Mwe Balumendo ni Bakaziana Twalilile Kukita Buyantanzi Kisia Kubatiziiwa

1. Balumendo ni bakaziana bengi, baakikita kale bintu ki biweeme?

KILA muaka maelufu a balumendo ni bakaziana Bakristu, bali mukufikiila kubatiziiwa. Eba, ni weewe wakibatiziiwa kale? Kine i evio, balupua ni bankazi bobe ba kimupasi bali ni nsaansa juu yobe, Yehova ni weene ali mukusekelela! (Tus Maf. 27:11) Tontonkania kaniini palua bintu biweeme biwakifikiila kale kukita. Waakisambilila Bibilia kwa mute, paange mu miaka ingi. Bintu biwaakisambilila byaakikukwasia kusininkizia nangue Bibilia ni Mulandu Wakue Leeza. Inzi, kukila pakaako waakifikiila kumumana ni kumutona muine Waaleembesiizie Bibilia. Ntono yobe kuli Yehova yaakifikiila kutana, ni keekio kyaakilengia wipeele kuli weene ni kufikiila kubatiziiwa. Kakiine waakikwata bupinguzi bwaweeme saana!

2. Tuli kusambilila ki mu leeli lyasi?

² Kakiine, ntaanzi ya kufikiila kubatiziiwa, kiketekelo kyobe kyaakyeziiwa mu nzila ingi. Inzi, musita luwakaba kuya wakula, wakaba kusaakaana ni maavia a leenu. Sataana wakaba kwezia kukulengia ulekele kumutona ni kumubombela Yehova. (Baef. 4:14) Te upalile kulekelela keekio kikitike. Ni kiki kili kukukwasia kusiala wali wa kisinka kuli Yehova ni kufikilizia bulayo bobe bwa kumubombela weene? Upalile kutwalilila kukita maka obe onse eevi waluke Mukristu akosele kimupasi. (Baeb. 6:1) Inzi, kunti wakita siani evio?

KUNTI WAKITA SIANI EEVI WAALUKE MUKRISTU AKOSELE KIMUPASI?

3. Kisia kubatiziiwa, Bakristu bonse bapalile kukita ki?

³ Kisia kubatiziiwa, fwe bonse tupalile kukoonka musoko wakue mutumua Paulo waabapeele Bakristu nakue ba mu Efeso. Waabakinkiziizie baaluke Bakristu ‘bakulile mu nzila ipuililikile.’ (Baef. 4:13, NWT) I kulanda nangue baali bapalile ‘kutwalilila kukita buyantanzi.’ Paulo waapalaniizie buyantanzi bwetu bwa kimupasi na kukula kwa mubili wa muana. Baviazi bali ni muana wakasi, bali basaangua bamutonene kabili bali baitoneena juu yakue. Inzi, takaba kutwalilila kuya wali muana wakasi lyonse. Pa musita umo wakaba kufikiila kulekela “bintu byonse bya bwanike.” (1 Bakor. 13:11) I vili ni fwe Bakristu. Kisia kubatiziiwa, tupalile kutwalilila kukita buyantanzi. Kansi, tulondoluele masoke paleepale ali kutukwasia kukita evio.

4. Ni mibeele ki ili kukukwasia kukita buyantanzi bwa kimupasi? Londolola. (Bafilipi 1:9)

⁴ Kila kukosia ntono yobe kuli Yehova. Loonu, umutonene saana Yehova. Inzi, kunti wakizia ntono yobe kuli Yehova. Mu nzila ki? Mutumua Paulo waalandileko nzila imo, nga elia ili mu Bafilipi 1:9b. (Soma.) Paulo waapepele eevi ntono ya Bakristu Bafilipi “iye yakilasie kuvula.” Kansi, kunti twakizia ntono yeetu kuli Yehova. Kunti twakita evio kupitila kwaluka ni “kumana kusili na kilubo ni kwinika kupuililikile.” Vituli kuya twakila kumumana Yehova, i vituli kuya twakila kumutona weene ni kukila kutasia mibeele yakue pamo ni nzila yakue ya kukitilamo bintu. Tuli kukila kumusaansamusia weene. Kabili, tetuya twatona ata kaniini kukita kintu kyonse kya kumulengia afipue. Tuli kuya twakita maka eevi kumana beelia byatonene fwefue tukite ni vya kukita bintu bebio.

