Mukanda wa Kwanza ku Bakorinto

14 Kukila pa byonse, kuzie ntono, inzi kite maka enu onse evi mupokelele* bupe bwa mupasi utakatifu, asa bupe bwa kulanda bunabi.* 2 Muntu olia ali ni bupe bwa kulanda mu lulimi lunge, ali wamulanzia Leeza, apana bantu. Te kuli muntu ali kunvua, pantu ali mukulanda siri itakatifu kupitila mupasi. 3 Inzi, olia ali walanda bunabi* ali wabakuula bantu, kabili ali wabasonsezia ni kubateekia mutima kupitila bulanzi bwakue. 4 Olia ali walanda mu lulimi lunge ali waikuula ye mwine, inzi olia ali walanda bunabi* ali wakuula kilonghaano. 5 Lonu, kunti natona mwe bonse muye mwali ni bupe bwa kulanda mu ndimi ipusene-puseene, inzi ntonene sana mulande bunabi.* Kakiine, kine olia ali walanda mu ndimi ipusene-puseene tapilibwile belia byali mukulanda evi kusonsezia kilonghaano, olia ali walanda bunabi* waaluka mukulu kuliko wene. 6 Mwe ba lupua, ngizenge kuli mwemue nali mukulanda mu ndimi ipusene-puseene, eba kekio kyaakisia kumikwasia? Kyaakisia kumikwasia sie ndandenge kupitila bupe bwa kufiikula, bwa kumana, bwa bunabi,* ao bwa kusambilizia.

7 Kili sie namuna imo ni bintu bisili na bukose belia bili byafumia lizui, nga evelia nfilimbi ao kinubi.* Kine mazui te apusaniiziwe, ale belia bili mukuliziiwa ku nfilimbi ao ku kinubi* bili kwinikua syani? 8 Kine tarumbeta yaliziiwa mu lizui lisimanikile bwino, ale nani ali kwiteania palua vita? 9 Enka evio ni mwemue, kine mwabombia bulanzi bolia bukolele kunvwika, ale bantu bali kumana syani kelia kili mukulandua? Kakiine muli kuya mwalanda sie mwa mpuni. 10 Kuli bulanzi bupusene-puseene* mu kyalo, inzi te kuli bulanzi busili na mana. 11 Kine nsyunvwile mana ya belia bili mukulandua, ndi kwaluka mweni ku olia ali mukulanda, ni olia ali mukulanda ali kwaluka mweni kuli nene. 12 I vikili ni mu aali yenu, pantu mutonene sana bupe bwa mupasi, kebe bupe bwingi bolia bwakaba kukuula kilonghaano.

13 Pa kako, olia ali mukulanda mu lulimi lunge apalile kupepa evi apilibule belia byali mukulanda. 14 Pantu kine ndi mukupepa mu lulimi lunge, bupe bwane bwa mupasi i buli mukupepa. Inzi, mano ane te ali mukukitapo kantu. 15 Ale mpalile kukita ki? Nakaba kupepa na bupe bwa mupasi, inzi kabili nakaba kupepa evi nkabe kwinika belia bindi mukulanda.* Nakaba kutasia kupitila lwimbo na bupe bwa mupasi, inzi kabili nakaba kutasia kupitila lwimbo na mano ane. 16 Kupusana ni kekio, kine wewe wapepa lipepo lya kutasia na bupe bwa mupasi, eba muntu wa kawaida olia ali pakati kenu ali kwitabila syani “Amen” ku lipepo lyobe lya kutasia? Wene tamanine belia byuli mukulanda. 17 Kulanda kisinka, uli mukumutasia Leeza mu nzila iweme, inzi unge tali mukunonkelamo. 18 Namutasia Leeza pantu ndi nalanda mu ndimi ingi kuliko mwe bonse. 19 Inzi, mu kilonghaano kunti natona kulanda milandu isano elia indi kunvua mana evi kusambilizia bange,* kuliko kulanda milandu elufu likumi (10 000) mu lulimi lusimanikile.

