Yaandikilue na Marko
3 Yesu waaingiile kabili mu sinagogi, ni momo mubanga mwali mwalalume umo abanga waumine* kuboko. 2 Pa kako, Bafarisayo babanga bamukentele sana Yesu evi bamone kine ali kumukosia ozo muntu mu busiku bwa Sabata, evi bamusitake. 3 Waamulandile evi ozo muntu waali waumine* kuboko: “Buuka wize pa bukata.” 4 Kisia waabepuziizie evi: “Eba, itabiziiziwe mu busiku bwa Sabata kukita kintu kiweme ao kibipile, kupususia bukose* ao kwipaya?” Inzi baasyele sie bataleele. 5 Kisia kubakenta wafiitilue, inzi waunvwile sana bulanda pantu mitima yabo ibanga yaumine, Yesu waamulandile evi olia mwalalume: “Olola kuboko kobe.” Ni wene waaolwele kuboko, ni kuboko kwakue kwaakosele. 6 Pa kako, Bafarisayo baafumine panze. Bila kukokola baakolongheene pamo ni bantu ba mu kyama kyakue Herode, bakeba vya kunti bamwipaye Yesu.
7 Inzi, Yesu waaile pamo ni basambi bakue ku Lyezi lya Galilaya, kabili bantu bengi baalia baafumine ku Galilaya ni ku Yudea baamukonkele. 8 Ata sie baalia baafumine ku Yerusalemu, ku Idumea, ku bwala bunge bwa Yordani ni mu tuzonga twa mu mbali Tiro ni Sidoni, bantu bengi baaizile kuli Yesu lubaapatile mpunda palua bintu bingi byabanga wakita. 9 Kabili, Yesu waabalandile basambi bakue bamuteaniizie ka bwato ka kunti apilukemo kine bantu bengi bamutinta. 10 Pantu waakosiizie bantu bengi, baalia bonse babanga balwele malwele akata baali batintana bamuzyungulukiile evi bamukumie. 11 Ata sie mipasi ifiitile lyonse luyaali yamumona, yaali yapona ntanzi yakue ni kulanda evi yasamwine: “Wewe uli Mwana mwina Leeza.” 12 Inzi, nsita ingi abanga waikaania sana te kunti ilande kine wene abanga wali ni.
13 Yesu waapilukile ku lupili, kisia kukooka waabasaakwile baalia baali watonene, ni bene baamukonkele. 14 Kisia waapangile* libumba lya bantu likumi na babili (12), baalia baabanga wakuuta kabili nangue batumua. Babo likumi na babili i babanga baenda ni Yesu, kabili kisia musita waabatumine baye basimikile mpunda iweme 15 ni kuya bali ni buvinde bwa kukuumba mipasi ibipile.
16 Mu lelio libumba lya bantu likumi na babili (12) lyaapangile* Yesu, mubanga mwali: Simoni, olia waainikilue kabili liina lya Petro, 17 Yakobo mwana mwina Zebedayo ni Yoane mwalawakue* kwa Yakobo (baaba, Yesu waabenikile kabili liina lya Boanerge, lelia lili na mana ya “Baana baalia bali nga Kimbuluma”), 18 Andrea, Filipo, Bartolomayo, Mateo, Tomasi, Yakobo mwana mwina Alfayo, Tadeo, Simoni muntu wa mute, 19 ni Yuda Iskariote, olia waaizile kumwalukila Yesu.
Kisia Yesu waaingiile mu nsesi, 20 kabili bantu bengi baakolongheene ni linge, kekio kyaalengiizie Yesu pamo ni basambi bakue baandua kupata ni musita wa kulia kyakulia. 21 Inzi, bantu ba mu lupua lwakue Yesu lubaaunvwile ezio mpunda, baaile bamukwate pantu baali balanda nangue: “Wazambuka.” 22 Kabili, ba kalemba ba sheria baalia baakookele kufuma ku Yerusalemu baali balanda evi: “Ali ni Belzebuli,* kabili ali mukukuumba mipasi ibipile ku maka akue kateeka wa mipasi ibipile.” 23 Kisia Yesu kubakuuta baye kuli wene, waalandile nabo wabombia mifuano: “Ale Sataana kunti wamukuumba syani Sataana? 24 Kine bukolo bwaikasania bwine, bobo bukolo tebuvinda kwimana; 25 kabili kine nsesi yaikasania iine, ezio nsesi teikaba kuvinda kwimana. 26 Kabili, kine Sataana ali mukwilwisia ni kukasanika, tavinda kwimana, inzi ali mukuya ku mpela. 27 Kakiine, te kuli ata muntu ali kwingila mu nsesi ya muntu ali ni maka ni kuvinda kwiba bintu byakue ntanzi tanamukake ozo muntu ali ni maka. Mpakanke amukake i kusyali ebe bintu bya mu nsesi yakue. 28 Kakiine, namyana nangue baana bena bantu bakeleelua bintu byonse, ata sie kine bakita lizambi lyali syani ao kine balanda milandu yali syani ya kumutuka Leeza. 29 Inzi, kila muntu olia watuka mupasi utakatifu takeleelua lonse, inzi ali ni kilubo kya lizambi lya muyayaya.” 30 Waalandile evio pantu babanga balanda nangue: “Ali ni mupasi ufiitile.”
31 Kisia, mama wakue ni balabakue kwa Yesu baaizile ni kwimana panze, baatuminemo muntu umo aye amukuute. 32 Pantu bantu bengi babanga baikeele bamuzyungulukiile, baamulandile evi: “Mona! Mama obe ni balabobe bali panze bali mukwipuzia kine uli kupi.” 33 Inzi, waabaasukile evi: “Mama wane ni balabane i bani?” 34 Kisia, waabakentele baalia baali baikeele bamuzyungulukiile bakitile kinzyungulu, ni kulanda evi: “Mone ba mama wane, ba kaka wane ni balabane! 35 Kila muntu olia ali wakita kutona kwakue Leeza, ozu i kaka wane, mwalawane, dada wane ni mama wane.”