Yaandikilue na Mateo
11 Yesu lwaapwile kubapeela malaizio basambi bakue likumi na babili (12), waafumine papo ni kuya kusambilizia ni kusimikila mu mizi yabo.
2 Inzi, Yoane waali wakakilue mu prizo lwaaunvwile mpunda palua bintu byaali byakita Kristu, waabatumine basambi bakue 3 baye bamwipuzie evi: “Eba, wewe i Olia waalandilue nangue wakeza, ao tupembeleko unge?” 4 Yesu waabaasukile evi: “Endo mwaye mumubwile Yoane bintu bimwaunvua ni kumona: 5 Lonu, ba mpofu bali mukumona, ba bilema bali mukwenda, ba bukoma bali mukuswesiiwa, ba mpokoto bali mukunvua, bafwile bali mukufufulua ni mpunda iweme ili mukusimikilua ku bapabi. 6 Ali ni nsansa, ni muntu olia asimwene muli nene kintu kya kumulengia eputale.”
7 Basambi bakue Yoane lubaabambile kubwelamo, Yesu waatendekele kulanda evi na bantu bengi sana pa lwakue Yoane: “Eba, mwaakiya kumonamo ki mu kaseeba? Eba, litete lyali mukutensiiwa na mwela? 8 Ale mwaakiya kumonamo ki? Eba, muntu avwele maubo anangheene kabili ateleele? Pantu, baalia bali bavwala maubo anangheene kabili ateleele, bali baikala mu masesi a ba makolo. 9 Kulanda kisinka, ale juu ya ki mwaakiyako? Eba, mwaakiya kumumona nabi?* Namyana kakiine nangue ozo muntu ni mukulu kuliko nabi. 10 Ozu, i olia alandilue evi mu Malembo: ‘Mona! Natuma kikula* wane ntanzi yobe,* olia wakaba kuteania nzila yobe ntanzi yobe.’ 11 Kakiine, namyana nangue pakati ka baalia bavyelue na banakazi, tekunamoneke muntu ata umo mukulu apitile Yoane Mubatizi. Inzi, muntu munini sana mu Bukolo bwa ku muulu i mukulu kupita wene. 12 Kutendekela mu nsiku yakue Yoane Mubatizi mpaka lonu, bantu bali mukukita maka evi bengile mu Bukolo bwa ku muulu, ni baalia bali mukwikwinda sana bali mukufikiila kubupata. 13 Sheria ni ba nabi* baalandile ntanzi bintu byaali byakukitika musita waiza, kisia Yoane waafikile: Bobo bunabi bwaabambile kufikiliziiwa. 14 Ata sie kine mwaitabila ao mwakaana, ozu i ‘Eliya olia waali walandilue nangue wakaba kwiza.’ 15 Emue! Olia ali ni matui, onvue.
16 Keki kizazi,* ndi kukipalania na bani? Kili nga evelia baanike bekeele ku ma fwasi a ku nsoko bali mukubakuuta benabo babali basaapa nabo, 17 bali mukulanda nangue: ‘Twaakimiliziizia nfilimbi mukinde, inzi mwemue te mwaakikinda; twaakimimbila nghimbo ya malilo, inzi mwemue te mwaakilangilila bulanda.’ 18 Enka evio, musita Yoane lwaaizile, taali walia ao kumina, inzi bantu bali balanda nangue ‘Ali ni mwela ubipile.’ 19 Mwana mwina muntu lwaaizile, wene abanga walia ni kumina, inzi bantu bali balanda nangue ‘Mone! Ozu muntu ni kazule, kabili ni mumini wa divai, rafiki wa bantu bali basonkia bitansi ni ba mazambi.’ Inzi, bintu byolokele belia bili byakita muntu, i bili byalangilila nangue ali ni mulangue.”
20 Kisia, waatendekele kubasasilila bantu ba mu mizi, molia mwaakitile bimpezia mano* bingi, pantu te baalapiile: 21 “Mupamba pali wewe Korazini! Mupamba pali wewe Betsaida! Pantu bebi bimpezia mano bikitikenge ku bantu ba mu Tiro ni ba mu Sidoni, nga baavwele kale ngubo ya kulililamo ni kwikala mu mito juu ya kulangilila nangue balapila. 22 Kabili namyana nangue, pa Busiku bwa Bupinguzi, bupinguzi bwakapata bantu ba mu Tiro ni ba mu Sidoni, bwakaba bwaleengeleko kuliko bwenu. 23 Ni mwemue ba mu Kapernaumu, eba, kunti kyakitika mukapilusiiwe mpaka mu muulu? Mwakakooka mpaka mu mankabuli;* pantu bimpezia mano byaakikitika kuli mwemue bikitikenge mu Sodoma, ozo muzi nga ulipo mpaka lonu. 24 Kabili namyana nangue, pa Busiku bwa Bupinguzi, bupinguzi bwakapata kyalo kya Sodoma, bwakaba bwaleengeleko kuliko bwenu.”
25 Kisia, Yesu waalandile evi: “Nakutasia ntanzi ya bantu, We Baba, Mulopue wa muulu ni kyalo, pantu bebi bintu waakibafiika bantu ba mulangue ni bantu basomene, inzi waakibalangilila paswetele baalia bali nga baana banini. 26 Een, We Baba, pantu ezi i nzila iwaaitabiziizie. 27 Baba wane waampeele bintu byonse, kabili te kuli ata muntu amumanine bwino sana Mwana, inga sie Baba. Kabili, te kuli ata muntu amumanine bwino sana Baba, inga sie Mwana; kabili kine Mwana tatonene kubasambilizia bantu pa lwakue Baba wakue, babo bantu te bavinda kumumana kakiine Baba. 28 Ize kuli nene, mwe bonse batopele ni mwe batweme bifunda bifinine, ni nene nakamisansamusia. 29 Twame mupiingo wane ni kusambilila kuli nene, pantu nene nsizi kuleenga kufipua, kabili nfuukile, ni mwemue mwakaba* kutuuzia. 30 Pantu mupiingo wane te wizi kukisia, kabili kifunda kyane kileengele kutwama.”