20 Mwe ba lupua, te kwaluke baana mu kunvua kwenu, inzi aluke baana mu bintu bibipile. Kabili, aluke bakulu mu kunvua kwenu. 21 Mu Sheria mwandikilue evi: “‘Nakabalanzia baaba bantu mu ndimi ya baeni, kabili na milomo ya baeni. Ata sie kine kikabe evio, bakakaana kuntwilizia,’ i vyalanda Yehova.”* 22 Pa kako, ndimi te alama palua baalia bazumiine, inzi yene ni alama palua baalia basizumiine. Ata sie kine kili evio, bunabi* tebwizi kusanguako palua baalia basizumiine, inzi buliko palua baalia bazumiine. 23 Pa kako, kine kilonghaano kyonse kyasaakaana pa fwasi imo, kisia ni bantu bonse balande mu ndimi ipusene-puseene, kisia papo bantu ba kawaida ao basizumiine baizamo, eba te balanda nangue mwaakizambuka? 24 Inzi, kine mwe bonse muli mukulanda bunabi,* kisia ni muntu asizumiine ao wa kawaida waizamo, ali kwiunvua nangue waololua ni kutoosiiwa* na bonse. 25 Kisia, siri elia ili mu mutima wakue ili kumanika bwino, ni pa kako, ali kufukama ni kufwinamika mpumi pansi, ni kumupupa Leeza wali mukulanda nangue: “Kakiine, Leeza ali pakati kenu.”

26 Mwe ba lupua, ale ni kiki kipalile kukitua? Musita umuli mwasaakaana pamo, umo ali waimba nghimbo ya kumutasia Leeza,* unge ali wasambilizia, unge ali walanda belia byaakifiikwilua na Leeza, unge ali walanda mu ndimi inge, ni unge ali wapilibula. Kansi, bintu byonse bikitike juu ya kukuulana. 27 Kine kuli bamo bali balanda mu ndimi inge, baye bapeleela sie pa babili ao batatu, te kunti bakile papo, kabili baye basintulana. Kisia, kupalile kuya kwali ni muntu wa kupilibula. 28 Inzi, kine te kuli muntu wa kupilibula, ozo akebele kulanda mu lulimi lunge, apalile kwikala tondolo mu kilonghaano, kabili elanzie mwine ni kumulanzia Leeza. 29 Kansi, ba nabi* babili ao batatu balande, kisia ni bantu bange benike mana. 30 Inzi, kine muntu umo wapokelela mpunda ya kufiikula musita lwaikeele momo, olia ali mukulanda atalale. 31 Pantu mwe bonse kunti mwalanda bunabi* kila umo pa musita wakue, evi bonse basambilile ni kukoseleziiwa. 32 Kabili, bupe bwa mupasi bwa ba nabi* bupalile kutungululua na ba nabi.* 33 Pantu Leeza te wa kinvulunghania, inzi wene ni Leeza wa mutende.

Nga vikili kyasangua mu bilonghaano byonse bya batakatifu, 34 banakazi bekale tondolo mu bilonghaano, pantu te bapeelue nsambu ya kulanda. Inzi, baye banakila nga evelia vilandile ni Sheria. 35 Kine batonene kumana kintu, bepuzie balume babo ku masesi, pantu ni kya nsoni ku mwanakazi kulanda mu kilonghaano.

36 Eba, mwemue i nsulo ya mulandu wakue Leeza, ao eba ozo mulandu waamifikiile sie mwe bunke?

37 Kine muntu emwene kuya wali nabi,* ao nangue apeelue bupe bwa mupasi, apalile kwinika nangue malaizio andi mukumyandikila afumine kuli Mulopue. 38 Inzi, kine muntu waandua kwinika kekio, ni wene takenikua.* 39 Pa kako, mwe ba lupua bane, twalilile kwikwinda evi kulanda bunabi,* inzi tekuye mwakaaniana kulanda mu ndimi inge. 40 Lekele bintu byonse biye byakitika mu nzila ipalile, kabili kwa mupango.*