5-6. Kunti twakuzia siani ntono yeetu kuli Yehova? Londolola.

⁵ Kunti twakuzia ntono yeetu kuli Yehova, kupitila kumumana buino Muana wakue, olia waalangiliile bumuntu bwakue Baba wakue mu nzila ipuililikile. (Baeb. 1:3) Nzila iweeme saana ya kumumana Yesu, ni kusambilila mpunda ili mu bitabu bina bya Nsimiko. Kine teunatendeke kusoma Bibilia kila busiku, wamona siani utendeke loonu kupitila kusoma mpunda palwakue Yesu? Musita luuli kuya wasoma mpunda palwakue Yesu, pooza saana maano ku mibeele yakue. Bantu baali batona kumupalama ni kumulanzia. Kabili waalangiliile ntono kupitila kubatwama banike baniini mu maboko. (Mark. 10:13-16) Yesu waali waweeme, kabili waali watonene bukibuza. Basambi bakue tebaali batiina kumubuila vibaali baiunvua. (Mat. 16:22) Mu ezio nzila, Yesu waamupalile Baba wakue wa ku muulu. Yehova ni weene ali wapalamua saana. Kunti twaya kuli weene kupitila lipepo. Musita utuli twapepa, kunti twamubuila kila kintu kituli mukutontonkania ni vituli mukwiunvua. Tusininkiziizie nangue Yehova taviinda kutupingula ovio. Atutonene, kabili ali watwemena.​—1 Pet. 5:7.

⁶ Yesu waali wabonvuila bantu nkumbu. Mutumua Mateo walanda eevi: “Lwaamwene libumba lya bantu, waabonvuiliile nkumbu paantu baali batopele, bali mukwemooka nga mikooko isili na musuungi.” (Mat. 9:36) Ale Yehova ali waiunvua siani? Yesu waalandile eevi: “Sinue [Baba weenu] wa mwiulu ni ye tatonene ata mwanike umo wa pa baaba kuti azeeze.” (Mat. 18:14) Kakiine, ezio milandu yatusaansamusia paantu yatulangilila nangue Yehova atutonene saana! Kine twafikiila kumumana buino saana Yesu, tuli kukila kumutona Yehova.

7. Kupisia musita pamo ni balupua ni bankazi bakosele kimupasi kunti kwakukwasia siani?

⁷ Kabili, weewe kunti wasambilila vya kulangilila saana ntono ni kukila kwaluka Mukristu akosele kimupasi, kupitila kupisia nsita pamo ni balupua ni bankazi bakosele kimupasi ba mu kilonghaano kyobe ni kubamana. Pooza maano ku nsaansa ibali naayo. Te bali mukunuuna palua bupinguzi bwabo bubaakwete bwa kumubombela Yehova. Beepuzie bakubuile palua bintu paleepale bibaaimweneene mu miilo yakue Yehova. Kine uli mukukeba kukwata bupinguzi bwa mana, baloombeko masoke. Languluka nangue, “bintu bili byaviindikana kupitila bantu bengi ba kusoka.”​—Tus Maf. 11:14.

