LISOMO 19
Muzia Wakisinka ni wa Maano Naani?
Fwefue boonse, tuli twapata byakulia byaweeme bya kimupasi
Musita uniini ntaanzi ya kufua kwakue, Yesu walondoluele pamo ni basambi bakue bana: Petro, Yakobo, Yoane ni Andrea. Walandile naabo palua bintu ‘byakakitika pakuti bakamone nangue i musita wa kwiza (ao kubaapo) kwakue;’ bintu beebio byakakitika mu nsiku ya mpeleezio. Kabili wabeepuziizie kipuzio keeki kya mana: ‘Emue, ale mubombi (ao muzia) wakisinka ni wa maano naani? Ni olia waabiikilue na selenzi (ao mukulu wa miilo) kuti a peele babombi nakue bilio pa musita upalile.’ (Mateo 24:3, 45; Marko 13:3, 4) Paapa mulandu “bilio,” ulangiliile byakulia bya kimupasi. Yesu, “selenzi (ao mukulu wa miilo),” wabalaile basambi bakue nangue wakamubiika olia wakabapeela maano engi mu nsita ya mpeleezio. Oozo “muzia” naani?
Ni kikundi kiniini kya Bakristu babikilue mafuta. Mulandu “Abikilue mafuta” mana yakue asakwilue na mupasi wakue Leeza. “Muzia” oozo i Kabungue Kali Katungulula ka Bakasininkizia Bakue Yehova. Oozo muzia ali wabapeela kyakulia kya kimupasi babombi baange bakue Yehova. Tumuswapiile weene atupeele “bilio pa musita upalile.”—Luka 12:42.
Emaniine nsesi yakue Leeza. (1 Timoteo 3:15) Yesu wamupeele oozu “muzia” miilo ikata ya kuimanina bunoonsi bwa seemu ya kuteania kwakue Yehova kwa pa kyalo ni miilo nga evelia: kusimikila ni kusambilizia mu mabumba eetu. Pakunti muzia wakisinka ni wa maano atupeele byakulia bya kimupasi, kabili pa musita ufuaniine, ali wafumia byakulia beebio kupitila mpapulo ituli twabombia mu kusimikila, ni kupitila masambilizio alia atuli twapelua mu libumba ni ku kulonghaana kukata.
Muzia oozo ni wakisinka paantu ali wasambilizia kisinka kili mu Bibilia mu nzila ifuaniine, ni kukwatisia na maka miilo yakue ya kusimikila mpunda iweeme, kabili, ni wa maano paantu asuungile buino bunoonsi bwakue Kristu buli paanu pa kyalo. (Miilo 10:42) Yehova ali wapaala miilo yakue; bantu beengi bali baiunga pamo nakue. Kabili Yehova ali wamukwasia muzia oozo wakisinka ni wa maano kubapeela bantu baabo byakulia biingi saana bya kimupasi.—Isaya 60:22; 65:13.
Yesu wasakuile ni, eevi abaliisie kimupasi basambi bakue?
Sababu ya ki kunti twalanda nangue muzia ni wakisinka kabili ni wa maano?