LISOMO LYA 12
Ni Kiki Kili Kukukwasia Eevi Utwalilile Kusambilila Bibilia?
Kusambilila Bibilia, bulendo bwa kuya kupata kilambu. Anzia evio, kusambilila tekwizi kuya kwaleengele lyonse. Musita unge, kunti waiipuzia kine wakaba kuviinda kutwalilila kuya wasambilila Bibilia. Juu ya ki kiweeme saana kukita maka eevi utwalilile kusambilila? Kunti wakita siani eevi utwalilile kusambilila anzia maavia?
1. Juu ya ki kusambilila Bibilia ni kwa mana?
“Mulandu Wakue Leeza uli ni bukose kabili uli ni buviinde.” (Baebrania 4:12) Bibilia ni ya mana paantu ili yalangilila Leeza vyali watontonkania kabili vyakutonene. Kupitila kusambilila, wakaba kumana bintu bingi, kabili wakaba kuya wali ni buikazi bukilile kuwama ni kiswapilo palua musita uli mukuiza. Kintu kya mana saana, Bibilia ili kukukwasia waluke kibuza wakue Yehova. Kine watwalilila ni kusambilila Bibilia, wakaba kwaluka ni buikazi buli ni nsaansa.
2. Juu ya ki kiweeme kwinika nangue kisinka kili mu Bibilia ni kya mana?
Bisinka bili mu Bibilia, bili nga evelia bunoonsi bwa mana saana. Pakaako Bibilia ili yatukinkizia ‘tusite kisinka kabili tekuti tukisisie ata kaniini.’ (Tuswalo ni Mafunde 23:23) Kine twatwalilila kuya twalangulukile nangue kisinka kili mu Bibilia ni kya mana, twakaba kukita maka etu onse eevi tutwalilile kusambilila Bibilia anzia kine twasaakaana ni maavia.—Some Tuswalo ni Mafunde 2:4, 5.
3. Yehova kunti wakukwasia siani eevi utwalilile kusambilila?
Paantu Yehova i Kabumba wamaka onse kabili Kibuza obe, akumanine buino saana kabili atonene kukukwasia usambilile eevi umumane. Kunti ‘wakulengia kuti uye watonene kukita muatoneene’ ni kukupeela maka. (Some Bafilipi 2:13.) Kakiine, kine ukebele kukwasiiwa eevi usambilile ao ubombie beelia biuli mukusambilila, ali kukukwasia. Kine ukebele kwaluka ni maka a kunti akukwasie kwanzia maavia ao kupingua, ali kukupeela. Lyonse, pepa kuli Yehova wamuloomba akukwasie eevi utwalilile ni kusambilila Bibilia.—1 Batesalonika 5:17.
TUKEBE SAANA
Tumone vya kukita eevi tutwalilile kusambilila Bibilia anzia kine uli ni bingi byakukita ao kine bantu bange bakupinga. Kisia, tumone Yehova vyakaba kukukwasia eevi utwalilile ni kusambilila.
4. Langilila nangue lisambililo lyobe lya Bibilia ni lya mana saana
Musita unge, kunti twaimona nangue tuli saana ni bintu bingi byakukita, kabili te tuli na musita wa kusambilila Bibilia. Kukita siani? Some Bafilipi 1:10, kisia londoluele beebi biipuzio:
Weewe pa lobe, ni bintu ki biumwene nangue ni ‘bintu bikindeeme saana’ mu buikazi?
Kunti wakita ki eevi ulangilile nangue kusambilila Bibilia ni kwa mana saana kuli weewe?