8. Kunti wakita siani kine uli watwisika palua bintu bilandile Bibilia?

⁸ Luisia kutwisika kobe. Nga vitwamonanga mu lifungu lya 2, Sataana wakaba kwezia kukwanzia te kunti utwalilile kukita buyantanzi bwa kimupasi. Weene, kunti wakita evio kupitila kukulengia utendeke kutwisika palua masambilizio paleepale a Bibilia. Kwa mufuano, paange bantu bange bakaba kwezia kukusininkiziizia nangue Leeza taatubumbile, inzi bukose bwetu bwaalukileko kupitila kwialulula. Paange musita luubanga wakili mwanike te ubanga wapoozako saana maano ku azo masambilizio, inzi loonu paange uli mukusambiliziiwa azo masambilizio ku masomo. Paange, kunti wamona bintu bili mukusambilizia balimu bobe kuya byali ni mana. Inzi, paange te banatoosie ata limo bapoozeleko maano bintu bilangiliile nangue kuli ni Kabumba. Languluka lifunde lili mu Tuswalo ni Mafunde 18:17: “Olia ali watendeka kulanda milandu yakue ya kupingulua, ali wamoneka wali ni nsaambu, mpakasie luli kuiza muntu unge ni kutendeka kumwipuzisia.” Kuliko kwitabiziasie nga mpofu malanga auli waunvua ku masomo palua azo masambilizio, toosia wapoozeleko maano bisinka bili mu Mulandu Wakue Leeza, Bibilia. Kebulula mu mpapulo yeetu. Londolola pamo ni balupua ni bankazi baali bazumiine mu nsita ya kale masambilizio alandile nangue bintu byaalukileko kupitila kwialulula. Beepuzie bintu byaabasininkiziizie nangue kuli ni Kabumba atutonene. Bobo bulondolozi kunti bwakukwasia kutoosia bintu bisininkiziizie nangue kuli ni Kabumba.

9. Weewe, wasambilila ki kupitila bintu byaaimweneene Melissa?

⁹ Nkazi umo ali wakuutua Melissa waanoonkeelemo saana kupitila kukebulula kwaakitile palua kubumbua kwa bintu.c Walanda eevi: “Ku masomo, masambilizio alandile nangue bintu byaalukileko kupitila kwialulula, ali asambiliziiwa mu nzila ili yalengia bantu bamone nangue ni kisinka. Ku ntendeko, naali natiina kukebulula tuntu palua kutwisika kwane. Naali natiina nangue paange nakaba kufikiila kwinika nangue masambilizio alandile nangue bintu byaalukileko kupitila kwialulula, ni a kisinka. Inzi, naatontonkaniizie nangue Yehova tatonene tuye twamubombela twali nga bampofu. Pakaako, naatendekele kukebulula. Naasomene kitabu Je, Kuna Muumba Anayekujali? ni broshua Uhai​—Ulitokana na Muumba? pamo ni elia ilandile, Vitu Vyenye Uzima Vilianza Namna Gani?​—Maulizo 5 ya Kujiuliza. Kakiine keekio, i kinaali nakabiile. Naali napalilesie kukita evio bila kukokola.”

10-11. Ni kiki kili kuviinda kukukwasia kusiala wali ni lwendo luswetele palua bintu bya bukambue? (1 Batesalonika 4:3, 4)

¹⁰ Lekela lwendo lubiipile. Mu miaka ya bulumendo ni bukaziana, nkulu ya kulaalana kunti yakila kukula, kabili kunti waiunvua kuya watintilue saana kukita bukambue. Sataana atonene ufikilizie nkulu yobe. Ni kiki kili kukukwasia kusiala wali ni lwendo luswetele palua bintu bya bukambue? (Soma 1 Batesalonika 4:3, 4.) Musita luuli wapepa kuli Yehova, mubuile vyuli waiunvua, kabili muloombe eevi akupeele maka. (Mat. 6:13) Languluka nangue Yehova atonene kukukwasia, apana kukupeela malipizi. (Malum. 103:13, 14) Ni Bibilia kunti yakukwasia. Melissa, olia utwazimbulanga lwa ntaanzi, waakitile maka eevi kuluisia malanga abiipile palua bintu bya bukambue. Walanda eevi: “Kusoma Bibilia kila busiku kwaankwasiizie eevi te kunti ntioke mutima. Kwaali kwandangulusia nangue neene ndi wakue Yehova, kabili nangue mbanga nakebele kumubombela.”​—Malum. 119:9.

¹¹ Te kwezia kupuisia maavia obe we muine. Babuile baviazi bobe palua buavia bobe. Kakiine te kileengele kulandila palua bebio bintu bya bunke, inzi ni kya mana kukita evio. Melissa walanda eevi: “Naapepele eevi ngaluke ni mibeele ya kusipa, kisia naamubuilile baba wane buavia bwane. Kisia kukita evio, naaiunvuile buino saana. Naainikile nangue Yehova ali waitoneena juu yane.”

