Mukanda ku Bafilipi
1 Nene Paulo ni Timoteo, bazia bakue Kristu Yesu, twamyandikila mwe batakatifu bonse bali mu buumo ni Kristu Yesu bali ku Filipi, pamo ni ba kangalila ni babombi bali babombela:
2 Buwame bwakue Leeza* ni mutende kufuma kuli Leeza Baba wetu ni kuli Mulopue Yesu Kristu, biye byali pamo nenu.
3 Ndi namutasia Leeza wane lyonse lundi namilanguluka 4 mu kila lipepo lyane lya kumulilila Leeza pa lwenu mwe bonse. Ndi napepa kila lipepo lya kumulilila Leeza nali ni nsansa, 5 pantu mwaakikwasia mpunda iweme iye ku ntanzi kutendekela busiku bwa kwanza mpaka lonu. 6 Nsininkiziizie nangue Leeza, olia waatendekeziizie miilo iweme muli mwemue, wakaba kuipwililila mpaka busiku bwakue Kristu Yesu bufike. 7 Kili sie bwino kuli nene kuwaza evi pa lwenu mwe bonse, pantu muli mu mutima wane, mwemue bali mukusekelela pamo ni nene mu buwame bwakue Leeza,* ibe ni mu kukakua kwane ao mu kusakila mpunda iweme ni kulengia imanike kisheria.
8 Pantu Leeza amanine bwino nangue ntonene sana kumimona mwe bonse. Mitonene sana nga evelia Kristu Yesu vyamitonene. 9 Kabili ntwaliliile kupepa nangue, ntono yenu iye yaya yakila kongezeka pamo ni kumana kusili na kilubo ni buvinde bwa kwinika bukumeene. 10 Ndi mukupepa muye mwasininkiziizie bintu bya mana sana, evi te kunti muye mwali na kilubo, kabili te kunti muye mwalengia bange beputale mpaka ku busiku bwakue Kristu, 11 kabili nangue munonkelemo sana mu miilo yonse iweme elia ili yaletua na Yesu Kristu kupitila fwefue, evi Leeza alumbaniiwe ni kutasiiwa.
12 Mwe ba lupua, lonu ntonene mumane nangue aali yane ili mukukwasia kakiine mpunda iweme ikile kusalanghana. 13 Kekio kyaakilengia kukakua kwane pa mulandu wakue Kristu kumanike sana ku Balinzi bonse bakue Likolo ni ku bantu bange bonse. 14 Lonu, ba lupua bengi muli Mulopue baakyaluka ni bukisinka juu ya kukakua kwane. Kabili, bali mukukila kulangilila mibele ya kusipa evi kulanda mulandu wakue Leeza bila kutiina.
15 Kakiine, bamo bali mukusimikila pa lwakue Kristu bali ni bwivu ni kulwisiana, inzi bange bali mukukita evio bali ni nia iweme. 16 Baaba ba mwisio bali mukusimikila pa lwakue Kristu juu ya ntono, pantu bamanine nangue naasaakwilue evi kusakila mpunda iweme. 17 Inzi, baalia bali mukusimikila juu ya bwivu ni kulwisiana, te basonseziiziwe na nia iweme, pantu bene bakebele kundetela maavia monu mu kifungo mundi. 18 Kekio kyaakilengia kwaluke ki? Mu kila nzila, iye yali mu kisinka ao abe, Kristu ali mukusimikilua, ni nene ndi mukusekelela palua kako. Kabili, kakiine nakaba kutwalilila kusekelela, 19 pantu manine nangue kekio kyakaba kulengia nkabe kupusuka kupitila mapepo enu a kumulilila Leeza, pamo ni kukwasiiwa na mupasi wakue Yesu Kristu. 20 Keki kipateene ni kelia kinkebele sana pamo ni kuswapila nangue nsikaba nali na nsambu ata imo ya kunvua busoni. Nsininkiziizie nangue nakaba kuvinda kutwalilila kulanda nali ni uru, evi nvinde kumulumbania Kristu lonu, nga vinakiba nakita lwa ntanzi, ibe kupitila bukose ao lufu lwane.
21 Pantu pa lwane, kuya nakosele ni juu yakue Kristu. Inzi kine nafua, kyakila kuwama kuli nene. 22 Kine lonu ntwaliliile kwikala nali ni onu mubili, kekio kili kyaletua na miilo yane. Inzi, kelia kindi kuvinda kusaakula, nsikilanda. 23 Nene nkulilue na bebi bintu bibili, pantu ntonene kukakulua ni kwaluka pamo ni Kristu, kulanda kisinka, kekio i kikilile kuwama. 24 Inzi, kine natwalilila kuya nakosele mu onu mubili, ni juu ya kunti munonkelemo. 25 Pa kako, pantu nsininkiziizie evio, manine nangue nakaba kutwalilila ni kusyala nali pamo ni mwe bonse juu ya buyantanzi bwenu ni nsansa yenu mu kiketekelo, 26 evi nsansa yenu muli Kristu Yesu ikile kongezeka kupitila nene musita undi pamo nenu kabili.
27 Muye mwaenda sie mu nzila ipateene ni mpunda iweme pa lwakue Kristu, evi ata sie kine naiza ni kumimona, ao ata sie kine nsizile, ngunvue juu yenu ni kumana nangue mwimeene sinta mu mupasi umo, kabili mwali mu kimo* ni koku mwaikwindile kubombela pamo palua kiketekelo kya mpunda iweme, 28 kabili bila kuya mwatutumiiwa mu nzila ata imo na baalia bali bamipinga. Kekio kyenka i kilangiliile kwinoonua kwabo, inzi kilangiliile bupusuko kuli mwemue, kabili kekio kifumine kuli Leeza. 29 Mwaapeelue lisyuko, apana sie lya kubiika kiketekelo kyenu muli Kristu, inzi kabili lya kwemiiwa juu yakue. 30 Pantu muli mukusaakaana ni maavia enka alia amwaamwene nasaakaana nao, alia amuli mukunvua lonu nangue ntwaliliile kualwisia.