Kine watibunkanianke misenga mu bumba kusiali wabiikamo mabue, mabue teakumanamo
Kine watendekanke kubiikamo mabue, uli kusialilwamo ni fuasi ya kunti ubiikemo misenga ingi. Enka evio kine wabiika pa ntaanzi ‘bintu bikindeeme saana’ mu buikazi bobe, wakaba kuya wali ni buviinde bwa kufikilizia bebio bintu ni kusyalilwako ni musita wa kukita bintu binge
Bantu, baabumbilue bali ni nkulu ya kumumana ni kumubombela Leeza. Inzi, pa kunti tukite evio, iloombele kusambilila Bibilia. Some Mateo 5:3, (NWT), kisia londoluele keeki kiipuzio:
Kunti twapata mpaalo ki kine twabiika kusambilila Bibilia pa fuasi ya kuanza mu buikazi bwetu?
5. Sipikizia kine bakupinga
Musita unge, bantu bange kunti bakutiona mutima eevi ulekele kusambilila Bibilia. Mona mufuano wakue Francesco. Mone VIIDEO, kisia londoluele beebi biipuzio.
Mu eezi viideo, benakue kwa Francesco pamo ni lupua lwakue, baakitile siani musita Francesco lwababuilileko beelia byabanga wasambilila?
Paantu waasipikiziizie, waapatile mpaalo ki?
Some 2 Timoteo 2:24, 25, kisia londoluele beebi biipuzio:
Lupua loobe ni benoobe bali baiunvua siani paantu uli mukusambilila?
Nga vyalanda eezi milongo, upalile kukita siani kine muntu umo eevi wafiitua paantu wakumona wali mukusambilila Bibilia? Juu ya ki walanda evio?
6. Muswapile Yehova akukwasie
Musita utuli kuya twakila kumupalama Yehova, nkulu yeetu ya kumusaansamusia ili kuya yakila kutana. Inzi, kunti twamona kyakolele kwalulula bintu binge mu buikazi juu ya kukoonka mafunde akue. Kine waaiunvuilepo kale evio, te kulekela ata kaniini. Yehova wakaba kukukwasia. Mone VIIDEO, kisia londoluele beebi biipuzio.
Mu eezi viideo, Jim waakitile bupilibuko ki eevi amusaansamusie Yehova?
Ni kiki kyakusaansamusia ku mufuano wakue?
Some Baebrania 11:6, kisia londoluele beebi biipuzio:
Yehova wakaba kubakitila ki baalia bali bakita maka eevi bamumane ni kumusaansamusia?
Nga vilandile ozu mulongo, eba, Yehova ali wasaansamuka musita lwali wamona wakita maka eevi usambilile Bibilia? Juu ya ki watontonkania evio?
UNGE KUNTI WAIPUZIA: “Juu ya ki uli mukusambilila Bibilia?”
Weewe pa lobe, kunti waasuka siani?
MU KIFUPI
Anzia kine lyonse kusambilila Bibilia tekwizi kuya kwaleengele, kukita evio kunti kwakukwasia usekelele buikazi loonse. Twalilila kuya wamuswapiile Yehova, kabili ni weene wakaba kukupeela kilambu.
Kunti waasuka siani?
Juu ya ki bisinka bili mu Bibilia ni bya mana kuli weewe?
Kunti wakita ki eevi ulangilile nangue kusambilila Bibilia ni kwa mana saana kuli weewe?
Juu ya ki upalile kupepa kuli Yehova wamuloomba akukwasie utwalilile kusambilila Bibilia?
MANAKO NI BINGE
Mona bintu bina byaabakwasiizie bantu bengi babombie kwa mulangue musita wabo.
“Vya Kubombia Musita obe kwa Mulangue” (Buuke!, ya Muezi wa 2, 2014)
Mwanakazi umo abanga waali ni mulume. Ozo mulume wakue, tabanga wainikile maka abanga akita mukazi wakue eevi amusaansamusie Leeza. Mona Yehova vyaamukwasiizie.
Yehova Ali Watupeela Maka Eevi Tusipikizie Maavia etu (5:05)
Mona mwalalume umo vyaakwasiiziwe na kusipikizia kwakue mukazi wakue.
Musita unge, Bakasininkizia Bakue Yehova bali basikililua nangue bali bationa byupo. Eba, kakiine bali bationa?