Mukanda wa Kwanza ku Bakorinto
6 Kine umo pakati kenu tali mukunvuana* ni mwinakue, eba ali waya ku tribinali ntanzi ya bantu basyolokele, kuliko kuya ntanzi ya batakatifu? 2 Ao, eba te mumanine nangue batakatifu bakapingula kyalo? Kabili, kine mwemue i bapalile kupingula kyalo, eba te muli na buvinde bwa kupingula milandu inini sana? 3 Eba, te mumanine nangue twakapingula ba malaika? Ale muli kwandua syani kupingula milandu inini ya mu bonu bwikazi? 4 Kine muli ni milandu ya mu bonu bwikazi ipalile kupingulua, ale juu ya ki muli kutwala ezio milandu ku ba zuzi* basili ba mu kilonghaano? 5 Ndi mukulanda juu ya kumimonia busoni. Eba, pakati kenu te pali muntu ata umo wa mulangue olia ali ni buvinde bwa kupingula pakati ka ba lupua bakue? 6 Inzi, lupua ali mukutwala lupua nakue ku tribinali, ni kumusitaka ntanzi ya bantu basizumiine.
7 Kakiine, musita umuli mwasitakana, muli mwailetela busoni mwe bene.* Ale kwitabila sie bange bamiluvie? Juu ya ki te mwizi kwitabila sie kupunzua? 8 Inzi muli mwaluvia, kabili muli mwabalilikizia* ba lupua benu.
9 Ao, eba te mumanine nangue bantu basyolokele te bakapyana Bukolo Bwakue Leeza? Tekuzeziiwe.* Baalia bali bakita bukambue,* baalia bali bapupa mikisi, baalia bali bakita bukende, balalume bali baitabila kulaalua na balalume benabo, baalia bali balaalana balalume kwa balalume, 10 ba kabooko, bantu bali ni pupa, ba kyakolua, bantu bali batukana* ni ba bipondo,* te bakapyana Bukolo Bwakue Leeza. 11 Kabili, bange pakati kenu, i vibabanga bali. Inzi, mwemue mwaasambilue; mwaalwilue batakatifu; mwaapundilue kuya mwaolokele* mu liina lyakue Mulopue Yesu Kristu pamo ni mupasi wakue Leeza wetu.
12 Nene ngitabiziiziwe kukita bintu byonse, inzi te byonse bili ni faida. Ngitabiziiziwe kukita bintu byonse, inzi nsikaba kulekelela kintu ata kimo kikabe kuntungulula.* 13 Kyakulia kilipo juu ya kavumo, kabili ni kavumo kalipo juu ya kyakulia. Inzi, Leeza wakabikita byonse bibili kwaluka bya bulebule. Mubili te wizi kusangua walipo juu ya bukambue,* inzi ulipo juu ya miilo yakue Mulopue. Kabili ni Mulopue ali waliisia ozo mubili. 14 Inzi, Leeza waamufufwile Mulopue, kabili wakatufufula ni fwefue kupitila buvinde bwakue.
15 Eba, te mumanine nangue mibili yenu ni biungo byakue Kristu? Eba, kili sie bwino kutwama biungo byakue Kristu ni kubikwatania ku mubili wakue ndumba? Bila ata kanini! 16 Eba, te mumanine nangue muntu onse ali waiunga* pamo ni ndumba ali waaluka mubili umo pamo nakue? Pantu Leeza alandile nangue: “Babo babili bakaaluka mubili umo.” 17 Inzi, muntu onse olia akwataniiziwe pamo ni Mulopue ali mu buumo pamo nakue mu mupasi.* 18 Butuke bukambue!* Lizambi linge lyonse lelia lili lyakita muntu lili panze pa mubili wakue, inzi muntu onse olia ali wakita bukambue ali waukitila lizambi mubili wakue mwine. 19 Eba, te mumanine nangue mubili wenu ni ekalu ya mupasi utakatifu olia uli muli mwemue? Kabili, ozo mupasi ufumine kuli Leeza. Mwemue te muli benu mwe bene, 20 pantu mwaasitilue na bei ikata. Pa kako, bombie mubili wenu evi kumukindika Leeza.