Mukanda wa Bubili ku Bakorinto
6 Pantu tuli twabomba pamo ni Leeza, twaakilangililua buwame.* Pakako, te kunti muye mwabupuulula. 2 Pantu wene alandile evi: “Naakunvwile mu nsita itabiilue, kabili naakukwasiizie mu busiku bwa kupususiiwa.” Mone! Enu i nsita itabiilue kakiine. Mone! Bonu i busiku bwa kupususiiwa.
3 Te tuli mukulengia mu nzila ata imo bange beputale, evi mu miilo yetu te kunti mumoneke kilubo ata kimo; 4 inzi, mu kila nzila, tuli twailangilila fwe bene kuya twali babombi bakue Leeza, lutuli twasipikizia bingi, lutuli mu lyemo, lutuli ni lazima ya bintu, lutuli mu maavia, 5 lutuli twaumua, lutuli twakakua, lutuli mu binvulunghania, lutuli twabomba miilo ikolele, lutuli twapunga, lutuli twapusua byakulia; 6 lutuswetele, lutuli twalangilila nangue tumumanine Leeza, lutuli twapembelela, lutuli twalangilila buwame, lutuli twatungululua na mupasi utakatifu, lutuli twalangilila ntono isili ya bunafiki, 7 lutuli twalanda bulanzi bwa kisinka, lutuli twabombia buvinde bwakue Leeza; lutuli twakwata ku kuboko kulio* ni ku kuboko kuso* bintu bya kulwaninako bya kooloka, 8 lutuli twakindikua ni lutuli twamoniiwa busoni, lutuli twalandilua bibipile ni kulandilua biweme. Tumwenue kuya twali bantu bali babepa,* inzi tuli twalanda kisinka. 9 Tumwenue nga bantu basimanikile, inzi tumanikile, tumwenue nga bantu bali mukufua,* inzi mone, tukosele! Tumwenue nga bantu bapeelue malipizi, inzi te tutwelue ku lufu, 10 tumwenue kuya twali bantu ba bulanda, inzi tuli mukusekelela lyonse, tumwenue nga bapabi, inzi tuli mukulengia bengi banonke, tumwenue nga bantu basikwete kantu, inzi tukwete bintu byonse.
11 Mwe Bakorinto, twaakimilanzia bila kumifiika kantu* ni kumiizwila sana mutima wetu. 12 Fwefue te tuli mukwizuia kumilangilila ntono yetu, inzi mwemue muli mukwizuia kutulangilila ntono yenu ikata. 13 Pa kako, nalanda nga nene ali mukulanda na baana bane nangue ni mwemue izule sana mitima yenu.
14 Tekukakililue* mu nzila isipalile pamo ni bantu basizumiine. Pantu, eba, kooloka ni kutyona sheria bipateene syani? Ao, mwangaza ni kafinzi bipateene mu ki? 15 Kukila pa kako, Kristu ni Beliali* bapateene syani? Ao, muntu azumiine* ni asizumiine bapateene mu ki? 16 Kabili, ekalu yakue Leeza ili yaunvuana ni mikisi mu ki? Pantu, fwefue tuli ekalu yakue Leeza akosele; nga evelia vyaalandile Leeza mwine nangue: “Nakeekala pakati kabo, ni kwenda pakati kabo, kabili nakaaluka Leeza wabo, ni bene bakaaluka bantu bane.” 17 “‘Pa kako, fume pakati kabo, ni kwitenga mwe bene,’ i vyalanda Yehova,* ‘kabili lekele kukumia ku kintu kifiitile’”; “‘kabili nakaba kumipokelela.’” 18 “‘Kabili, nakaaluka baba wenu, ni mwemue mwakaaluka baana bane balalume ni banakazi,’ i vyalanda Yehova,* wa Maka Onse.”