LISOMO 17

Bakangalila ba Muputule Bali Babomba Miilo ki?

Kangalila wa muputule ni mukazi wakue — Malawi

Kangalila wa muputule ali mu kutungulula bulondolozi bwakuya mu kusimikila — Bulondolozi bwa kuya mu kusimikila

Kangalila wa muputule ali mu kusimikila — Kusimikila

Kangalila wa muputule ali mu kikao ni bakote ba mu libumba — Kikao kya bakote ba mu libumba

Maleembo a Kigiriki a Kikristu ali azimbula Barnaba ni mutumua Paulo, kuya baali bakangalila baali baendela mabumba a Bakristu ba ku ntendeko. Sababu ya ki babaanga baendela mabumba? Paantu babaanga baemena saana aali iweeme ya kimupasi ya Bakristu benaabo. Paulo walandile eevi: ‘Tubwele tuye tubapempule balia bakwetu, eevi tuye tubamone vibali.’ (Miilo 15:36) Paulo, abaanga wakita makilometre eengi eevi aye abakoselezie kimupasi Bakristu. I vili vyakita ni bakangalila ba muputule leenu.

Bali baiza kutukoselezia. Kila kangalila wa muputule ali waendela mabumba makumi abili ao kukila. Ali waendela libumba limo mara ibili ku muaka. Kine waendela libumba, ali wapisia mulungu oonse pamo ni libumba leelio. Bufuundi bwabo ni bwa bakazi baabo (kine batoolele) buli bwatuletela faida ikata. Bali baatona kumana balumendo ni bakaziana ao baanike ni kuya naabo mu miilo ya kusimikila ni mu masambililo a Bibilia. Bali bakwasia pa buunke bantu ba mu libumba musita ubali babeendela ku masesi aabo pamo ni bakote ba mu libumba. Maasi abali balaanda mu mabumba ni ku kulonghaana kukata ali atukinkizia saana.—Miilo 15:35.

Bali baemena kila umo mu libumba. Bakangalila ba muputule bali bakwasia bantu ba mu libumba kuwamia bukibuza bwabo pamo ni Yehova. Bali bakolonghana pamo ni bakote ba mu libumba ni babombi bali babombela eevi bamone vili buyantaanzi bwa kilonghaano ni kubapeela masoke paleepale a kubakwasia kubomba buino miilo yaabo. Kabili bali bakwasia bapainia eevi basaange matokeo aweeme mu miilo yaabo ya kusimikila. Bakangalila bali baatona saana kubamana bakasimika baleenu ao basinakokole ni kumana vili buyantaanzi bwabo. Kila kangalila ali waipeela mukwitonena kabili wabamuene baange nga ‘beenzi nakue baali wabomba naabo,’ palua faida yeetu. (2 Bakorinto 8:23) Kiketekelo kyabo ni kukuatana kwabo pamo ni Leeza, ni mifuano iweeme itupalile kukoonka.—Baebrania 13:7.

Juu ya ki bakangalila ba muputule bali baendela mabumba?
Kunti wasaanga siani faida kine kangalila waendela libumba lyetu?