Mukanda wa Kwanza ku Bakorinto

16 Lonu, palua kulongia juu ya batakatifu, kunti mwakonka malaizio anaapeele bilonghaano bya ku Galatia. 2 Mu busiku bwa kwanza bwa kila juma, kila umo wenu apalile kubiika kintu pa mbali kukonkana ni kelia kyali kuvinda kufumia, evi te kunti mukabe mwali na lazima ya kulongia musita unakaba kwiza. 3 Lunakaba kufika koko, nakaba kubatuma balalume bamwaakizimbula mu mikanda yenu evi bakabe kutwala ku Yerusalemu bupe bwenu bwa kwitonena. 4 Inzi, kine kyapala ni nene ngiye koko, nakaba kuya pamo nabo.

5 Nakaba kwiza koko nasyafumine ku Makedonia, pantu i kunakaba kupita. 6 kabili, pange nakeekala pamo nenu ao ata sie kupisia kipindi kya kasama pamo nenu, evi mukansekezie kolia kunakaya. 7 Nsitonene kumimona nali sie lupita, pantu nswapiile kupisia musita unini pamo nenu, kine Yehova* waitabizia. 8 Inzi, ndi kusyala mu Efeso mpaka Nsikunkulu ya Pentekoste ikabe kupita, 9 pantu mulyango ukata wa miilo waakiizuka ntanzi yane. Inzi, kuli bantu bengi bali mukutupinga.

10 Kine Timoteo wafika, sininkizie nangue tali na kintu ata kimo kya kutiina lwali wakaba wali pakati kenu, pantu ali mukubomba miilo yakue Yehova* nga nene wenka. 11 Pa kako, te kunti muntu ata umo amupuulule. Musekezie kwa mutende evi avinde kubwela kabili kuli nene. Nene mupembeele pamo ni ba lupua bange.

12 Lonu, pa lwakue lupua wetu Apolo, naakimusonsezia sana eze kwenu pamo ni ba lupua bange. Takiba wapangile kwiza koko lonu, inzi wakaba kwiza kine fwasi yamoneka.

13 Ikale mwailabukiile, imane sinta mu kiketekelo, muye mwasipile,* kabili mwalumine. 14 Kite bintu byonse kwa ntono.

15 Mwe ba lupua, mumanine nangue bantu ba mu nsesi yakue Stefana babanga bali ba kwanza kuzumina* mu Akaya, kabili nangue baaipeele bo bene evi kubombela batakatifu. 16 Namisonsezia mutwalilile kubomba pamo ni bantu ba evio, kabili pamo ni baalia bali bakwasiana nabo ni kubomba kwa mute. 17 Inzi, ndi ni nsansa pantu ba Stefana, Fortunato ni Akaiko bali konu pamo ni nene. Bene baakinkwasia pa fwasi yenu. 18 Baakinkoselezia sana nene, ni mwemue kumo.* Pa kako, muye mwabatasia* bantu ba evio.

19 Bilonghaano bya mu Azia byamipozia. Ba Akila ni Priska pamo ni kilonghaano kili mu nsesi yabo bamipozia kwa nsansa muli Mulopue. 20 Ba lupua bonse bali konu bamipozia. Poziane na beze itakatifu.

21 Ne Paulo, namyandikila leli lyambo ne mwine.

22 Kine muntu tamutonene Mulopue, ozo muntu apalile kulainiiwa. We Mulopue wetu, iza! 23 Buwame* bwakue Mulopue Yesu buye bwali pamo nenu. 24 Ntono yane, iye yali pamo ni mwe bonse bali mu buumo ni Kristu Yesu.