo ni nsesi yakue mpaka busiku bwaabiikilue ntanzi na baba wakue bukabe kufika. 3 Enka evio ni fwefue, lutubanga twakili baanike, tubanga twali bazia ba bintu bya musinzi bya kyalo. 4 Inzi, musita wine olia waali wapangilue luwaafikile, Leeza waamutumine Mwana wakue, olia waavyelue na mwanakazi, kabili olia abanga wali pensina sheria. 5 Waakitile evio juu ya kukakula baalia babanga bali pensina sheria kupitila kubasita, evi fwefue twalulue baana.

6 Pantu lonu mwemue muli baana, Leeza waakituma mupasi wakue Mwana wakue mu mitima yetu, ni ozo mupasi uli wapunda nangue: “Abba,* Baba!” 7 Pa kako, mwemue te mukili bazia kabili, inzi muli baana; kabili kine muli baana, kansi muli kabili bantu ba kupyana bintu biweme kupitila Leeza.

8 Ata sie kine kili evio, musita umubanga mwakili sie temunamumane Leeza, mubanga mwali bazia ba ba leeza ba bufi. 9 Inzi lonu, mwaakimumana Leeza, ao mu nzila inge, Leeza waakimimana. Ale juu ya ki muli mukubwelela ku bintu bya musinzi bitope, kabili bisili bya mana ni kutona kubibombela kabili? 10 Kuli nsiku, myezi, bipindi, ni myaka imuli mwakitamo nsikunkulu. 11 Ndi mukwema nangue pange maka anaakikita pa kumikwasia mwemue aakizeza sie kya mpuni.

12 Mwe ba lupua, namipapaata mwaluke nga vindi nene, pantu ni nene mbanga nali nga vimuli mwemue. Te mwaanduviizie ata kanini. 13 Mumanine nangue bulwele bwane bwa kimubili i bwaalengele mpate fwasi ya kumisimikila mpunda iweme lya kwanza. 14 Ata sie kine aali yane ya kimubili ibanga yali bwezio kuli mwemue, te mwaanfuupwile ao kunsuula.* Inzi, mwaampokeleele nga malaika wakue Leeza, nga Kristu Yesu. 15 Ale elia nsansa imubanga mwali nayo ili pi? Namisininkiziizia nangue kabenge kyaavindikeene, nga mwaatumbwile menso enu ni kumpeela. 16 Eba, manake naaluka mulwani wenu pantu namibwila kisinka? 17 Bantu bamo bali mukumikeba kwa mute evi mubakonke, inzi mupango wabo te uweme; bene batonene kumilekania ni nene evi mutone sana kubakonka. 18 Inzi, lyonse kili bwino muntu aye wamikeba kwa mute wali ni mupango uweme, kabili apana sie musita undi pamo nenu. 19 Mwe baana bane banini, ndi mukukisua kabili juu yenu nga evelia mwanakazi asyali pepi ni kuvyala. Kabili, nakaba kutwalilila kukisua evio mpaka mukabe kufikiila kulangilila bumuntu bwakue Kristu.* 20 Kunti natona kuya nali pamo ni mwemue lwenka lonu, ni kumilanzia mu nzila ikilile kufuuka, pantu nvulungheene sana pa lwenu.

21 Ale mbwile, mwe batonene kuya mwali pensina sheria, eba te muli mukunvua belia bili byalanda Sheria? 22 Kwa mufuano, Malembo ali alanda nangue Abrahamu abanga wali na baana babili, umo waavyelue na mubombi mukazyana, ni unge na mwanakazi ali uru; 23 olia waavyelue na mubombi mukazyana, kakiine waavyelue sie nga vili vyavyalua bantu bonse,* inzi olia waavyelue na mwanakazi ali uru, waavyelue kupitila bulayo. 24 Bebio bintu kunti byamonua nga kilangililo; pantu babo banakazi balangiliile mapatano abili. Mapatano amo aakitilue ku Lupili lwa Sinai. Azo mapatano ali avyala baana palua buzia, kabili ene ali nga Hagari. 25 Hagari alangiliile Lupili lwa Sinai, lolia luli mu Arabia, kabili apaleene ni Yerusalemu ya lonu, pantu wene pamo ni baana bakue bali mu buzia. 26 Inzi, Yerusalemu ya ku muulu ili uru, kabili i mama wetu.

27 Pantu Malembo ali alanda nangue: “Sansamuka, we mwanakazi asizi kuvyala; bulula tupundu twa nsansa, we mwanakazi asyunvwile misa ya kuvyala; pantu baana bena mwanakazi asiilue bavulile kupita baana ba olia ali ni mulume.” 28 Mwe ba lupua, lonu mwemue muli baana ba bulayo nga evelia Isaka vyabanga wali. 29 Inzi, pa ozo musita, olia mwana waavyelue nga vili vyavyalua bantu bonse* waabambile kumwemia olia waavyelue kupitila mupasi. Evio, i vikili mukukitika ni lonu. 30 Inzi, lilembo lili lyalanda syani? Lili lyalanda nangue: “Mukumbe mubombi mukazyana pamo ni mwana wakue, pantu mwana mwina mubombi mukazyana takaba kupata kintu ata kimo kya kupyana pamo ni mwana mwina mwanakazi ali uru.” 31 Pa kako mwe ba lupua, fwefue tuli baana, apana bena mubombi mukazyana inzi bena mwanakazi ali uru.