Mukanda wa Kwanza ku Bakorinto
12 Mwe ba lupua, ntonene mumane palua bupe bwa mupasi utakatifu. 2 Mumanine nangue ntanzi ya kuzumina kwenu,* mubanga mwatungulwilue, kabili mubanga mwazeziiziwe na mikisi elia isivinda kulanda. Mwemue mwaakonkele ezio mikisi konse kuibanga yamilombola. 3 Lonu, ntonene mumane nangue te kuli muntu ata umo atungulwilue na mupasi wakue Leeza ali kulanda nangue: “Yesu alapiziiwe!”* Kabili, te kuli muntu ata umo ali kuvinda kulanda nangue: “Yesu i Mulopue!” inga sie kine ozo muntu atungulwilue na mupasi utakatifu.
4 Kuli bupe bupusene-puseene kufuma kuli Leeza, inzi buli bwaletua na mupasi umo sie. 5 Kuli nzila ipusene-puseene ya kubombela, inzi tuli twabombela Mulopue umonke. 6 Kuli twazi tupusene-puseene, inzi Leeza umonke i ali wamupeela kila umo buvinde bwa kukita toto twazi. 7 Mupasi utakatifu uli wamoneka mu kila muntu juu ya faida ya bange. 8 Mupasi uli wapeela muntu umo buvinde bwa kulanda kwa* mulangue, kabili wenka ozo mupasi uli wapeela unge buvinde bwa kulanda bintu bisivinda kumana bange. 9 Wenka ozo mupasi uli wapeela muntu umo kiketekelo, ni unge ali wapeelua buvinde* bwa kukosia, 10 kabili unge ali wapeelua buvinde bwa kukita bimpezia mano, unge buvinde bwa kulanda bunabi,* unge kabili buvinde bwa kwinika kine mpunda ifumine kuli Leeza, unge buvinde bwa kulanda mu ndimi inge, kabili ni unge buvinde bwa kupilibula ndimi inge. 11 Inzi, bebio byonse bili byakitika kupitila mupasi umonke. Kila umo ali wapeelua buvinde kukonkana ni mupasi wakue Leeza vyuli kulombola.
12 Mubili uli ni biungo bingi, inzi ni umo sie, kabili biungo byonse bya ozo mubili, ata sie kine bivulile, byene ni mubili umo sie. Evio, i vili ni Kristu. 13 Pantu kupitila mupasi umo, fwe bonse twaabatiziiziwe mu mubili umo. Tuye twali Bayuda ao Bagiriki, bazia ao bantu bali uru, fwe bonse twaapokeleele* mupasi umo.
14 Kakiine, mubili te ukitilue sie na kiungo kimo, inzi ukitilue na biungo bingi. 15 Kine lukasa lwalanda nangue “Pantu nene nsili kuboko, nsili semu ya mubili,” kekio tekivinda kulengia lukasa te kunti luye lwali semu ya mubili. 16 Kabili, kine kutui kwalanda nangue “Pantu nene nsili linso, nsili semu ya mubili,” kekio tekivinda kulengia kutui te kunti kuye kwali semu ya mubili. 17 Mubili onse ubenge wali linso, ale buvinde bwa kunvua bwaasiile kuya bwali kupi? Mubili onse ubenge wali kutui, ale buvinde bwa kununsia bwaasiile kuya bwali kupi? 18 Inzi, Leeza waapangile kila kiungo kya mubili nga vyaatonene.
19 Biungo byonse bibenge byali kiungo kimonke, eba mubili waasiile kwalukako? 20 Kansi, kuli biungo bingi, inzi mubili umo sie. 21 Linso telivinda kumulanda kuboko nangue “Nsili na lazima yobe,” kabili mutue teuvinda kualanda makasa nangue “Nsili na lazima yenu.” 22 Ku lubali lunge, biungo bya mubili belia bimwenekele kuya byatopele sana, ni bya mana. 23 Kabili, biungo bya mubili belia bitumwene nangue te bikindeeme sana, tuli twabikindika sana, ni biungo bya mubili wetu belia bisifwaniine mu kumoneka kwa panze, bili byakitilua mu nzila ya mukinzi ukata sana. 24 Inzi, biungo bya mubili wetu belia bifwaniine mu kumoneka kwa panze, te bili na lazima ya kwemenua evio. Leeza waakikwatania mubili juu ya kulengia biungo belia bisikindikilue sana byemenue* sana, 25 evi mubili te kunti uye wakasanikile, inzi biungo byakue biye byaemenana. 26 Kine kiungo kimo kili mukukisua, ni biungo binge byonse bili byakisua pamo ni kekio kiungo; ao kine kiungo kimo kyalumbaniiwa, ni biungo binge byonse byasekelela pamo ni kekio kiungo.
27 Lonu, mwemue muli mubili wakue Kristu, kabili kila umo wenu ni semu ya ozo mubili. 28 Kabili, Leeza waakipeele kila kiungo fwasi mu kilonghaano: ba kwanza batumua; ba bubili ba nabi;* ba butatu balimu; kisia, baalia bali bakita bimpezia mano; kisia kabili baalia bali ni buvinde* bwa kukosia bange; baalia bali babakwasia bange; baalia bali bapeelana butunguluzi; baalia bali ni bupe bwa kulanda mu ndimi ipusene-puseene. 29 Te bonse bali basangua bali batumua ao ba nabi* ao balimu. Eba, te evio? Te bonse bali bakita bimpezia mano. Eba, te evio? 30 Te bonse bali ni buvinde* bwa kukosia bange. Eba, te evio? Te bonse bali ni bupe bwa kulanda mu ndimi inge, ao bwa kupilibula mu ezio ndimi. Eba, te evio? 31 Inzi, twalilile kwikwinda evi kupata* bupe bukata sana. Kabili, lonu ndi kumilangilila nzila ikilile kuwama kupita yonse.