Bakote ba mu Libumba Bali ni Miilo ki?

Bakote ba mulibumba te bantunguluzi ba diini. Te beezi kulipua palua miilo ibali babomba mu libumba. Nga evilia Bakristu ba ku ntendeko, ni beene ni balalume bamupaleeme saana Yehova, basaakuilue kusuunga libumba. (Miilo 20:28) Bali bafikilizia mibeele ilombelue eevi beemanine ni kusuunga libumba, ‘bawamiinue pasili kupatikiziiwa, te kuba babombela sie kusaziiwa (ao kulipua) inzi baabomba baatonene na mutima waabo oonse.’ (1 Petro 5:1-3) Bali batukitila miilo ki?

Bali batusuunga ni kutuemena. Bakote bali batungulula, basuunga ni kukwasia libumba limupalame Yehova. Te beezi kutusuunga batukisiizie paantu bamanine nangue eezi miilo bapeelue na Leeza. Ni pakaako, bali batukwasia kuwamia buikazi buetu ni kusaanga nsaansa. (2 Bakorinto 1:24) Bali baikwinda kumana kila muntu mu libumba lyabo nga evelia musuungi vyali waikwinda kumana buino nkondoolo yali mu kusuunga.​—Tuswalo ni Mafunde 27:23.

Bali batusambilizia kukita kutona kwakue Leeza. Kila mulungu, bakote bali baimanina kulonghaana kwa libumba eevi bakosie kiketekelo kyetu. (Miilo 15:32) Baaba balalume, te beezi kwipeela sie inzi, bali batubiikila mufuano uweeme wa kukoonka mu miilo ya kusimikila. Tuli twasimikila naabo kabili bali batubelezia nzila yoonse ya kusimikila.

Bali batukoselezia. Bakote bali balondolola ni fwefue mu Nsesi ya Bukolo ao kutuendela ku masesi eetu, eevi kukwasia kila umo weetu abe ni bukibuza bwa peepi pamo ni Yehova. Kibali bakeba ni kutukwasia ni kutukoselezia.​—Yakobo 5:14, 15.

Kukila pa miilo yaabo ya mu libumba, bakote baange bali babomba ni miilo ya kimubili ni baange bali ni miilo ya kuemena lupua lwabo ilombele musita ni kukeengela. Baaba balupua ‘bali babomba miilo ikata’ bapalile kukindikua kakiine.​—1 Batesalonika 5:12, 13.

• Bakote ba mu libumba bali ni miilo ki?

• Kila muntu palwakue ali wakwasiiwa siani na bakote?