Eba, Uli Ni Kiketekelo?

Evi tumusansamusie Yehova, tupalile kuya twali ni kiketekelo. Inzi, Bibilia ili yalanda nangue “kiketekelo te bunonsi bwa bantu bonse.” (2 Bat. 3:2, NWT) Mutumua Paulo waakuutile baalia babanga bamukyuzia nangue “bantu bali bakisia kabili babipile.” Kabili, waali wakabiile apususiiwe kufuma ku babo bantu. Inzi, bulondolozi bwakue Paulo palua kiketekelo, kunti bwabomba ni ku bantu bange. Bange bali bakaana kwitabila nangue kuli ni Leeza waabumbile bintu byonse. (Bar. 1:20) Ni bange kunti baya bainikile nangue kuli ni kintu ao muntu umo ali ni maka sana. Inzi, kwinika sie evio te kulangiliile nangue muntu ali ni kiketekelo kikabiilue evi kumusansamusia Yehova.

Tupalile kuya twasininkiziizie nangue Yehova kwali, kabili nangue ali wabapeela kilambu baalia bali ni kiketekelo kilumine. (Baeb. 11:6) Kiketekelo ni semu ya lizabo lya mupasi wakue utakatifu. Muntu kunti wapata ozo mupasi kine wamulomba Yehova kupitila lipepo. (Luk. 11:9, 10, 13) Kusoma Mulandu wakue utungulwilue na mupasi i nzila ili yakwasia muntu apate ozo mupasi. Kabili, muntu apalile kutontonkania palua belia byali wasoma ni kwikwinda kubibombia. Kine twakita evio, mupasi wakue Yehova kunti wabomba mu bwikazi bwetu ni kutukwasia tuye twali ni kiketekelo kelia kili kyamusansamusia wene.