12. Kunti wakwata siani bupinguzi buweeme?

¹² Uye watungululua na mafunde a Bibilia. Musita luwakaba kuya wakula, baviazi bobe bakaba kuya bakulekelela uye wakwata bupinguzi bobe we muine mu bintu bingi. Inzi, kuli bintu bingi byusinamane. Kunti watiina siani kukita kintu kili kwinoona bukibuza bobe pamo ni Yehova? (Tus Maf. 22:3) Nkazi umo ali wakuutua Kari, walondolola kintu kyaamukwasiizie kukwata bupinguzi buweeme saana. Waafikiile kwinika nangue Bakristu bakosele kimupasi, te bakabiile kuya bali ni muzilo wa kubatungulula mu kila aali. Walanda eevi: “Naali nakabiile kumana mafunde a Bibilia kuliko kumanasie mizilo.” Musita luuli wasoma Bibilia uye waiipuzia eevi: ‘Eezi milongo yansambilizia ki neene palua kutontonkania kwakue Yehova? Eba, muli ni mafunde ali kuviinda kunkwasia kukita kintu kiweeme? Kine i evio, kunti nanoonkelamo siani kine nabombia mafunde azo?’ (Malum. 19:7; Is. 48:17, 18) Kupitila kusoma Bibilia ni kutontonkania palua mafunde akue, wakaba kumona kyaleengele kukwata bupinguzi bwa kumusaansamusia Yehova. Kine watwalilila kukita buyantanzi, wakaba kufikiila kwinika nangue te ukabiile kutungululua na mizilo mu kila aali paantu wakaba kumana Yehova vyali watontonkania mu bintu paleepale.

13. Babibuza baweeme, kunti bakukwasia siani? (Tuswalo ni Mafunde 13:20)

¹³ Saakula babibuza bamutonene Yehova. Babibuza bauli wasaakula kunti bakukwasia kwaluka Mukristu akosele kimupasi. (Soma Tuswalo ni Mafunde 13:20.) Nkazi umo ali wakuutua Sara waali wazeeziizie nsaansa yakue. Kisia kuli kintu kyaakitikile kyaamukwaasiizie aaluke ni nsaansa kabili. Sara walanda eevi: “Naapatile babibuza baweeme pa musita wenka upalile. Neene pamo ni nkazi umo mukaziana twaali twasambilila Lupungu Lwakue Kamwenenena kila mulungu. Kibuza wane unge, waankwasiizie kutendeka kwasuka mu kulonghaana. Kupitila kukwasiiwa na babibuza bane, naatendekele kumona kukita lisambililo lya bunke ni kupepa kuya byali bintu bya mana saana. Naabambile kukosia bukibuza bulumine pamo ni Yehova ni kutendeka kunvua nsaansa kabili.”

14. Julien waafikiile siani kupata babibuza baweeme?

¹⁴ Kunti wapata siani babibuza bali kukukwasia buino? Julien olia ali wabomba loonu wali mukote, walanda eevi: “Lumbanga nali mulumendo, naapatile babibuza baweeme musita unaali nasimikila. Babo babibuza, babanga bali ni mute, kabili baankwasiizie kumona miilo ya kusimikila viili yaleeta nsaansa. Naatendekele kwibiikila mupaango wa kwiingizia mu miilo ya nsita yonse. Kabili, naafikiile kwinika nangue kintu kibanga kyaalengiizie te kunti mpate babibuza baweeme, ni paantu naali nakitasie bukibuza na bantu bali ni miaka yane. Kisia, naapatile kabili babibuza bange baweeme ku Beteli. Mufuano wabo waankwasiizie kusaakula buino bintu bya kwisaansamusia, kabili keekio kyaankwasiizie kumupalama saana Yehova.”

15. Paulo waamupeele Timoteo musoko ki palua kukita bukibuza? (2 Timoteo 2:20-22)

¹⁵ Ale kine wainika nangue muntu umo mu kilonghaano te kibuza aweeme? Paulo waainikile nangue bantu bange mu kilonghaano, te baali batontonkania ao kukita bintu nga Bakristu. Pakaako waamusokele Timoteo eevi aye waiseelukile ku babo bantu. (Soma 2 Timoteo 2:20-22.) Bukibuza bwetu pamo ni Yehova ni bwa mana. Pa kwaluka ni bukibuza pamo ni Baba weetu wa ku muulu twabombeelepo saana, pakaako, te tupalile kulekelela muntu onse atopie bukibuza bobo.​—Malum. 26:4.

