Mukanda wa Bubili ku Batesalonika
1 Nene Paulo, ndi pamo ni Silvano* ni Timoteo. Namyandikila mwe bali mu kilonghaano kili ku Tesalonika kelia kili mu buumo ni Leeza Baba wetu ni Mulopue Yesu Kristu:
2 Buwame* bwakue Leeza Baba wetu ni bwakue Mulopue Yesu Kristu, pamo ni mutende wabo, biye byali pamo ni mwemue.
3 Mwe ba lupua, lyonse tuli twaiunvua kuya twapatikiziiziwe kumutasia Leeza pa lwenu. Kekio kipalile pantu kiketekelo kyenu kili mukuya kyakila kukula, kabili ni ntono imuli nayo mwe bonse pakati kenu ili mukuya yakila kongezeka. 4 Kekio i kilengiizie tuye twaitanka pa lwenu pakati ka bilonghaano byakue Leeza. Tuli twaitanka juu ya kusipikizia kwenu ni kiketekelo kimuli mwalangilila mu lyemo lyenu lyonse ni mu maavia amuli mukusaakaana nao.* 5 Kekio kisininkiziizie nangue bupinguzi bwakue Leeza bolokele. Bobo bupinguzi buli mukumilengia mumonue kuya mwapalile kwingila mu Bukolo Bwakue Leeza, Bukolo bolia bumuli mukutesekelapo kakiine.
6 Pantu Leeza olokele, wene wakabapeela malipizi baalia bali mukumitesa. 7 Inzi, mwemue bali mukwema mwakaba kulekela kwema. Kekio kyakakitika kuli mwemue ni kuli fwefue musita wakafiikulua Mulopue Yesu kufuma ku muulu pamo ni ba malaika bakue ba maka 8 mu libeebe lya mulilo, musita wakaletua kibwelezi ku baalia basimumanine Leeza ni ku baalia basizi kunakila mpunda iweme pa lwakue Mulopue wetu Yesu. 9 Babo bantu bakapingulua kwinoonua lonse, kabili bakazeza ntanzi yakue Mulopue ni ntanzi ya bulumba bwa maka akue. 10 Kekio kyakakitika musita Mulopue* lwakeeza evi kulumbaniiwa pamo ni batakatifu bakue, kabili evi kumonua kuya wapapiizie pakati ka baalia bonse baalangiliile kiketekelo. Kabili, ni mwemue mwakaba mwali pakati ka babo bantu pantu mwaaitabiile busininkizio butwaafumiizie pakati kenu mwali ni kiketekelo.
11 Pa kako, lyonse tuli mukupepa pa lwenu evi Leeza wetu amimone kuya mwapalile kukuutua na wene, kabili kupitila maka akue, afikilizie kakiine bintu byonse bimusansamusiizie ni bintu bimwaakikita mwasonseziiziwe na kiketekelo kyenu. 12 Kili evio evi liina lyakue Mulopue wetu Yesu lilumbaniiwe muli mwemue, ni mwemue mulumbaniiwe mu buumo pamo nakue kukonkana ni buwame* bwakue Leeza wetu ni bwakue Mulopue Yesu Kristu.