Leeza Ali ni Mpunda ki Iweeme Palwetu?

1. Ni mpunda ki iweeme ifumine kuli Leeza?

Leeza atonene tuye twali ni buikazi buli ni nsaansa paanu pa kyalo. Wabumbile kyalo ni byoonse bili byasanguamo paantu atutonene. Leenu sie, wakaba kuwamia buikazi bwa bantu boonse atasie kine bali mu kyalo ki. Wakaba kufumiapo bintu byoonse bili byatuleetela maavia.​—Soma Yeremia 29:11.

Te kuli buteeko bwaviindile kale kufumiapo bangipaani, maluele ao lufu. Inzi, kuli ni mpunda iweeme! Leeza wakaba kufumiapo buteeko bwa bantu ni kubikapo buteeko bwakue. Bantu bakeekala mu buteeko bwakue Leeza, bakaba ni mutende kabili ni bukose bwaweeme.​—Soma Isaya 25:8; 33:24; Danieli 2:44.

2. Sababu ya ki ni kintu kya mana saana kumana eezi mpunda iweeme?

Maavia akapua sie musita Leeza luali wakafumia bantu babiipile pa kyalo. (Zefania 2:3) Wakabafumiapo musita ki? Mulandu Wakue Leeza, Bibilia, walandile ntaanzi palua bintu bibiipile bili mukukitika leenu. Beebi bintu byoonse bili mukukitika, bilangiliile nangue kwasiala sie musita uniini Leeza eeze afumiepo maavia.​—Soma 2 Timoteo 3:1-5.

3. Tupalile kukita ki?

Tupalile kumumana Leeza kupitila kusambilila Mulandu wakue, Bibilia. Bibilia ili nga mukanda ufumine kuli baba ali ni kutona kukata. Ili yatubuila bintu bitupalile kukita eevi tuye twali ni buikazi buweeme leenu ni vya kwikala loonse pa kyalo musita uli mukuiza. Paange, baange te bakaba kutona kukumona wasambilila Bibilia. Inzi te kulekeela muntu oonse akuanzie kusambilila Bibilia; teulekela, teukapata buikazi buweeme musita uli mukuiza.​—Soma Tuswalo ni Mafunde 29:25; Nfyulo 14:6, 7.