KWIBIIKILA MIPAANGO KUNTI KWAKUKWASIA SIANI KUKITA BUYANTANZI BWA KIMUPASI?

16. Weewe, kunti waibiikila mipaango ki?

¹⁶ Ibiikile mipaango ya mana. Saakula mipaango ili kukukwasia kukosia kiketekelo kyobe, kabili ili kukukwasia kukila kwaluka Mukristu akosele kimupasi. (Baef. 3:16) Kwa mufuano, weewe kunti waibiikila mipaango ya kukila kusambilila ni kusoma Bibilia lingi. (Malum. 1:2, 3) Ao kabili, kunti waikwinda kupepa lingi saana mapepo a kufuma ku mutima. Paange upalile kuya wakengeele saana palua bintu bya kwisaansamusia byuli wasaakula ao vyuli wabombia musita obe. (Baef. 5:15, 16) Musita Yehova lwali kumona wakita maka obe onse eevi kukita buyantanzi, ali kusaansamuka.

17. Kubakwasia bange kunti kwakukwasia siani?

¹⁷ Weewe, wakaba kukila kwaluka Mukristu akose kimupasi kine wakwasia bange. Yesu waalandile eevi: “Mu kupeelana muli nsaansa ingi kukila mukupeelua.” (Miil Bat. 20:35, NWT) Wakaba kunoonkelamo saana kine wabombia musita obe ni maka a mu bulumendo ao mu bukaziana bobe eevi kukwasia bange. Kwa mufuano, kunti waibiikila mupaango wa kukwasia muntu akotele ao atopele mu kilonghaano kyenu. Kunti wabakwasia kubasitila bintu ao kubabuila vya kubombia biombo bya kielektronike. Kine uli lupua, iibiikile mupaango wa kwaluka mubombi ali wabombela eevi kubabombela balupua ni bankazi. (Baf. 2:4) Kabili, kunti wabalangilila ntono bantu basiizi kulonghaana kupitila kubasimikila mpunda iweeme ya Bukolo. (Mat. 9:36, 37) Kine kunti kyakitika, iibiikile mupaango wa kubomba mu miilo paleepale ya nsita yonse.

18. Kubomba mu miilo ya nsita yonse kunti kwakukwasia siani kukita buyantanzi?

¹⁸ Miilo ya nsita yonse kunti yakupeela fuasi ingi ya kukita buyantanzi bwa kimupasi. Kubomba bupainia kunti kwaizula muliango obe wa kusoma Masomo a Bakabilambila ba Bukolo. Kunti waya kubombela ku Beteli ao mu miilo ya kukuula ya kiteokrasi. Nkazi umo mukaziana painia ali wakuutua Kaitlyn, walanda eevi: “Kupisia nsita mu miilo ya kusimikila pamo ni balupua ni bankazi bali ni kibeelezio, kwaankwasiizie saana kukula kimupasi kisia kubatiziiwa. Mufuano wabo waankinkiziizie nkile kusambilila Bibilia ni kuwaamia buviinde bwane bwa kusambilizia.”

19. Ni mpaalo ki iwakaba kupata kine watwalilila kukita buyantanzi bwa kimupasi?

¹⁹ Kine watwalilila kukita buyantanzi bwa kimupasi, Yehova wakaba kukupeela bintu bingi biweeme. Teukaba kuzeezia maka obe wakita bintu bisili bya mana. (1 Yoan. 2:17) Teukaba kupatua na misa ili yafuma mukukwata bupinguzi bubiipile. Inzi, wakaba kuviinda buikazi ni kwaluka ni nsaansa. (Tus Maf. 16:3) Mufuano obe uweeme wakaba kukinkizia balupua ni bankazi bobe, balumendo, bakaziana ni bakulu. (1 Tim. 4:12) Kabili, kintu kya mana saana ni keeki, weewe, wakaba kusekelela mutende ni nsaansa ili yafuma mu kumusaansamusia Yehova, ni elia ili yafuma mu kuya twali ni bukibuza buweeme pamo nakue.​—Tus Maf. 23:15, 16.