Mukanda wa Bubili ku Bakorinto
2 Naakipingula te kunti nkabe kumikisia kabili, musita unakaba kwiza kumyendela mu lwendo lukonkelepo. 2 Pantu, kine namilengia mwe bonse mukisike, ale nani wakaba kuvinda kunsansamusia kine te mwemue benka banaakisiizie? 3 Naandikile evio, evi musita unakeza te kunti nkakisiiwe juu yenu, inzi nkasekelele, pantu nsininkiziizie nangue kelia kilengiizie ngiye nali ni nsansa, kili kyalengia mwe bonse muye mwali ni nsansa ya enka evio. 4 Kupitila lyemo lingi ni bulanda mu mutima, naamyandikiile nali mukukolosia mensozi engi, te juu ya kumilengia mukisike, inzi evi mumane nangue mitonene sana.
5 Kine kuli muntu waakikisiana, taakinkisia nene, inzi mu nzila imo waakimikisia mwe bonse. Inzi, nsitonene kuya naaviizie sana mu belia bindi mukulanda. 6 Kusasililua kwaakisasililua ozo muntu na bantu bengi kukumeene kuli wene. 7 Kansi lonu, mupalile kumweleela mu buwame ni kumuteekia mutima, evi te kunti atitikilue* na bulanda bupitiliile. 8 Pa kako, namisonsezia mumusininkiziizie nangue mumutonene. 9 Pantu, kekio i kyaalengiizie kabili myandikile, evi kumana kine kunti mwasininkizia nangue muli mwanakila mu bintu byonse. 10 Kine mwemue mwamweleela muntu palua kintu kimo, ni nene kumo, namweleela. Kakiine, kyonse kinaakyeleela (kine naakyeleela kintu) naakyeleela juu yenu pa menso akue Kristu, 11 evi Sataana te kunti atuvinde, pantu tumanine mipango yakue.*
12 Musita unaafikile mu Troa evi kupunda mpunda iweme pa lwakue Kristu, kisia ni mulyango wangizukila muli Mulopue, 13 naaemene sana mu mano* pantu nsyaamusangile lupua wane Tito. Pa kako, naabalaile basambi ba koko ni kuya ku Makedonia.
14 Inzi, Leeza atasiiwe, olia ali watutungulula lyonse nga ba soda bali mukufuma ku vita ni koku bali mukusekelela kuvinda pamo ni Kristu, kabili kupitila fwefue, ali mukusalanghania bunu buweme bwa kumumana wene mu kila fwasi! 15 Pantu, ntanzi yakue Leeza, fwefue tuli bunu buweme sana bwakue Kristu pakati ka baalia bali mukupususiiwa ni pakati ka baalia bali mukwinoonua; 16 ku baalia bali mukwinoonua, bobo bunu buli bwanunka* nga lufu, kabili buli bwatwalana ku lufu. Ku baalia bali mukupususiiwa, bobo bunu buli bwanunkila nga bukose, ni kutwalana ku bukose. Kabili, nani apalile sana palua bebio bintu? 17 Fwefue i bapalile, pantu te twizi kusisia* mulandu wakue Leeza nga vili vyakita bantu bengi, inzi tuli twalanda ni bukisinka bonse twali bantu batuminue na Leeza, een, pa menso akue Leeza, kabili pamo ni Kristu.