LISOMO 25

Tuli Twakuula Siani Masesi a Bukolo Kabili Sababu ya ki?

Bakasininkizia bakwipeela kwa kwitonena bali mu kukuula Nsesi ya Bukolo mu kyalo kya Bolivie — Bolivie

Nsesi ya Bukolo mu kyalo kya Nigéria ntanzi ya kutengeneziiwa

Nsesi ya Bukolo mu kyalo kya Nigéria kisia kutengeneziiwa — Nigéria (ntanzi ni kisia)

Pa fuasi pali mu kukuulilua Nsesi ya Bukolo mu kyalo kya Tahiti — Tahiti

Nga evelia vililangiliile liina liine, Masesi a Bukolo ni mu fuasi mutuli twapeelua masambilizio a Bibilia alandiile palua Bukolo Bwakue Leeza: mutue ukata wa kusimikila kwakue Yesu.—Luka 8:1.

Ni mu fuasi muli mwakitilua lupupo lwa kisinka. Bulondolozi bwa kuya mu kusimikila buli bwakitilua mu Nsesi ya Bukolo. (Mateo 24:14) Masesi a Bukolo te ali na bukata bumo sie kabili te akuulilue mu namuna imo, inzi oonse ni akawaida sie. Liingi muli mwalonghaaninua na libumba limo ao engi. Mu miaka yakipita, eevi kukwasia kuvuzia mabumba, twakuulile makumi a maelufu a Masesi a Bukolo (Masesi a Bukolo asaano eevi kila busiku). Eba, tuli twaviinda siani ezio miilo?—Mateo 19:26.

Ali akuulua kupitila bulongio bwa kwitonena buli bwakitua na beengi. Bulongio boobo, buli bwatumua ku musambo eevi kukwasia mabumba akebele kukuulilua ao kuwamiiziwa Nsesi ya Bukolo.

Ali akuulua na balupua ni bankazi bakwitonena kufuma mu nkende ilekenkeene. Mu byalo biingi, bikundi bya bakakuula ba Masesi a Bukolo (biundilue na baalia batuli twakuuta bepeele kwa kwitonena ni babombi ba kukuula Masesi a Bukolo) bali baaya ku kila libumba, anzia kine libumba lili kwa buunke saana, eevi kubakwasia balupua benaabo kukuula mwa kulonghaanina. Mu nkende inge, Bakasininkizia bali ni bufuundi, bapeelue miilo ya kuteania kukuula ni kutengenezia Masesi a Bukolo mu nkende ipalile. Bakasininkizia baange bafumine mu nkende paleepale bali ni bufuundi, bali baipeela kubombela mu mafuasi paleepale. Inzi, balupua ni bankazi bali peepi ni paabombelua miilo i bali babomba miilo ikata. Beebio byoonse bili byakitika kupitila mupasi wakue Yehova ni maka a bantu bakue.—Malumbo 127:1; Bakolosai 3:23.

Sababu ya ki nkende i twalonghaaninamo ili yakutua Nsesi ya Bukolo?
Tuli twakita siani eevi Masesi a Bukolo akuulue mu kyalo kyoonse?