Biipuzio Kufuma Ku Bakabeleenga

Eba, te kuli mibeele inge ya “lizabo lya mupasi” kukila pa elia izimbuilue mu Bagalatia 5:22, 23?

Ezio milongo izimbuile mibeele kenda. Ilandile eevi: “Lizabo lya mupasi ni ntono, nsaansa, mutende, kupembelela, kuwamiiziana, buwaame, kiketekelo, bufuuke, kwitiinia.” Inzi, te tupalile kumona nangue mupasi wakue Leeza uli watukwasiasie kulangilila ezio mibeele bunke.

Twamana siani? Ntaanzi mutumua Paulo azimbule lizabo lya mupasi, waaleembele eevi: ‘Miilo ya mubili . . . ni bintu bya bupungue, butapa, lwendo lwa nkeni, kupupa mikisi, kwampana na myela ibi, buluani, kukankabula, bunkua, kupuuka kwa kipuki, mazibo, kukasanika, kwiteenga mu tubumba-tubumba, lunkumbua, bukyakolua, maliila apitiliile, ni bintu nga bebio.’ (Bag. 5:19-21, NWT) Paulo waapeleziizie milandu yakue walanda eevi: “bintu nga bebio.” Kansi, taazimbuile bintu byonse bilangiliile “miilo ya kimubili,” nga beelia bilangiliilue mu Bakolosai 3:5. Waakitile enka evio ni musita lwaali wazimbula mibeele kenda iweeme. Mu mulongo wa 23, Paulo waalandile eevi: “pa bebio bintu te kuli muzilo.” Kansi Paulo taali wakeba kuzimbula mibeele yonse iweeme itupalile kukuzia kupitila kukwasiiwa na mupasi utakatiifu.

Paunvuika kine twapalania ezio mibeele na milandu yaaleembele Paulo ku kilonghaano kya ku Efeso: “Lizabo lya lubuto libiikile mukati buwaame bwa kila musaango, ni nsaambu ni kisinka.” (Baef. 5:8, 9, NWT) Kakiine “buwaame,” pamo ni nsaambu ni kisinka, ni seemu ya “lizabo lya lubuto,” inzi kabili buli pakati ka mibeele ya “lizabo lya mupasi.”

Kabili, Paulo wamusokele Timoteo ‘akonkezie nsaambu, kulamatilila kuli Leeza, kiketekelo, ntono, kusipikizia, ni bufuuke’​—mibeele sita iweeme. (1 Tim. 6:11) Mibeele itatu sie bunke (kiketekelo, ntono, ni bufuuke) i ili pakati ka “lizabo lya mupasi.” Inzi, Timoteo ni weene waali wakabiile kukwasiiwa na mupasi eevi akuzie mibeele inge yazimbuluanga: nsaambu, kulamatilila kuli Leeza, ni kusipikizia.​—palania ni Bakolosai 3:12; 2 Petro 1:5-7.

Pakaako, lileembo lya Bagalatia 5:22, 23 te lizimbuile mibeele yonse ya “lizabo lya mupasi.” Mupasi wakue Leeza uli waatukwasia kukuzia mibeele kenda yakuutuanga nangue “lizabo lya mupasi.” Inzi kuli mibeele ingi saana itupalile kukuzia eevi twaluke Bakristu bakosele kimupasi, ni ‘kuvuala bumuntu bwa leenu bolia bwaakitilue kukoonkana ni kutona kwakue Leeza mu nsaambu ya kiine ni bukisinka.’​—Baef. 4:24.